Model Anganwadi School : చిన్నారుల విద్య, ఆరోగ్యం, పోషణకు తొలి మెట్టుగా నిలిచే అంగన్వాడీ కేంద్రాలను మరింత ఆధునికంగా తీర్చిదిద్దే దిశగా పిఠాపురంలో ఒక ప్రత్యేక ముందడుగు పడింది. పిల్లలకు ఆహ్లాదకరమైన వాతావరణంలో విద్యతో పాటు పోషకాహారం, ఆరోగ్య పరిరక్షణ, ఆటపాటలకు అవకాశం కల్పించే లక్ష్యంతో ఓ మోడల్ అంగన్వాడీ పాఠశాలను నిర్మించారు. సుమారు రూ.1.3 కోట్ల వ్యయంతో ఈ పాఠశాల నిర్మాణం చేపట్టారు.
అపోలో హాస్పిటల్స్ నిధులతో నిర్మించిన ఈ మోడల్ అంగన్వాడీ పాఠశాల రూపకల్పనలో రాంచరణ్ భార్య ఉపాసన కొణిదెల ప్రత్యేక శ్రద్ధ తీసుకున్నట్లు వెల్లడైంది. సాధారణంగా అంగన్వాడీ కేంద్రాలు చిన్నారులకు ప్రాథమిక విద్య, పోషకాహారం అందించే కేంద్రాలుగా ఉంటాయి. అయితే ఈ మోడల్ అంగన్వాడీని పిల్లల సమగ్ర అభివృద్ధిని దృష్టిలో పెట్టుకుని రూపొందించారు.
చిన్నారులు పాఠశాలకు రావడం ఒక బాధ్యతగా కాకుండా ఆనందంగా భావించేలా వాతావరణాన్ని తీర్చిదిద్దడం ఈ ప్రాజెక్ట్లో ప్రధాన ఉద్దేశంగా కనిపిస్తోంది. విద్యతో పాటు ఆటలు, ఆరోగ్యం, పోషణ వంటి అంశాలకు ప్రాధాన్యం ఇవ్వడం ద్వారా పిల్లల ప్రారంభ దశ అభివృద్ధికి ఇది దోహదపడేలా ఏర్పాట్లు చేశారు.
ఈ మోడల్ అంగన్వాడీ పాఠశాలను జనసేన అధినేత, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ ప్రారంభించనున్నారు. అదే కార్యక్రమంలో మరో 38 పాఠశాలలకు శంకుస్థాపన చేయనున్నట్లు సమాచారం. దీంతో పిఠాపురం నియోజకవర్గంలో చిన్నారుల విద్య, మౌలిక వసతులకు సంబంధించిన కార్యక్రమాలకు మరింత ప్రాధాన్యం లభించే అవకాశం ఉంది.
ఒక అంగన్వాడీ కేంద్రం కేవలం నాలుగు గోడల మధ్య జరిగే విద్యా కార్యక్రమాలకు పరిమితం కాకుండా.. చిన్నారుల భవిష్యత్తుకు పునాది వేసే వేదికగా మారాలనే ఆలోచనతో ఈ మోడల్ పాఠశాలను రూపొందించారు. ముఖ్యంగా చిన్నారులకు ఆరోగ్యకరమైన వాతావరణం, పోషకాహారం, ఆటపాటలతో కూడిన అభ్యసన అందించడంపై దృష్టి సారించారు.
ఈ కార్యక్రమం విజయవంతమైతే భవిష్యత్తులో మరిన్ని అంగన్వాడీ పాఠశాలల నిర్మాణానికి కూడా ఉపాసన కొణిదెల సహకారం అందించే అవకాశం ఉన్నట్లు సమాచారం. దీంతో పిఠాపురంలో ప్రారంభమైన ఈ ప్రయత్నం ఇతర ప్రాంతాల్లోనూ ఇలాంటి మౌలిక వసతుల అభివృద్ధికి స్ఫూర్తిగా నిలిచే అవకాశం ఉంది.
పిఠాపురం పిల్లల భవిష్యత్తును దృష్టిలో పెట్టుకుని ఇలాంటి కార్యక్రమాన్ని చేపట్టడంపై స్థానికులు హర్షం వ్యక్తం చేస్తున్నారు. మోడల్ అంగన్వాడీ పాఠశాల నిర్మాణానికి సహకరించిన అపోలో హాస్పిటల్స్ యాజమాన్యానికి, రామ్ చరణ్–ఉపాసన కొణిదెల దంపతులకు పిఠాపురం ప్రజల తరఫున కృతజ్ఞతలు తెలియజేస్తున్నారు. చిన్నారుల విద్య, ఆరోగ్యం, పోషణకు ప్రాధాన్యం ఇచ్చే ఇలాంటి కార్యక్రమాలు మరింత విస్తరించాల్సిన అవసరం ఉందని స్థానికులు అభిప్రాయపడుతున్నారు.
