Cow Worship Tradition In India: మనదేశంలో ఆవులను దేవతలుగా పూజించే సంస్కృతి ఉంటుంది. గృహప్రవేశాల సమయంలో ఆవులనే ముందుగా ఇంట్లోకి తీసుకొస్తారు. ఆవులకు పూజలు చేసిన తర్వాతే.. గృహప్రవేశం చేస్తారు. కొన్ని జాతుల్లో అయితే వివాహాలు జరిగేటప్పుడు ఆవులకు పూజలు చేస్తారు. ఆ తర్వాత వివాహ క్రతువు మొదలుపెడతారు.
మనదేశంలో భిన్న రాష్ట్రాలు ఉన్నట్టే.. ఆయా రాష్ట్రాలలో భిన్న సంస్కృతులు ఉన్నాయి. అలాంటి సంస్కృతిని కొనసాగించే రాష్ట్రాలలో మధ్యప్రదేశ్ ప్రముఖంగా ఉంటుంది. మధ్యప్రదేశ్ రాష్ట్రంలో అటవీ గ్రామాలు అధికంగా ఉంటాయి. ఈ గ్రామాలలో రకరకాల తెగలు నివసిస్తూ ఉంటాయి. ఈ తెగలకు భిన్నమైన సాంప్రదాయాలు ఉంటాయి. అటువంటి సాంప్రదాయమే ఇది. కాకపోతే ఈ సాంప్రదాయం దేశంలోనే వింతైనది..
మధ్యప్రదేశ్ రాష్ట్రంలోని అశోక్ నగర్ జిల్లాలో చాలావరకు మారుమూల గ్రామాలు ఉంటాయి. ఈ గ్రామాలలో ఒక వింత సంప్రదాయం ఉంది. ఈ గ్రామాల పరిధిలో ఆవు గనుక చనిపోతే దాదాపు పుష్కర కాలం పాటు ఎటువంటి శుభకార్యాలు నిర్వహించరు. ముఖ్యంగా వివాహాలు చేయరు. పురాతన కాలం నుంచి ఈ సాంప్రదాయం ఇక్కడ అమల్లో ఉంది. ఒకవేళ పెళ్లి చేయాలి అనుకుంటే గ్రామాల పొలిమేర ప్రాంతాల్లో ఆ క్రతువు నిర్వహిస్తారు. ఆ తర్వాత పొలిమేరల నుంచి అమ్మాయిలను అత్తారింటికి పంపుతారు. ఒకవేళ అబ్బాయికి గనక పెళ్లి చేస్తే.. కొద్దిరోజుల పాటు బంధువుల ఇంట్లోనే ఉంచుతారు. గ్రామాలలో పెద్దలు తీసుకున్న ఈ నిర్ణయాన్ని గ్రామస్తులు మొత్తం పాటిస్తూ ఉంటారు. చివరికి ధనవంతులు కూడా వివాహాలను బయట నిర్వహిస్తారు. అయితే మొదట్లో ఈ వ్యవహారం బాగానే ఉన్నప్పటికీ.. ఆ తర్వాత ప్రతిబంధంగా మారిందని పేదలు అంటున్నారు. తమ విషయంలో ఈ ఆచారాన్ని కాస్త సడలించే విధంగా చేయాలని అక్కడి ప్రజలు కోరుతున్నారు.
ఈ ప్రాంతంలో ఆవులకు విపరీతమైన ప్రాధాన్యమిస్తారు. వాటిని ఇంట్లో సభ్యులుగా భావిస్తారు. వాటికి విశేషంగా పూజలు కూడా చేస్తారు. అందువల్లే అవి చనిపోతే ఇటువంటి శుభకార్యం నిర్వహించకూడదని పెద్దలు నిబంధనలను విధించారు. ఆ నిబంధనలు ఇప్పటికీ కొనసాగుతూనే ఉన్నాయి. కాకపోతే అత్యవసరమైన శుభకార్యాలను వేరే ప్రాంతాలలో నిర్వహిస్తున్నారు . ఆ తర్వాత పొలిమేర నుంచి బయటికి పంపిస్తున్నారు.
