Hyderabad IT Sector Slowdown 2026: ఒకప్పుడు ప్రపంచ దిగ్గజ సంస్థలన్నీ క్యూ కట్టిన నగరం.. నిరంతరం కోడింగ్ లయలతో కీబోర్డ్ శబ్దాలతో ప్రతిధ్వనించే హైటెక్ సిటీ వీధులు.. నేడు ఒక తెలియని నిశ్శబ్దంలో కూరుకుపోతున్నాయా? తెలంగాణ ఐటీ రంగానికి గడిచిన రెండేళ్లుగా ఒక రకమైన ‘గడ్డు కాలం’ దాపురించిందన్నది కాదనలేని సత్యం.
Also Read: టోర్నీకి ముందే చెన్నై పరిస్థితి ఇలా అయిపోయింది ఏంటి.. ఎవరు కాపాడుతారు?
అంకెలు చెబుతున్న చేదు నిజం
గణాంకాలు అబద్ధం చెప్పవు. 2023లో 9.46 లక్షల ఉద్యోగాలతో కళకళలాడిన హైదరాబాద్ ఐటీ రంగం.. 2026 నాటికి 9.39 లక్షలకు పడిపోవడం అంటే అది కేవలం సంఖ్యల తగ్గుదల మాత్రమే కాదు.. వేల కుటుంబాల ఆశల మీద పడ్డ దెబ్బ. కేటీఆర్ విమర్శించినట్లుగా ప్రభుత్వం స్వయంగా అసెంబ్లీలోనూ, బడ్జెట్ ప్రసంగంలోనూ ఈ తగ్గుదలను అంగీకరించడం ఐటీ ఉద్యోగుల్లో గుబులు రేపుతోంది.
ప్రశ్నార్థకమైన భవిష్యత్తు
పెట్టుబడులను ఆకర్షించడంలో, ఉన్న కంపెనీలను నిలుపుకోవడంలో ప్రభుత్వం తన పట్టు కోల్పోయిందా? కృత్రిమ మేధస్సు పాత ఉద్యోగాలను మింగేస్తోందా? ఒకవేళ అదే నిజమైతే, యువతను కొత్త నైపుణ్యాల వైపు మళ్లించడంలో పాలకులు ఎందుకు వెనుకబడ్డారు? ప్రపంచ స్థాయి మౌలిక వసతులకు పేరుగాంచిన హైదరాబాద్పై ఇన్వెస్టర్ల నమ్మకం సడలుతోందా? అన్న అనుమానాలు కలుగుతున్నాయి.
యువత ఆవేదన
ఒక ఐటీ ఉద్యోగం అంటే అది కేవలం ఒక జీతం కాదు.. మధ్యతరగతి తల్లిదండ్రుల కల, ఒక యువకుడి లేదా యువతి కష్టానికి దక్కిన ఫలితం. నేడు ఎంతో మంది సాఫ్ట్వేర్ ఇంజనీర్లు తమ కెరీర్ ఎటు వెళ్తుందో తెలియక, ఎప్పుడు పింక్ స్లిప్ వస్తుందోనని ఆందోళనతో గడుపుతున్నారు. గతంలా కొత్త నియామకాలు లేవు, ఉన్న కొలువులు ఊడిపోతున్నాయి. “హైదరాబాద్ ఐటీ అభివృద్ధి రథం ఆగిపోయిందా? లేక వెనక్కి పయనిస్తోందా?” అన్నది ఇప్పుడు ప్రతి తెలంగాణ బిడ్డ మదిలో మెదులుతున్న ప్రశ్న.
రాజకీయ విమర్శలు పక్కన పెడితే, ఐటీ రంగం మళ్ళీ పుంజుకోవాలంటే తక్షణ కార్యాచరణ అవసరం. లేదంటే ఐటీ హబ్గా మనం సంపాదించుకున్న కీర్తి ప్రతిష్టలు కాలగర్భంలో కలిసిపోయే ప్రమాదం ఉంది. ప్రభుత్వాలు మారినా.. అభివృద్ధి వేగం తగ్గకూడదని కోరుకోవడం ప్రజల కనీస హక్కు.
