Jonathan Rinderknecht Los Angeles: అగ్రరాజ్యం అమెరికా అన్నిరంగాల్లో ముందు ఉంటుంది. టెక్నాలజీ విషయంలో ఆ దేశానికి ఎవరూ సాటిరారన్న అభిప్రాయం ఉంది. కానీ అందతా డొల్ల అని ఒక్కడు నిరూపించాడు. అమెరికాలోని కాలిఫోర్నియా రాష్ట్రం మరోసారి మహా విపత్తును చూసింది. ఈ ఏడాది జనవరి 1న ప్రారంభమైన పసిఫిక్ పాలిసేడ్స్ అగ్నిప్రమాదం సహజ ప్రమాదం కాదని, ఉద్దేశపూర్వకంగా మంటలు పెట్టిన నేరం అని అధికారులు నిర్ధారించారు. ఈ ఘటనకు సంబంధించి విచారణలో 29 ఏళ్ల జొనాథన్ రిండర్నెక్ట్ను పోలీసులు అరెస్టు చేశారు.
లాస్ ఏంజెలిస్ చరిత్రలో పెద్ద అగ్నిప్రమాదం
నూతన సంవత్సర రోజున ప్రారంభమైన ఆ మంటలు కేవలం గంటల్లోనే నగర పరిసరాలను ఆవరించాయి. దాదాపు 6,800 గృహాలు, వ్యాపార సముదాయాలు బూడిదయ్యాయి. మొత్తం నష్టం దాదాపు 150 బిలియన్ డాలర్లకు చేరిందని అంచనా. ఇది లాస్ ఏంజెలిస్ చరిత్రలో నమోదైన అతి పెద్ద అగ్నిప్రమాదంగా అధికారులు గుర్తించారు. ఈ ప్రమాదంలో 12 మంది ప్రాణాలు కోల్పోయారు. వందలాది మంది నిర్వాసితులయ్యారు. రక్షణ సిబ్బంది, వైమానిక అగ్నిమాపక దళాలు నిరంతరం శ్రమించినప్పటికీ, బలమైన గాలులు, ఎండ విపరీతంగా ఉండటంతో మంటలు నియంత్రణలోకి రావడానికి పది రోజులకుపైగా పట్టింది.
ఎందుకు చిచ్చు పెట్టినట్లు?
అరెస్టయిన జొనాథన్ రిండర్నెక్ట్ ఎందుకు ఈ దుశ్చర్యకు పాల్పడ్డాడనే విషయాన్ని అధికారులు ఇంకా దర్యాప్తు చేస్తున్నారు. ప్రారంభ కేసు వివరాల ప్రకారం, స్థానిక ఆస్తి విభేదాలు, వ్యక్తిగత మానసిక అస్థిరత కారణమై ఉండవచ్చనేది పోలీసుల ప్రాథమిక అభిప్రాయం. ఈ ఘటనలో ఆయనపై హత్య, ఆస్తి నాశనం, ప్రజల ప్రాణహాని కలిగించడంపై పలు ఆరోపణలు నమోదయ్యాయి. కాలిఫోర్నియా రాష్ట్రం వర్షాభావం, వేడి తరంగాలతోనే తరచూ అగ్నిప్రమాదాలకు గురవుతూ ఉంటే, మానవహస్తం కారణమైన ఈ ఘటన పరిస్థితిని మరింత సంక్లిష్టం చేసింది. పసిఫిక్ తీరంలోని జీవవైవిధ్యం, వన్యప్రాణులు, పర్యావరణం మొత్తం దెబ్బతిన్నాయి. స్థానిక ఆర్థిక వ్యవస్థకు నష్టం అంచనా వేయలేనంతటి స్థాయిలో ఏర్పడింది.
ఒకరి నిర్లక్ష్యం లేదా ఉద్దేశపూర్వక చర్య లక్షల కోట్లు విలువైన ఆస్తులను బూడిద చేసి, ప్రాణాలను బలి చేసింది. పసిఫిక్ పాలిసేడ్స్ అగ్నిప్రమాదం మానవ నిర్లక్ష్యానికి ఖరీదైన ఉదాహరణగా మిగిలిపోతోంది. ఇది కేవలం ఒక ప్రాంతానికి మాత్రమే గాక ప్రపంచానికి ప్రకృతి–మానవ సంబంధ సున్నిత సమతుల్యతపై స్పష్టమైన హెచ్చరిక.
