Australia Cockroach Farming: బొద్దింక, కాంక్రోచ్.. ఇటీలికాలంలో ఈ పేరు బాగా పాపులర్ అయింది. దానిని చూస్తేనే వెగటుగా, చికాకుగా అనిపిస్తుంది. అంటి బొద్దికలతో యువతను ఓ జడ్జి పోల్చడం చర్చనీయాంశమైంది. తర్వాత దానిపై వివరణ కూడా ఇచ్చారు. కానీ అది క్రమంగా కాంక్రోచ్ జనతా పార్టీ పేరుతో సోషల్ మీడియాతో యుద్ధమే మొదలైంది. తాజాగా జంతర్మంతర్ వద్ద కాక్రోచ్ జనతాపార్టీ మద్దతుదారులు ధర్నా కూడా చేశారు. ఇదిలా ఉంటే.. తాజాగా కాంక్రోచ్ల అక్రమ పెంపకం గుట్టు ఆస్ట్రేలియాలో రట్టయింది. అక్రమంగా బొద్దింకలను పెంచి, విక్రయిస్తున్న ఒక కేంద్రంపై స్థానిక అధికారులు ఇటీవల ఆకస్మిక దాడి చేశారు. న్యూ సౌత్ వేల్స్ రాష్ట్రంలోని బథరస్ట్ నగరంలో జరిగిన ఈ ఆపరేషన్లో దాదాపు ఒక లక్ష మంది బొద్దింకలను సీజ్ చేశారు.
మొదటిసారి ఇలా..
దేశంలో ఒకేసారి ఇంత పెద్ద సంఖ్యలో కీటకాలను స్వాధీనం చేసుకోవడం ఇదే తొలిసారి అని అధికారులు తెలిపారు. సీజ్ చేసిన బొద్దింకల్లో ప్రధానంగా మడగాస్కర్ హిస్సింగ్, దుబియా జాతులు ఉన్నట్లు వెల్లడైంది. మడగాస్కర్ హిస్సింగ్ బొద్దింకలు ప్రపంచంలోనే అతి పెద్దవి. ఇవి సాధారణ బొద్దింకల కంటే చాలా పెద్దవి. ఒక్కొక్కటి 5 నుంచి 8 సెంటీమీటర్ల పొడవు ఉంటాయి. మెరిసే గోధుమ రంగులో ఉండే ఈ కీటకాలు మనిషి వేలు కంటే కూడా పెద్దగా కనిపిస్తాయి.
పెంపకం ఎందుకు అక్రమం..
ఆస్ట్రేలియాలో స్థానిక వన్యప్రాణులు, జీవవైవిధ్యానికి తీవ్ర హాని కలిగించే సామర్థ్యం ఉన్నందున ఈ జాతి బొద్దింకలను దిగుమతి చేసుకోవడం, పెంచడం, విక్రయించడం చట్టపరంగా నిషేధించబడింది. అయినప్పటికీ ఒక వ్యాపారి లాభాపేక్షతో ఈ కార్యకలాపాలు చేపట్టినట్లు అధికారులు గుర్తించారు.
ఎందుకు పెంచుతున్నారు?
నిపుణుల ప్రకారం, ఈ పెద్ద సైజు బొద్దింకలను ప్రధానంగా పెంపుడు సరీసృపాలు (పాములు, బల్లులు, గెక్కోలు మొదలైనవి) కోసం ఆహారంగా విక్రయిస్తారు. పెంపుడు జంతువుల యజమానుల మధ్య ఇవి డిమాండ్లో ఉండటం వల్ల అక్రమ వ్యాపారం జరుగుతోంది. ఆస్ట్రేలియా వంటి సున్నితమైన పర్యావరణ వ్యవస్థను కలిగిన దేశంలో విదేశీ కీటకాలను అనుమతి లేకుండా పెంచడం తీవ్రమైన పర్యావరణ ప్రమాదం. ఒకసారి వీటి నుంచి ఏదైనా తప్పించుకుంటే స్థానిక జాతులపై ప్రభావం చాలా తీవ్రంగా ఉండవచ్చు.
ఈ ఘటన దేశంలో అక్రమ కీటకాల వ్యాపారాన్ని కట్టడి చేయాల్సిన అవసరాన్ని మరింత బలంగా ఉద్ఘాటిస్తోంది. ఈ దాడి ఆస్ట్రేలియా పర్యావరణ రక్షణ యంత్రాంగం ఎంత కఠినంగా వ్యవహరిస్తోందనడానికి ఉదాహరణగా నిలుస్తోంది.
