Canada Anti India Activities: కెనడా, భారత్ మధ్య కొన్ని రోజులుగా వివాదం కొనసాగుతోంది. ఈ వివాదానికి అక్కడి ఖలిస్థాన సానుభూతిపరులు ఆజ్యం పోస్తున్నారు. అయితే ఇటీవలి ఎన్నికల్లో కొత్త ప్రధాని ఎన్నికయ్యారు. దీంతో పరిస్థితులు ఇప్పుడిప్పుడే కుదుటపడుతున్నాయి. ఈ తరుణంలో తాజాగా ఖలిస్థానీ సానుభూతిపరుల మాదకద్రవ్యాల దందాను అక్కడి ప్రభుత్వం బయటపెట్టింది.
కెనడాలో ఖలిస్థానీ సానుభూతిపరులు మాదక ద్రవ్యాల అక్రమ వ్యాపారం ద్వారా భారీ నిధులు సమీకరిస్తూ భారత్ వ్యతిరేక కార్యకలాపాలకు ఆజ్యం పోస్తున్నట్లు తాజా దర్యాప్తులు వెల్లడించాయి. పీల్ రీజనల్ పోలీసులు ’ప్రాజెక్టు పెలికాన్’ పేరిట నిర్వహించిన ఆపరేషన్లో 479 కిలోల కొకైన్ స్వాధీనం చేసుకోవడంతో ఈ అంతర్జాతీయ నెట్వర్క్ బయటపడింది. ఈ మాదకద్రవ్యాల విలువ సుమారు 47.9 మిలియన్ డాలర్లుగా అంచనా వేయబడింది. ఈ కేసులో భారతీయ మూలాలున్న ఏడుగురు సహా తొమ్మిది మందిని అరెస్టు చేశారు.
నెట్వర్క్లో ఖలిస్థానీ కీలక పాత్ర
పీల్ రీజనల్ పోలీసుల దర్యాప్తు ప్రకారం, ఖలిస్థానీ సానుభూతిపరులు అమెరికా–కెనడా సరిహద్దులో వాణిజ్య ట్రక్కుల రవాణా మార్గాలను ఉపయోగించి కొకైన్ స్మగ్లింగ్ను నిర్వహిస్తున్నారు. ఈ నెట్వర్క్కు మెక్సికన్ మాదకద్రవ్యాల కార్టెల్స్తో సన్నిహిత సంబంధాలు ఉన్నాయని పోలీసులు గుర్తించారు. ఈ అక్రమ వ్యాపారం నుంచి వచ్చే ఆదాయాన్ని భారత్లో ఆందోళనలు, రెఫరెండమ్ల నిర్వహణ, ఆయుధాల కొనుగోళ్లకు వినియోగిస్తున్నట్లు తెలిసింది. మరింత ఆందోళనకరంగా, పాకిస్థాన్ నిఘా సంస్థ ఐఎస్ఐ ఈ కార్యకలాపాలకు మద్దతు ఇస్తున్నట్లు ఇంటెలిజెన్స్ సమాచారం సూచిస్తోంది. ఐఎస్ఐ అఫ్గానిస్థాన్ నుంచి హెరాయిన్ స్మగ్లింగ్ ద్వారా తన కార్యకలాపాలకు నిధులు సమీకరిస్తోందని కూడా ఆరోపణలు ఉన్నాయి.
అరెస్టులు, మాదకద్రవ్యాల స్వాధీనం
’ప్రాజెక్టు పెలికాన్’లో భాగంగా, పీల్ పోలీసులు 479 కిలోల కొకైన్ను స్వాధీనం చేసుకున్నారు. ఈ కేసులో యోగేంద్రరాజ(టొరంటో), మన్హీత్ సింగ్ (బ్రాంప్టన్), ఫిలిప్ టెప్ (హామిల్టన్), అరవింద్ పవార్ (బ్రాంప్టన్), కమర్జిత్ సింగ్ (కాలెడాన్), గుర్జీత్ సింగ్ (కాలెడాన్), సత్రజ్ సింగ్(కేంబ్రిడ్జ్), శివ ఓంకార్ సింగ్ (జార్జిటౌన్), హవో టామీ హుయన్లను అరెస్టు చేశారు. గతంలో కూడా, 2024 డిసెంబర్లో అమెరికాలోని ఇల్లినాయిస్లో భారతీయ మూలాలున్న ఇద్దరు కెనడా వాసుల వద్ద 1,000 పౌండ్ల కొకైన్ స్వాధీనం చేయబడింది. ఈ ఏడాది ఫిబ్రవరి–మే మధ్య విండ్సర్లోని అంబాసిడర్ వంతెన వద్ద 127 కిలోలు, పాయింట్ ఎడ్వర్డ్లోని బ్లూవాటర్ వంతెన వద్ద 50 కిలోల కొకైన్ను పోలీసులు స్వాధీనం చేసుకున్నారు.
