Pawan Kalyan : ఏపీలో సౌండ్ పవన్ సౌండ్ ప్రారంభమైంది. వారాహి యాత్రతో మరింతగా రీ సౌండ్ గా మారనుంది. పవన్ సీఎం కావాలన్న నినాదం మరోసారి జన సైనికుల నుంచి బలంగా వినిపిస్తోంది. పవన్ సీఎం కావాలని పార్టీ కేంద్ర కార్యాలయంలో మహా యాగానికి హైకమాండ్ శ్రీకారం చుట్టినట్టు వార్తలు వస్తున్నాయి. ఈ నెల 14 పవన్ వారాహి యాత్ర ప్రారంభానికి ముందే యాగం నిర్వహణకు అన్ని ఏర్పాట్లు జరుగుతున్నాయి. సో పవన్ యాత్రతో సీఎం నినాదం మరింతగా ప్రజల్లోకి వెళ్లనుందన్న మాట. సీఎం పదవి డిమాండ్ చేయనని.. ప్రజలు ఇస్తే మాత్రం తీసుకుంటానని పవన్ ప్రకటించడంతో కొద్దిరోజుల పాటు ఈ స్లోగన్ మరుగునపడిపోయింది. సరిగ్గా వారాహి యాత్ర ప్రారంభానికి ముందు మళ్లీ వినిపించడం విశేషం.
జన సైనికులే కాదు మెగా బ్రదర్ నాగబాబు సైతం అదే మాట చెబుతున్నారు. పవన్ సీఎం కావాల్సిందేనని తేల్చిచెబుతున్నారు. ఇటీవల ఆయన ఒక ప్రెస్ నోట్ రిలీజ్ చేస్తూ పవన్ కంటే ఏపీ ని ఆదుకునేది ఎవరు అని ప్రశ్నించారు. ఒక్క పైసా కూడా అప్పు తేకుండా ఏపీని సుభిక్షంగా పవన్ పాలించగలరు అని నాగబాబు చెబుతున్నారు.ఏపీ లో అనిశ్చితి పరిస్థితులు ఉన్నాయని…అవన్నీ గాడిన పడాలీ అంటే పవనే ఏపీ కి సీఎం కావాలని ఆయన అంటున్నారు. సంఖ్యాబలం ఆధారంగానే వచ్చే ఎన్నికల తరువాత కొత్త సీఎం వస్తారని… అది పవనే అవుతారని ఆయన చెప్పడం విశేషం. రాజకీయ విప్లవ శంఖారావంగా ఆయన వారాహి రధ యాత్రను అభివర్ణించారు.
పవన్ సీఎం నినాదాన్ని జనసేన వ్యూహాత్మకంగా తెరపైకి తెచ్చినట్టు కనిపిస్తోంది. నాగబాబు ప్రత్యేకంగా ప్రెస్ నోట్ రిలీజ్ చేసి మరీ చెప్పారంటే ఒక బలమైన కారణం అందులో దాగి ఉంది. మొత్తానికి వారాహి యాత్ర మొదలవుతున్న వేళ పవన్ సీఎం అంటూ మళ్లీ నినాదాలు ఊపందుకున్నాయి. ఇక పవన్ సీఎం కావాలని కోరుతూ జనసేన ఆఫీసు లో హోమాన్ని చేయడం కూడా ఆసక్తికరంగానే ఉంది. గతంలో రాజశ్యామల హోమం చేసి జగన్ సీఎం అయ్యాడని ప్రచారం సాగింది. ఇటీవల మరోసారి రాజశ్యామల యాగాన్ని దేవాదాయ శాఖ ఏపీ నడిబొడ్డు విజయవాడ లో నిర్వహించిన సంగతి తెలిసిందే.
సరిగ్గా వారాహి యాత్ర ప్రారంభానికి ఒకరోజు ముందు పవన్ కోసం, ఆయన ముఖ్యమంత్రి కావడం కోసం హోమం నిర్వహించడం అంటే నిజంగా ఇది ఏపీ రాజకీయ వర్గాలలో సంచలనంగా మారనుంది. దాని కి తోడు నాగబాబు పవనే సీఎం అని చెప్పడం బట్టి చూస్తూంటే పవన్ టార్గెట్ ఏంటో ఇట్టే అర్ధమవుతోంది. వారాహి యాత్రపై కూడా అంచనాలు పెరుగుతున్నాయి. పవన్ ఏ వర్గంపై టార్గెట్ చేస్తారో అన్న ఆత్రం కనిపిస్తోంది. ముఖ్యంగా వైసీపీలో నోరుపారేసుకునే నేతలపై పవన్ విరుచుకుపడే అవకాశాలు స్పష్టంగా కనిపిస్తున్నాయి.
