YSR 76 Birthday: ఇడుపాలపాయలో తండ్రికి జగన్, షర్మిల ఘన నివాళి.. అభిమానులకు నిరాశ!

YSR 76 Birthday: మాజీ ముఖ్యమంత్రి వైయస్ రాజశేఖర్ రెడ్డి( y s Rajasekhar Reddy ) జయంతి వేడుకలు రాష్ట్రవ్యాప్తంగా ఘనంగా జరిగాయి. తెలంగాణలో అక్కడి ప్రభుత్వం అధికారికంగా నిర్వహించడంతో ఆ రాష్ట్రవ్యాప్తంగా కాంగ్రెస్ శ్రేణులు ఘనంగా నిర్వహించాయి. ఏపీలో సైతం వైయస్సార్ కాంగ్రెస్ పార్టీతో పాటు కాంగ్రెస్ పార్టీ శ్రేణులు జయంతి వేడుకలు ఘనంగా నిర్వహించాయి. మరోవైపు కడప జిల్లా ఇడుపులపాయలో తండ్రి రాజశేఖర్ రెడ్డి కి మాజీ సీఎం జగన్ మోహన్ రెడ్డి, పిసిసి అధ్యక్షురాలు షర్మిల నివాళులు అర్పించారు. కుటుంబ సభ్యులతో వచ్చి రాజశేఖర్ రెడ్డి ఘాట్ వద్ద అంజలి ఘటించారు. అయితే అంతా కలుస్తారని భావించిన వైయస్సార్ కుటుంబ అభిమానులకు నిరాశ మిగిల్చారు.

తల్లి విజయమ్మతో షర్మిల..
ఈరోజు ఉదయమే తల్లి విజయమ్మతో( Vijaymma) పాటు ఇడుపాలపాయకు చేరుకున్నారు షర్మిల. నేరుగా రాజశేఖర్ రెడ్డి ఘాట్ వద్దకు వెళ్లి నివాళులు అర్పించి ఆమె వెళ్లిపోయారు. ఆమెతో పాటు కుటుంబ సభ్యులు కూడా ఉన్నారు. అక్కడకు కొద్దిసేపటికి జగన్మోహన్ రెడ్డి అక్కడకు చేరుకున్నారు. భార్య భారతి తో పాటు ఇతర కుటుంబ సభ్యులతో కలిసి నివాళులు అర్పించారు. అనంతరం సామూహిక ప్రార్ధనలు చేశారు. అయితే వైయస్ కుటుంబ సభ్యులలో కొంతమంది జగన్మోహన్ రెడ్డి వెంట.. మరి కొంతమంది షర్మిల వెనుక ఉండడం విశేషం. అయితే విజయమ్మ అటు కుమార్తె షర్మిల తో.. ఇటు కుమారుడు జగన్ తో కలిసి పాల్గొనడం విశేషం.

ఒకప్పుడు అంతా కలిసి..
షర్మిల వైయస్సార్ కాంగ్రెస్( YSR Congress ) పార్టీలో ఉన్నప్పుడు.. సోదరుడు జగన్మోహన్ రెడ్డితో కలిసి రాజశేఖర్ రెడ్డి కి నివాళులు అర్పించేవారు. అయితే వారి మధ్య రాజకీయ, వ్యక్తిగత అభిప్రాయ భేదాలు రావడంతో ఎవరికి వారే అన్నట్టు ఉన్నారు. విజయమ్మ వైయస్సార్ కాంగ్రెస్ పార్టీకి గౌరవ అధ్యక్షురాలిగా ఉండేవారు. ఆ పదవిని వదులుకొని ఆమె తెలంగాణలో పార్టీ పెట్టిన కుమార్తె షర్మిలకు అండగా నిలిచారు. అయితే ఆమె పార్టీని కాంగ్రెస్ లో విలీనం చేశారు. ఏపీలో ఆ పార్టీ అధ్యక్షురాలు అయ్యారు. దీంతో అప్పటినుంచి విజయమ్మ పిల్లలిద్దరితో సమానంగా ఉంటూ వస్తున్నారు. మరోవైపు కుటుంబ సభ్యులు సైతం అడ్డగోలుగా చీలిపోయారు. కొందరు షర్మిల వెంట.. మరికొందరు జగన్ వెంట ఉన్నారు. మరికొందరు మధ్యే మార్గంగా ఉంటున్నారు.