Vaibhav Suryavanshi: జాక్ పాట్ కొట్టేసిన వైభవ్ సూర్యవంశీ!

Vaibhav Suryavanshi: వైభవ్ సూర్యవంశీ గురించి.. అతడి నేపథ్యం గురించి ఒక్కో ఛానల్ ఒక్కో విధంగా చెప్పడం మొదలు పెడుతోంది. ఇక యూట్యూబర్లు అయితే రకరకాల కోణాలలో వైభవ్ సూర్యవంశీ గురించి చెప్పేస్తున్నారు. ఆసక్తికరమైన కథనాలను ప్రసారం చేస్తున్నారు.. “వైభవ్ సూర్య వంశీ కష్టపడి పైకి వచ్చాడు. ఆర్థిక ఇబ్బందులను అధిగమిస్తూ క్రికెటర్ గా ఎదిగాడు. ప్రత్యర్థి జట్టులో తోపు తురం ఖాన్ లాంటి బౌలర్లు ఉన్నప్పటికీ.. ఏమాత్రం భయం అనేది లేకుండా.. దూకుడుగా ఆడుతూ తన కెరియర్ ను కొనసాగిస్తున్నాడు. అతడి ఇలాగే ఆడితే ప్రపంచ క్రికెట్ మొత్తం అతనిముందు తలవంచుతుంది. సాహో సూర్య వంశీ అంటూ నినాదాలు చేస్తుంది. ఇప్పటివరకు ప్రపంచ క్రికెట్ పై పెత్తనం సాగించిన ఆటగాళ్లు ఒక స్థాయి వయసుకు వచ్చిన తర్వాతే ఆ రికార్డు అందుకున్నారు. కానీ వైభవ్ సూర్య వంశీ నూనూగు మీసాల వయసులోనే ఆ హవా కొనసాగిస్తున్నాడు. అతడు ఇప్పుడు టీమిండియా కు వజ్రాయుధం లాగా పరిణమించాడు. త్వరలో జాతీయ జట్టులోకి ప్రవేశిస్తాడని” క్రికెట్ విశ్లేషకులు చెబుతున్నారు.

Also Read: వైభవ్ సూర్య వంశీ సూపర్ సెంచరీ.. రిషబ్ పంత్ పై ఒత్తిడి.. సంజీవ్ గోయంకా అంతర్మథనం!

ఊహించని బహుమతి

వెనుకబడిన బీహార్ రాష్ట్రం నుంచి వచ్చిన వైభవ్ సూర్య వంశీ గురించి విపరీతమైన చర్చ జరుగుతున్న నేపథ్యంలో.. ఆ రాష్ట్రానికి చెందిన నెటిజన్లు ఆనందం వ్యక్తం చేస్తున్నారు. ” మావాడు అదరగొడుతున్నాడు. ఐపీఎల్ లో సరికొత్త చరిత్ర సృష్టిస్తున్నాడు. వాస్తవానికి ఇంత చిన్న వయసులో ఈ రేంజ్ లో గుర్తింపు సాధించడం అంటే మాటలు కాదు. వైభవ్ సూర్య వంశీ అవన్నీ సులువుగా చేసేసాడు. బహుశా సెంచరీ చేసిన అతడిలో ఏమాత్రం హావభావాలు కనిపించడం లేదు అంటే.. అతడు ఇంకా చేయాల్సింది చాలా ఉంది. సాధించాల్సింది చాలా ఉంది. అందువల్లే ఇటువంటి సంకేతాలు ఇచ్చి ఉంటాడని” బీహార్ వాసులు సోషల్ మీడియాలో పేర్కొంటున్నారు. మరోవైపు బీహార్ ముఖ్యమంత్రి నితీష్ కుమార్ సూర్యవంశీ ఆట తీరుపై హర్షం వ్యక్తం చేశారు. అంతేకాదు అతడు ఆడిన ఆట అద్భుతానికే అద్భుతం అంటూ కొనియాడారు. సూర్యవంశీ బీహార్ రాష్ట్ర గౌరవాన్ని మరింత ఇనుమడించిన నేపథ్యంలో అతడికి ప్రభుత్వం తరఫున 10 లక్షల నగదు బహుమతిని ప్రకటించారు. ” బీహార్ రాష్ట్ర ఖ్యాతిని వైభవ్ సూర్య వంశీ రెట్టింపు చేశారు. గొప్ప ఇన్నింగ్స్ ఆడి అదరగొట్టారు. గొప్ప గొప్ప ఆటగాళ్లకు సాధ్యం కాని రికార్డులను అతడు సృష్టించాడు. చిన్న వయసులో ఇలాంటి అద్భుతాలు చేయడం అంటే మాటలు కాదు. అతని వల్ల బీహార్ రాష్ట్రంలో చాలామంది యువత క్రికెట్ ను కెరియర్ గా ఎంచుకుంటారనడంలో ఎటువంటి సందేహమూ లేదు. అతడి ఆట తీరు నన్ను మంత్రముగ్ధుడిని చేసింది. నాకు గొప్పగా అనిపించింది. అందువల్లే బీహార్ రాష్ట్ర ప్రభుత్వం తరఫున అతనికి 10 లక్షల నగదు బహుమతి ప్రకటించామని” నితీష్ కుమార్ సోషల్ మీడియా వేదికగా ప్రకటించారు. అంతేకాదు గతంలో వైభవ్ సూర్యవంశీని రాష్ట్ర ప్రభుత్వం తరఫున సన్మానించిన ఫోటోలను ఆయన ట్విట్టర్ ఎక్స్ లో పోస్ట్ చేశారు.