Axis Bank FD Interest Rates 2026: చాలామంది తమ డబ్బును బ్యాంకులో ఫిక్స్డ్ డిపాజిట్ చేయాలని అనుకుంటారు. అయితే ఎక్కువ వడ్డీ వచ్చే బ్యాంకులో FD చేయడం వల్ల అధిక లాభాలు పొందవచ్చు. ఈ నేపథ్యంలో ప్రముఖ ప్రైవేట్ బ్యాంకు యాక్సిస్ వడ్డీరేట్ల పై సవరణలు చేసింది. ఈ సవరణలతో సీనియర్ సిటిజెన్లకు ఎన్నో ప్రయోజనాలు కలగనున్నాయి. ఆ వివరాలు లోకి వెళ్తే..
దేశంలోని ప్రముఖ ప్రైవేట్ రంగ బ్యాంకులలో ఒకటైన యాక్సిస్ బ్యాంక్ రూ. 3 కోట్ల లోపు విలువ కలిగిన ఫిక్స్డ్ డిపాజిట్ల (ఎఫ్డీ)పై వడ్డీ రేట్లను సవరించింది. బ్యాంకు అధికారిక ప్రకటన ప్రకారం.. ఈ కొత్త వడ్డీ రేట్లు జూలై 4, 2026 నుంచి అమల్లోకి వచ్చాయి. రిజర్వ్ బ్యాంక్ ఆఫ్ ఇండియా (ఆర్బీఐ) ద్రవ్య విధానం, మార్కెట్ పరిస్థితులు, నిధుల సమీకరణ అవసరాలను దృష్టిలో ఉంచుకుని బ్యాంకు ఈ నిర్ణయం తీసుకున్నట్లు తెలుస్తోంది.
తాజా సవరణల ప్రకారం, 7 రోజుల నుంచి 10 సంవత్సరాల లోపు కాలపరిమితి ఉన్న రూ. 3 కోట్ల లోపు ఫిక్స్డ్ డిపాజిట్లపై సాధారణ ఖాతాదారులకు 3.00 శాతం నుంచి గరిష్ఠంగా 6.50 శాతం వరకు వార్షిక వడ్డీ అందించనుంది. అదే సమయంలో సీనియర్ సిటిజన్లకు ప్రత్యేకంగా అదనపు వడ్డీ ప్రయోజనం కల్పిస్తూ 3.50 శాతం నుంచి గరిష్ఠంగా 7.25 శాతం వరకు వడ్డీ రేటును అందిస్తోంది.
ఈ మార్పులతో సురక్షిత పెట్టుబడులను కోరుకునే వారికి ఎఫ్డీలు మరింత ఆకర్షణీయంగా మారే అవకాశం ఉందని బ్యాంకింగ్ నిపుణులు అభిప్రాయపడుతున్నారు. ముఖ్యంగా పదవీ విరమణ చేసిన వారు, స్థిర ఆదాయాన్ని కోరుకునే పెట్టుబడిదారులు సీనియర్ సిటిజన్ ఎఫ్డీల ద్వారా అధిక రాబడిని పొందవచ్చు. అయితే వడ్డీ రేట్లు ఎఫ్డీ కాలపరిమితిని బట్టి మారుతాయని, పెట్టుబడి పెట్టే ముందు తాజా రేట్లను పరిశీలించడం అవసరమని నిపుణులు సూచిస్తున్నారు. ఇప్పటికే ఉన్న ఫిక్స్డ్ డిపాజిట్లపై ఈ కొత్త వడ్డీ రేట్లు వర్తించవు. అవి మెచ్యూరిటీ అనంతరం ఎఫ్డీని పునరుద్ధరించినప్పుడు మాత్రమే అమలులోకి వస్తాయి. పెట్టుబడిదారులు తమ ఆర్థిక లక్ష్యాలు, నగదు అవసరాలు, కాలపరిమితిని పరిగణనలోకి తీసుకుని సరైన ఎఫ్డీ పథకాన్ని ఎంచుకోవడం ద్వారా మెరుగైన లాభాలను పొందే అవకాశం ఉంటుంది.