అంతర్జాతీయ సహకారం..
ఈ దర్యాప్తు 2024 జూన్లో ప్రారంభమైంది, అమెరికా–కెనడా సరిహద్దులో వాణిజ్య ట్రక్కులపై నిఘా ఉంచడంతో మొదలైంది. నవంబర్ నాటికి, పోలీసులు అనేక వ్యక్తులు, ట్రక్కింగ్ కంపెనీలు, మాదకద్రవ్యాలను దాచే స్థలాలను గుర్తించారు. ఈ ఆపరేషన్లో కెనడా బోర్డర్ సర్వీస్ ఏజెన్సీ, అమెరికా డ్రగ్ ఎన్ఫోర్స్మెంట్ అడ్మినిస్ట్రేషన్ (డీఈఏ) సహకారం కీలక పాత్ర పోషించింది. ఈ సంయుక్త ఆపరేషన్ ద్వారా అంతర్జాతీయ మాదకద్రవ్యాల స్మగ్లింగ్ నెట్వర్క్ను ఛేదించడంలో విజయం సాధించారు.
భారత్పై రాజకీయ దాడి..
ఈ దందా కేవలం అక్రమ వ్యాపారంతో ఆగిపోలేదు.. ఇది భారత్లో అస్థిరతను సృష్టించే రాజకీయ లక్ష్యాలతో ముడిపడి ఉంది. ఖలిస్థానీ సానుభూతిపరులు ఈ నిధులను ఆందోళనలు, రెఫరెండమ్లు, ఆయుధాల సేకరణకు ఉపయోగిస్తున్నారు. ఐఎస్ఐ మద్దతు ఈ కార్యకలాపాలకు అదనపు బలాన్ని ఇస్తోంది, ఇది భారత జాతీయ భద్రతకు తీవ్ర ఆందోళన కలిగిస్తోంది. మెక్సికన్ కార్టెల్స్తో సహకారం ఈ నెట్వర్క్ అంతర్జాతీయ విస్తృతిని సూచిస్తుంది.
భారత్–కెనడా సంబంధాలపై ప్రభావం..
ఈ ఘటన భారత్–కెనడా సంబంధాలపై కూడా ప్రభావం చూపవచ్చు. ఖలిస్థానీ కార్యకలాపాలపై కెనడా ప్రభుత్వం తీసుకునే చర్యలు రెండు దేశాల మధ్య దౌత్య సంబంధాలను ప్రభావితం చేయవచ్చు. అంతేకాక, ఈ దర్యాప్తు అంతర్జాతీయ స్మగ్లింగ్ నెట్వర్క్లను ఎదుర్కోవడంలో సమన్వయ చర్యల ఆవశ్యకతను హైలైట్ చేస్తుంది.’ప్రాజెక్టు పెలికాన్’ ద్వారా కెనడా పోలీసులు సాధించిన విజయం ఖలిస్థానీ సానుభూతిపరుల మదకద్రవ్యాల నెట్వర్క్ను బహిర్గతం చేసింది. ఈ అక్రమ వ్యాపారం భారత్ వ్యతిరేక కార్యకలాపాలకు నిధుల సమీకరణలో కీలక పాత్ర పోషిస్తోందని స్పష్టమైంది. ఐఎస్ఐ, మెక్సికన్ కార్టెల్స్తో సంబంధాలు ఈ సమస్య యొక్క తీవ్రతను మరింత పెంచుతున్నాయి. భారత్, కెనడా, అమెరికా మధ్య సమన్వయం ఈ బెదిరింపును ఎదుర్కోవడంలో కీలకం.
