Rendo Pellam: మనుషులకు మాత్రమే కాదు, వ్యాపార సంస్థలకు కూడా పేర్లు ఉంటాయి. పేర్ల ఆధారంగానే ఆయా వ్యాపార సంస్థలు ప్రజల్లో ఒక బ్రాండ్ విలువను సొంతం చేసుకుంటాయి. ఒకప్పుడు వ్యాపార సంస్థలకు పేర్లను పెట్టే విషయంలో ఇప్పుడున్న స్థాయిలో వినూత్న విధానాన్ని అవలంబించేవారు కాదు. రానురాను జనాల మైండ్ సెట్ మారిన నేపథ్యంలో వ్యాపార సంస్థల పేర్లు కూడా విచిత్రంగా ఉంటున్నాయి.
నేటికాలంలో యువత వినూత్నమైన పేర్లు ఉన్న వ్యాపారసంస్థలలోనే కొనుగోళ్లు చేయడానికి ఆసక్తి చూపిస్తున్నారు. ముఖ్యంగా రెస్టారెంట్ల విషయంలో మాత్రం తమకు నచ్చిన పేరు ఉన్న వాటిల్లోనే దండిగా తినేస్తున్నారు. దీంతో క్యాచీ పేర్లు పెట్టేందుకు వ్యాపార సంస్థల నిర్వాహకులు ఆసక్తి చూపిస్తున్నారు. విశాఖపట్టణంలో ఇద్దరు వ్యక్తులు వ్యాపారసంస్థలను ఏర్పాటు చేశారు. వాటికి అత్యంత వినూత్నమైన పేర్లను పెట్టారు. దీంతో అవి సోషల్ మీడియాలో చర్చకు దారి తీస్తున్నాయి.
విశాఖపట్టణంలోని మర్రిపాలెంలో రెండో పెళ్లాం అనే పేరుతో రెస్టారెంట్ ఏర్పాటు చేశారు. దీనికి సంబంధించిన మీమ్స్ సోషల్ మీడియాలో విపరీతంగా కనిపిస్తున్నాయి. మరో వైపు ఓ పాన్ షాప్ యజమాని విచిత్రంగా తన దగ్గర లభ్యమయ్యే పదార్థాలు తింటే క్యాన్సర్ వస్తుందని పరోక్షంగా చెప్పే ప్రయత్నం చేశాడు. ఇందులో భాగంగా తన షాపునకు ది క్యాన్సర్ హబ్ అనే పేరు పెట్టాడు.
రెండో పెళ్లాం.. ది క్యాన్సర్ హబ్ అనే పేర్లు నెట్టింట చర్చకు దారి తీస్తున్నాయి. మీ వ్యాపారం జోరుగా సాగేందుకు ఇలాంటి పేర్లు పెట్టుకున్నారు. మీరు మాములోళ్లు కాదు.. మీ వ్యాపారం మరింత గొప్పగా సాగాలి.. మీరు గొప్పగా వెలుగొందాలని సోషల్ మీడియాలో కామెంట్లు వినిపిస్తున్నాయి.
