Donald Trump(13)
Donald Trump : పదవీవిరమణ చేస్తున్న అమెరికా అధ్యక్షుడు జో బిడెన్.. కొత్తగా ఎన్నికైన అధ్యక్షుడు డొనాల్డ్ ట్రంప్ బుధవారం ఓవల్ కార్యాలయంలో సమావేశం కానున్నారు. అమెరికా అధ్యక్షుడి అధికారిక నివాసం, కార్యాలయం అయిన వైట్‌హౌస్‌ శనివారం ఈ విషయాన్ని వెల్లడించింది. ఓవల్ ఆఫీస్ అనేది వైట్ హౌస్‌లో ఉన్న అమెరికా అధ్యక్షుని అధికారిక కార్యస్థలం. ప్రెస్ సెక్రటరీ కరెన్ జీన్ పియర్ విడుదల చేసిన ఒక ప్రకటనలో.. జో బిడెన్ ఆహ్వానం మేరకు డొనాల్డ్ ట్రంప్ ఉదయం 11 గంటలకు ఓవల్ కార్యాలయంలో ఆయనను కలవనున్నారు.
ఓవల్ ఆఫీసే ఎందుకు?
అధ్యక్షుడు ప్రసంగించాల్సిన వేదికను చాలా జాగ్రత్తగా ఎంచుకుంటారు. అత్యంత ప్రాధాన్యంతో కూడుకున్న ప్రసంగాలకు, చర్చలు, సమావేశాలకు మాత్రమే ఓవల్ ఆఫీసును వేదికగా చేసుకుంటుంటారు. ట్రంప్‌పై కాల్పులు, అంతర్గత ఉగ్రవాదంగా పరిగణిస్తూ ఎఫ్‌బీఐ దర్యాప్తు వంటి పరిణామాల నేపథ్యంలో ప్రజలనుద్దేశించి ప్రసంగించడానికి మాజీ అధ్యక్షుడు కొంత కాలం క్రితం ఓవల్ ఆఫీసును ఎంచుకున్నారు.
ఇప్పటి వరకు కలవని ట్రంప్, బిడెన్
ఇటువంటి సమావేశం సాంప్రదాయకంగా ఎన్నికల తర్వాత అవుట్‌గోయింగ్ ప్రెసిడెంట్.. కొత్తగా ఎన్నికైన అధ్యక్షుడి మధ్య జరుగుతుంది. అయితే 2020లో రిపబ్లికన్ పార్టీ నాయకుడు, అప్పటి అధ్యక్షుడు ట్రంప్ ఎన్నికలలో ఓడిపోయిన తరువాత, డెమొక్రాటిక్ నాయకుడు, అధ్యక్షుడిగా ఎన్నికైన జో బిడెన్‌తో అలాంటి సమావేశం జరగలేదు.
అమెరికా తదుపరి అధ్యక్షుడు ట్రంప్
చారిత్రాత్మక విజయం తర్వాత, రిపబ్లికన్ పార్టీ అభ్యర్థి డొనాల్డ్ ట్రంప్ అమెరికా తదుపరి అధ్యక్షుడు. మరోసారి అఖండ మెజారిటీతో వైట్‌హౌస్‌కు వెళ్లనున్నారు. ఈసారి డెమోక్రటిక్ పార్టీ అభ్యర్థి కమలా హారిస్‌తో డొనాల్డ్ ట్రంప్ పోటీ చాలా కఠినంగా ఉంటుందని భావించారు. అయితే ఎన్నికల అనంతరం వచ్చిన ఫలితాల్లో ట్రంప్ గెలవడానికి తగినన్ని ఓట్లు సాధించారు. ఎన్నికల్లో ఓడి తర్వాత గెలిచి 130 ఏళ్ల రికార్డులను బద్దలు కొట్టి మళ్లీ ఈ పదవిని చేపట్టబోతున్న అమెరికా మాజీ అధ్యక్షుడు.. డొనాల్డ్ ట్రంపే. అలాగే 78 ఏళ్ల వయసులో అమెరికా అధ్యక్ష పదవికి ఎన్నికైన అత్యంత వృద్ధుడిగా కూడా ఆయన రికార్డులకెక్కనున్నారు.
అమెరికాలో ఇటీవల జరిగిన అధ్యక్ష ఎన్నికల్లో విజయం సాధించిన డొనాల్డ్ ట్రంప్.. శనివారం నెవాడా రాష్ట్రంలోనూ విజయ పతాకాన్ని ఎగురవేశారు. మాజీ అధ్యక్షుడు జార్జ్ డబ్ల్యూ. బుష్ తర్వాత మొదటిసారిగా ఈ రాష్ట్రంలో ఆరు ఎన్నికల తర్వాత ఆ ఓట్లు రిపబ్లికన్ పార్టీకి తిరిగి వచ్చాయి. గతంలో 2004లో బుష్ ఈ రాష్ట్రం నుంచి గెలిచారు. ట్రంప్, డెమొక్రాటిక్ పార్టీ అధ్యక్ష అభ్యర్థి కమలా హారిస్ ఈ ఏడాది రాష్ట్రంలో చాలాసార్లు ప్రచారం చేశారు. నెవాడాలోని చాలా కౌంటీలు గ్రామీణ ప్రాంతాలు, 2020లో ట్రంప్‌కు అత్యధికంగా ఓటు వేశారు. కానీ ఆ సమయంలో అత్యధిక జనాభా కలిగిన రెండు కౌంటీలు అయిన వౌకేషా, క్లార్క్ నుండి బిడెన్ గెలిచాడు. కానీ ఈ సారి అసోసియేటెడ్ ప్రెస్ ట్రంప్ విజయాన్ని నివేదించింది.