Apple CEO Tim Cook: ప్రపంచ టెక్ దిగ్గజం ‘యాపిల్’ లాంటి కంపెనీలో ఉద్యోగం చేయాలని ప్రతీ టెకీ కోరిక. కానీ, అందరికీ ఈ అవకాశం దక్కదు. వినూత్నమైన ఆవిష్కరణలు, నాణ్యమైన ఉత్పత్తులకు చిరునామా అయిన ఈ కంపెనీలో చేరాలంటే ఎలాంటి నైపుణ్యాలు ఉండాలి..? ఏం చేస్తే ఈ దిగ్గజ కంపెనీలో అడుగుపెట్టగలం? కొత్తగా చేరాలనుకొనేవారు ఎలాంటి నైపుణ్యాలు కలిగి ఉండాలి? వంటి అంశాలపై స్వయంగా ఆ సంస్థ సీఈవో టిమ్ కుక్ ఒక సందర్భంలో వివరించారు. అవేంటో మనం ఒక సారి చూద్దాం..
‘యాపిక్ కంపెనీలో పని చేయాలంటే ప్రధానంగా ఉండాల్సింది సహకారం. పనిని షేర్ చేసుకుంటూ ఒకరికొకరు సహకరించుకుంటూ ఉండాలి. 1+1=3 అనే కాన్సెప్టు థింకింగ్ కలిగిన వారికి మొదటి ప్రాధాన్యత ఉంటుంది. ఒక్కొక్కరు వ్యక్తి గత సామర్థ్యంతో పనిచేస్తే వచ్చే ఫలితం కన్నా కలిసికట్టుగా పనిచేస్తే మెరుగైన ఫలితాలు వస్తాయి. కొత్తగా ఉద్యోగంలోకి తీసుకునే వారిలో ఈ క్వాలిటీస్ ఉన్నాయా? లేదా అనేది పరిశీలిస్తాం’ అని చెప్పారు.
కాలేజ్ డిగ్రీ అనేది తప్పనిసరా? అనే ప్రశ్నకు స్పందిస్తూ.. ‘ఈ సంస్థలో అన్ని రంగాల వారికి పని ఉంటుంది. కాలేజీ డిగ్రీ అవసరంలేని వారు కూడా మా కంపెనీలో ఉన్నారు. యాపిల్లో పనిచేసేవారికి కీలకమైన నైపుణ్యాల్లో కోడింగ్ ఒకటి. అయితే, కోడింగ్పై అవగాహనలేని వారిని కూడా కంపెనీ తీసుకుంటుంది. వారిని కోడింగ్ లేని రోజువారి కార్యకలాపాల్లో ఉపయోగించుకుంటుంది. నిత్యం నేర్చుకుంటూ.. ప్రశ్నలు అడిగేందుకు భయపడని స్వభావం ఉన్న వారిని నేను కోరుకుంటా. అలాగే, సృజనాత్మకతతో బృందంతో కలిసి పనిచేసేవారి కోసమూ అన్వేషిస్తాం’ అని వెల్లడించారు.
టిమ్ కుక్కు ఈ పుస్తకాలంటే ఎక్కువ ఇష్టమట…
*‘టు కిల్ ఏ మాకింగ్బర్డ్‘: ఈ పుస్తకం రచించింది హార్పర్ లీ. ఈ పుస్తకం అన్ని వయసులవారినీ ఆకట్టుకుంటుందని, ముఖ్యంగా విద్యార్థులు చదవాలని టిమ్ కుక్ సూచించారు.
*‘షూ డాగ్’: నైకీ కంపెనీ కో ఫౌండర్ ఫిల్ నైట్.. వారి కంపెనీ నిర్మాణం, తన వ్యక్తి గత జీవిత అనుభవాలను ఈ పుస్తకంలో పంచుకున్నట్లు పేర్కొన్నారు.
*‘వెన్ బ్రీత్ బికమ్స్ ఎయిర్’: ఈ పుస్తకం రాసింది పాల్ కళానిధి. అసాధారణమైన జ్ఞాపకాల పుట్టగా కుక్ దీన్ని అభివర్ణించారు. న్యూరో సర్జన్ అయిన కళానిధి.. అనారోగ్యం, మెడిసిన్కు సంబంధించిన అనేక విషయాలను ఇందులో పొందుపరిచాడు.
* ‘ఐయామ్ మలాలా’: ఆడ పిల్లల చదువు కోవాలని మలాలా యూసఫ్ జాయ్ చేస్తున్న పోరాటాన్ని కుక్ అభినందించారు. బ్రిటన్ జర్నలిస్ట్ క్రిస్టినా ల్యాంబ్తో కలిసి మాలాల పుస్తకం.. మాలాలా చిన్నతనం, 15 ఏళ్ల వయసులో ఆమె ఎదుర్కొన్న సవాళ్ల గురించి రాశారు.
ఈ పుస్తకాలతో పాటు ‘మార్టిన్ లూథర్ కింగ్ జూనియర్’, ‘బాబీ కెన్నెడీ’ జీవిత చరిత్ర నుంచి తాను స్ఫూర్తి పొందానని కుక్ తెలిపారు.
