TG Free Bus Scheme Update: తెలంగాణలో మహిళల కోసం అమలవుతున్న ఉచిత బస్సు పథకం(మహాలక్ష్మి స్కీమ్) స్థానిక మహిళలకు ప్రయాణ సౌలభ్యాన్ని అందిస్తోంది. నిత్యం లక్షల మంది రాష్ట్రంలోని వివిధ ప్రాంతాలకు ఉచితంగా ప్రయాణిస్తున్నారు. విద్యార్థినులు, ఉపాధ్యాయినిలు, మహిళా ఉద్యోగులు దీనిని సద్వినియోగం చేసుకుంటున్నారు. అయితే ఎప్పుడో ఒకసారి ప్రయాణించే మహిళలకు ఇటీవల ఆటంకాలు ఏర్పడుతున్నాయి. ఎప్పటికప్పుడు నిబంధనలు తెలుసుకోకపోవడంతో ఇబ్బంది పడుతున్నారు. కొంరైతే మధ్యలోనే దిగిపోతున్నారు. మరికొందరు టికెట్ కొంటున్నారు. ఆధార్ కార్డులో రాష్ట్రం పేరు ఆంధ్రప్రదేశ్ ఉండటం వల్ల కొందరు కండక్టర్లు జీరో టికెట్ ఇవ్వడానికి నిరాకరిస్తున్నారు. ఈ అంశంపై గ్రేటర్ హైదరాబాద్ ఆర్టీసీ ఎగ్జిక్యూటివ్ డైరెక్టర్ రాజశేఖర్ స్పందించారు. ఆధార్లో తెలంగాణ లోకల్ అడ్రస్ ఉంటే సరిపోతుందని స్పష్టం చేశారు.
మహిళలకు వరంగా ఫ్రీ బస్సు..
తెలంగాణ ప్రభుత్వం అమలు చేస్తున్న మహాలక్ష్మి స్కీమ్ రాష్ట్రంలోని మహిళలకు ఆర్టీసీ బస్సుల్లో ఉచిత ప్రయాణ సౌకర్యాన్ని అందిస్తోంది. ఈ పథకం కింద, స్థానిక మహిళలు ఆధార్ కార్డు చూపించి జీరో టికెట్ పొందవచ్చు. ఈ స్కీమ్ మహిళల ఆర్థిక భారాన్ని తగ్గించడంతోపాటు, ప్రయాణ సౌలభ్యాన్ని పెంచి, వారి సాధికారతకు దోహదపడుతోంది. అయితే, ఆధార్ కార్డులోని సాంకేతిక సమస్యలు ఈ పథకం అమలులో అడ్డంకులుగా మారాయి.
ఆధార్ అప్డేట్ సమస్య..
తెలంగాణ రాష్ట్రం ఏర్పడి దశాబ్దం దాటినప్పటికీ, కొందరి ఆధార్ కార్డుల్లో రాష్ట్రం పేరు ఆంధ్రప్రదేశ్గా ఉంది. ఈ సాంకేతిక సమస్య వల్ల కొందరు బస్ కండక్టర్లు జీరో టికెట్ ఇవ్వడానికి నిరాకరిస్తున్నారు. ముఖ్యంగా గ్రామీణ ప్రాంతాల్లోని మహిళలు విషయం తెలియక ఈ పథకం ప్రయోజనాలను పొందలేకపోతున్నారు. ఈ సమస్య ఆధార్ అప్డేట్ చేయని వారిలో ఎక్కువగా కనిపిస్తోంది, కండక్టర్లలో స్పష్టత లేకపోవడం ఈ సమస్యను మరింత జటిలం చేస్తోంది. ఈ సమస్యపై స్పందించిన గ్రేటర్ హైదరాబాద్ ఆర్టీసీ ఎగ్జిక్యూటివ్ డైరెక్టర్ రాజశేఖర్, ఆధార్ కార్డులో తెలంగాణ లోకల్ అడ్రస్ ఉంటే జీరో టికెట్ ఇవ్వడానికి ఎలాంటి అడ్డంకి లేదని స్పష్టం చేశారు. రాష్ట్రం పేరు ఎలా ఉన్నప్పటికీ, అడ్రస్ తెలంగాణకు చెందినదైతే స్కీమ్ ప్రయోజనం పొందవచ్చని ఆయన తెలిపారు. ఈ విషయంలో కండక్టర్లు నిరాకరిస్తే, ప్రయాణికులు 040–69440000 టోల్ ఫ్రీ నంబర్కు ఫిర్యాదు చేయవచ్చని సూచించారు. అయితే, సాంకేతిక సమస్యలను నివారించడానికి ఆధార్ కార్డులను అప్డేట్ చేసుకోవాలని కూడా అధికారులు సలహా ఇచ్చారు.
తెలంగాణ ఉచిత బస్సు పథకం మహిళలకు ఆర్థిక సాధికారత,ప్రయాణ సౌలభ్యాన్ని అందించే గొప్ప పథకం. అయితే, ఆధార్ కార్డులో రాష్ట్రం పేరు సంబంధిత సమస్యలు ఈ పథకం అమలులో అడ్డంకులుగా మారాయి. ఈ సమస్యను పూర్తిగా పరిష్కరించడానికి కండక్టర్లకు శిక్షణ, ఆధార్ అప్డేట్ సౌలభ్యం, అవగాహన కార్యక్రమాలు కీలకం. ఈ చర్యల ద్వారా, మహాలక్ష్మి స్కీమ్ మరింత సమర్థవంతంగా అమలై, తెలంగాణ మహిళలకు పూర్తి ప్రయోజనం చేకూర్చగలదు.
