Kirak RP Speech: రాష్ట్రవ్యాప్తంగా మహానాడు కొనసాగుతోంది. అమరావతి లోని కేంద్ర కార్యాలయంలో జరుగుతున్న మహానాడుకు అనుసంధానంగా.. హైబ్రిడ్ విధానంలో అన్ని జిల్లాల్లో జరుగుతున్న ఈ మహానాడులో లక్షలాదిమంది టిడిపి కార్యకర్తలు భాగం అవుతున్నారు. అయితే ఈసారి మహానాడులో 65 మంది వక్తలు మాట్లాడారు. ప్రధానంగా మహిళా నేతలకు ఈసారి ప్రాధాన్యమిచ్చారు. అయితే బుల్లితెర నటుడు కిరాక్ ఆర్పి ఈసారి ప్రత్యేకంగా నిలిచారు మహానాడులో. ఆయన మాట్లాడిన తీరు చంద్రబాబును ఎంతగానో ఆకట్టుకుంది. తెలుగుదేశం పార్టీకి మద్దతు తెలిపినందుకు తనతో పాటు తన కుటుంబ సభ్యులకు జరిగిన అవమానాలు, కుప్పంలో వైసిపి హయాంలో జరిగిన గోబెల్స్ ప్రచారం వంటి వాటిపై మాట్లాడారు కిరాక్ ఆర్పి. ఈ నేపథ్యంలో ఆయనకు త్వరలో ఓ మంచి పదవి ఇచ్చే అవకాశం ఉన్నట్లు తెలుగుదేశం పార్టీ వర్గాల్లో ప్రచారం ప్రారంభం అయింది. టిడిపి తో పాటు కూటమికి బలమైన మద్దతు దారుడుగా నిలుస్తున్నారు కిరాక్ ఆర్పి. అదే సమయంలో వైయస్సార్ కాంగ్రెస్ పార్టీకి సైతం టార్గెట్ అయ్యారు.
* జబర్దస్త్ ద్వారా ఫేమస్..
ఈటీవీ జబర్దస్త్ ప్రోగ్రాం ద్వారా బుల్లితెరకు పరిచయం అయ్యారు కిరాక్ ఆర్పి. తనదైన సొంత కంటెంట్తో.. మంచి టైమింగ్ తో ప్రేక్షకులను నవ్వించగలిగారు. అయితే జబర్దస్త్ షోలో ఉండగానే.. కెరీర్ లో మంచి పొజిషన్ లో ఉండగానే పక్కకు తప్పుకున్నారు ఆర్పి. వ్యాపారంలో అడుగుపెట్టారు. నెల్లూరు చేపల వ్యాపారం పేరుతో బాగా ఫేమస్ అయ్యారు. అయితే వైసిపి అధికారంలో ఉన్నప్పుడే ఆ పార్టీకి వ్యతిరేకంగా గళం ఎత్తారు. సోషల్ మీడియా వేదికగా ఆయన చేసిన కామెంట్స్ అప్పట్లో విపరీతంగా వైరల్ అయ్యాయి. తెలుగుదేశం పార్టీ సభ్యత్వం తీసుకున్న ఆర్పి.. జనసేన కుసైతం మద్దతుగా నిలుస్తూ వస్తున్నారు. గత కొంతకాలంగా యూట్యూబ్ ఛానల్ లో వైయస్సార్ కాంగ్రెస్ పార్టీకి వ్యతిరేకంగా, టిడిపి కూటమికి అనుకూలంగా ప్రచారం చేస్తున్నారు.
* సామాజిక స్పృహతో..
కేవలం నటుడిగానే కాకుండా సామాజిక స్పృహ కూడా ఉంది ఆర్పి కి. రాష్ట్రవ్యాప్తంగా 175 నియోజకవర్గాల పేర్లను అలవోకగా చెప్పగల నేర్పరి. బైరెడ్డి సిద్ధార్థ రెడ్డి గతంలో చేసిన సవాల్ కు ధీటుగా నియోజకవర్గాల పేర్లు చెప్పి అబ్బురపరిచారు. అయితే ఈసారి మహానాడులో వక్తగా ఆయనను ప్రత్యేకంగా ఆహ్వానించారు. ఆర్పీ మాట్లాడుతున్నంత సేపు చంద్రబాబు కూడా ఎంతగానో ఆసక్తి కనబరిచారు.. అందుకే పార్టీ పరంగా ఆయనకు గుర్తింపు ఇవ్వడంతో పాటు త్వరలో నామినేటెడ్ పోస్ట్ సైతం కేటాయిస్తారని పొలిటికల్ వర్గాల్లో ప్రచారం జరుగుతోంది. మరి అందులో ఎంత వాస్తవం ఉందో చూడాలి.
