BSNL Global Satellite Service: ప్రభుత్వ రంగ టెలికాం దిగ్గజం భారత్ సంచార్ నిగమ్ లిమిటెడ్ (BSNL) దేశంలో సరికొత్త గ్లోబల్ శాటిలైట్ ఫోన్ సేవలను అధికారికంగా అందుబాటులోకి తెచ్చింది. సాధారణ మొబైల్ టవర్లు లేదా సెల్యులార్ నెట్వర్క్లు అస్సలు పని చేయని మారుమూల ప్రాంతాల్లో సైతం ఈ ఫోన్ ద్వారా నిరంతరాయంగా వాయిస్ కాల్స్ మాట్లాడుకోవచ్చు. అలాగే SMSలు పంపుకోవచ్చు. ‘సరిహద్దులు లేని కనెక్టివిటీ’ అనే నినాదంతో వస్తోన్న ఈ ఫోన్ ధర తెలిస్తే షాక్ తినడం ఖాయం. ఎందుకంటే?
ఈ సరికొత్త శాటిలైట్ ఫోన్ ఇన్మార్శాట్ వంటి గ్లోబల్ శాటిలైట్ నెట్వర్క్ ప్రొవైడర్ల భాగస్వామ్యంతో పనిచేస్తుంది. సాధారణ స్మార్ట్ఫోన్ల లాగా కాకుండా, ఇది నేరుగా అంతరిక్షంలోని శాటిలైట్లతో అనుసంధానమై ఉంటుంది. అందువల్ల దట్టమైన అడవులు, ఎత్తైన పర్వత ప్రాంతాలు, సముద్ర తీరాలు ల్యాండ్ లైన్ లేదా మొబైల్ సిగ్నల్స్ లేని ‘ఆఫ్-గ్రిడ్’ ప్రాంతాలలో కూడా ఇది అద్భుతమైన కనెక్టివిటీని అందిస్తుంది.
కఠినమైన వాతావరణ పరిస్థితులను తట్టుకునేలా ఈ హ్యాండ్సెట్ను అత్యంత పటిష్టంగా రూపొందించారు. ధూళి, నీరు, ప్రమాదవశాత్తు కింద పడినా పాడవకుండా ఉండేలా దీని బాడీ ఉంటుంది. విద్యుత్ సౌకర్యం లేని ప్రాంతాల్లో కూడా సుదీర్ఘ కాలం పాటు వినియోగించుకోవడానికి వీలుగా ఇందులో అత్యంత ఎక్కువ కాలం మన్నిక నిచ్చే ‘లాంగ్-లాస్టింగ్’ బ్యాటరీని అమర్చారు. అంతేకాకుండా, ఏదైనా ప్రమాదంలో చిక్కుకున్నప్పుడు తక్షణమే సహాయం పొందేందుకు వీలుగా ఇందులో ఒక ప్రత్యేకమైన ‘SOS ఎమర్జెన్సీ సపోర్ట్’ బటన్ను కూడా ఇచ్చారు.
అయితే ఈ శాటిలైట్ ఫోన్ సాధారణ ప్రజల దైనందిన అవసరాల కోసం ఉద్దేశించినది కాదు. దేశ రక్షణ రంగాలు (Defence), విపత్తు నిర్వహణ సంస్థలు (Disaster Management), మైనింగ్ (గనుల తవ్వకం), మారుమూల పారిశ్రామిక ప్రాజెక్టులు, సముద్రయానం చేసే నౌకల సిబ్బందికి ఇది ఒక సంజీవనిలా పనిచేస్తుంది. అలాగే హిమాలయాల వంటి మారుమూల ప్రాంతాలకు వెళ్లే సాహసయాత్రికులు (Trekkers) అమర్నాథ్, కేదార్నాథ్ వంటి కఠినతరమైన పుణ్యక్షేత్రాల యాత్రికులకు అత్యవసర సమయాల్లో ప్రాణాలు రక్షించే కమ్యూనికేషన్ సాధనంగా ఉపయోగపడుతుంది.
భారతదేశంలో శాటిలైట్ ఫోన్ల వినియోగంపై టెలికాం శాఖ కఠినమైన నిబంధనలను అమలు చేస్తోంది. కాబట్టి, ఈ ఫోన్ను ఎవరైనా సాధారణ మొబైల్ లాగా నేరుగా మార్కెట్లో కొనుగోలు చేయడానికి వీలుండదు. ఈ డివైజ్ను పొందాలనుకునే వ్యక్తులు లేదా సంస్థలు కేంద్ర ప్రభుత్వ టెలికాం శాఖ నుంచి ముందస్తుగా అధికారిక అనుమతి పత్రాన్ని తప్పనిసరిగా సమర్పించాల్సి ఉంటుంది. ముందస్తు అనుమతి లేకుండా శాటిలైట్ ఫోన్ కలిగి ఉండటం లేదా వాడటం భారతదేశ చట్టాల ప్రకారం నేరం అవుతుంది.
ఈ సరికొత్త BSNL శాటిలైట్ ఫోన్ ధర అన్ని పన్నులతో కలుపుకుని రూ. 1,34,166 గా నిర్ణయించారు. దీనిని కొనుగోలు చేయాలనుకునే వారు నేరుగా తమ సమీప BSNL కార్యాలయాన్ని సంప్రదించవచ్చు. దీనికి సంబంధించి ప్రభుత్వ మరియు వాణిజ్య అవసరాల కోసం నెలవారీ పోస్ట్పెయిడ్ ప్లాన్లను కూడా BSNL ప్రవేశపెట్టింది.
