2027 Kawasaki Ninja 650 : ప్రముఖ జపాన్‌ ద్విచక్ర వాహన తయారీ సంస్థ కవాసకి తన స్పోర్ట్స్‌ బైక్ Ninja 650కు కొత్త అప్‌డేట్‌ తీసుకొచ్చింది. 2027 మోడల్‌ Ninja 650ను యూకే మార్కెట్‌లో ఆవిష్కరించింది. కొత్త మోడల్‌లో ప్రధానంగా USD ఫ్రంట్‌ ఫోర్క్‌, రేడియల్‌ మౌంట్‌ ఫోర్‌-పిస్టన్‌ బ్రేక్‌ కాలిపర్లు, రీడిజైన్‌ చేసిన TFT డిస్‌ప్లే వంటి కీలక మార్పులు చోటుచేసుకున్నాయి. ప్రస్తుతం భారత్‌లో 2026 Kawasaki Ninja 650 ధర రూ.7.91 లక్షలు (ఎక్స్‌-షోరూమ్‌)గా ఉంది. అయితే 2027 అప్‌డేటెడ్‌ వెర్షన్‌ను భారత్‌లో ఎప్పుడు విడుదల చేస్తారనే విషయాన్ని కవాసకి ఇంకా ప్రకటించలేదు.
అదే పవర్‌ఫుల్‌ 649cc ఇంజిన్‌
2027 Ninja 650లో ప్రస్తుత మోడల్‌లోని 649cc, లిక్విడ్‌-కూల్డ్‌, ప్యారలల్‌-ట్విన్‌ ఇంజిన్‌నే కొనసాగించారు. ఈ ఇంజిన్‌ 68hp గరిష్ఠ పవర్‌, 64Nm టార్క్‌ను ఉత్పత్తి చేస్తుంది. దీనికి 6-స్పీడ్‌ గేర్‌బాక్స్‌ జత చేశారు. తొలిసారిగా Ninja 650లో Kawasaki Quick Shifter (KQS) అందుబాటులోకి వచ్చింది. దీని ద్వారా క్లచ్‌ను ఉపయోగించకుండా అప్‌షిఫ్ట్‌లు చేయవచ్చు. అయితే ఇది స్టాండర్డ్‌ ఫీచర్‌ కాదు.. యాక్సెసరీగా మాత్రమే అందిస్తున్నారు.
కొత్త USD ఫోర్క్‌.. మెరుగైన హ్యాండ్లింగ్‌
2026 మోడల్‌లో ఉన్న 41mm టెలిస్కోపిక్‌ ఫోర్క్‌ స్థానంలో 2027 Ninja 650లో 37mm Showa SFF-BP ఇన్వర్టెడ్‌ USD ఫోర్క్‌ను అమర్చారు. పెద్ద పిస్టన్‌ కారణంగా డ్యాంపింగ్‌ ప్రెజర్‌ తక్కువగా ఉండటంతో బైక్ ఫ్రంట్‌ ఎండ్‌ ఫీల్‌, స్టెబిలిటీ మరింత మెరుగుపడుతుందని కవాసకి చెబుతోంది. కొత్త ఫ్రంట్‌ సెటప్‌కు అనుగుణంగా వెనుక షాక్‌లో స్ప్రింగ్‌ రేట్‌ను కూడా పెంచారు. కొత్త ఫోర్క్‌ లెగ్స్‌కు మరింత రక్షణ కల్పించేలా వెడల్పైన ఫ్రంట్‌ మడ్‌గార్డ్‌ను కూడా అందించారు.
ఫోర్‌-పిస్టన్‌ రేడియల్‌ కాలిపర్లతో బ్రేకింగ్‌ అప్‌గ్రేడ్‌
బైక్‌లో ముందు భాగంలో ఉన్న ట్విన్‌ 300mm డిస్క్‌లు కొనసాగుతున్నప్పటికీ, బ్రేకింగ్‌ సిస్టమ్‌లో కీలక మార్పు చేశారు. ప్రస్తుత మోడల్‌లోని యాక్సియల్‌-మౌంట్‌ టూ-పిస్టన్‌ కాలిపర్లకు బదులుగా ఆపోజ్డ్‌ ఫోర్‌-పిస్టన్‌ రేడియల్‌-మౌంట్‌ కాలిపర్లను తీసుకొచ్చారు. దీంతో బ్రేకింగ్‌ పవర్‌, నియంత్రణ మరింత మెరుగుపడే అవకాశం ఉంది.
యూరోపియన్‌ స్పెక్‌ 2027 Ninja 650 బరువు 194 కిలోలుగా ఉంది. సీట్‌ హైట్‌ కూడా స్వల్పంగా తగ్గి 785mmకు చేరుకుంది. దీంతో విభిన్న ఎత్తులున్న రైడర్లకు బైక్‌ను హ్యాండిల్‌ చేయడం మరింత సులభంగా మారే అవకాశం ఉంది.
TFT డిస్‌ప్లేలోనూ మార్పులు
2027 Ninja 650లో 4.3-అంగుళాల TFT ఇన్‌స్ట్రుమెంట్‌ క్లస్టర్‌ను కొనసాగిస్తూ, డిస్‌ప్లే లేఅవుట్‌ను పూర్తిగా రీడిజైన్‌ చేశారు. Rideology స్మార్ట్‌ఫోన్‌ కనెక్టివిటీలో ఇప్పుడు నావిగేషన్‌, వాయిస్‌ కమాండ్స్‌ వంటి ఫీచర్లు కూడా అందుబాటులోకి వచ్చాయి. అయితే వాయిస్‌ కమాండ్స్‌కు ప్రత్యేక లైసెన్స్‌ అవసరమని, మార్కెట్‌ను బట్టి ఈ ఫీచర్‌ లభ్యత మారుతుందని కవాసకి తెలిపింది.
మూడు కలర్‌ ఆప్షన్లు
2027 Kawasaki Ninja 650ను Lime Green, Metallic Flat Spark Black with Metallic Carbon Gray, Metallic Matte Graphenesteel Gray with Metallic Spark Black రంగుల్లో అందిస్తున్నారు. భారత్‌లో బైక్ విడుదలైతే కలర్‌ ఆప్షన్లలో మార్పులు ఉండే అవకాశం ఉంది.
మొత్తంగా చూస్తే, ఇంజిన్‌లో పెద్ద మార్పులు చేయకుండా సస్పెన్షన్‌, బ్రేకింగ్‌, రైడింగ్‌ డైనమిక్స్‌, టెక్నాలజీ పరంగా 2027 Ninja 650ను మరింత ప్రీమియం స్పోర్ట్స్‌ బైక్‌గా కవాసకి తీర్చిదిద్దింది. భారత్‌లో ఈ కొత్త మోడల్‌ ఎప్పుడు అడుగుపెడుతుందనే దానిపై ఇప్పుడు ఆసక్తి నెలకొంది.
