Chhattisgarh Bride Slaps Groom: వధువు ముస్తాబయింది. వరుడు కూడా బ్రహ్మాండంగా తయారయ్యాడు. బంధువుల రాకతో ఆ ప్రాంతం మొత్తం హడావిడిగా ఉంది. మరికొద్ది గంటల్లో పెళ్లి
. ఆ తర్వాత అక్కడ సీన్ మొత్తం మారిపోయింది. వచ్చిన బంధువులు ఆశ్చర్యానికి గురయ్యారు . కొందరైతే అలా చూస్తూ ఉండిపోయారు.
అది చత్తీస్ గడ్ రాష్ట్రంలోని జాం జాగీర్ చాంపా జిల్లా. ఇక్కడ ముస్కాన్ ప్రధాన్ అనే యువతికి వివాహం కుదిరింది. సరిగ్గా ఈనెల 24న పెళ్లి జరగాల్సి ఉంది. సరిగ్గా 23వ తేదీ రాత్రి ముస్కాన్ స్వగ్రామమైన కోసుమాండ లో పెళ్ళికొడుకు ఊరేగింపుగా వచ్చాడు. 24న వివాహానికి ముస్కాన్ తరఫు వారు ఏర్పాట్లు చేస్తున్నారు. వధువు ఇంటికి ఊరేగింపుగా వచ్చిన వరుడు.. కారు దిగడానికి ప్రయత్నిస్తూ విఫలమయ్యాడు. అంతేకాదు అతడు కనీసం కాలు తీసి కాలు వేసే అవకాశం కూడా లేదు. అతడికి వైకల్యం లేదు..
అతడు కనీసం కాలు కూడా కదపకపోవడానికి ప్రధాన కారణం వైకల్యం కాదు. ముమ్మాటికి అతడి మద్యపానం అలవాటు. పెళ్లి ఉందని తెలిసినప్పటికీ.. అతడు పీకల దాకా మద్యం తాగాడు. కనీసం అడుగు తీసి అడుగు వేసే పరిస్థితి కూడా లేదు. దీంతో అతగాడి వాలకం చూసిన ముస్కాన్.. మరో మాటకు తావు లేకుండా ఇంట్లో నుంచి బయటికి వచ్చింది. అతడి చెంప చెల్లుమనిపించింది. ఇలాంటి తాగుబోతును తాను పెళ్లి చేసుకోనని స్పష్టం చేసింది. దీంతో ఇరు వర్గాల మధ్య కొద్దిసేపు గొడవ కూడా జరిగింది. పోలీసులు రంగ ప్రవేశం చేసి.. పెళ్లి కొడుకును తన ఇంటికి పంపించారు.
ముస్కాన్ చేసిన పనిని జిల్లా ఎస్పీ విజయ్ కుమార్ అభినందించారు. అంతేకాదు నేటితరం అమ్మాయిలు ఇలానే ఉండాలని సూచించారు. ముస్కాన్ కు 5000 రూపాయల గౌరవ వేతనం ఇస్తూ కౌన్సిలర్ గా నియమించాడు. ఆమె చదువుకు తన వంతుగా సపోర్ట్ చేస్తారని ఆయన ప్రకటించారు. ప్రభుత్వానికి సంబంధించిన పథకాల ప్రచారంలో ముస్కాన్ కౌన్సిలర్ గా పని చేస్తుందని కలెక్టర్ పేర్కొన్నారు. కాగా ముస్కాన్ తండ్రి కూడా తాగుబోతు. ఆమె చిన్న వయసులోనే తండ్రి చనిపోయాడు. తల్లి కష్టపడి పెంచి ఆమెను ఇంత దాన్ని చేసింది. తనకు కాబోయే భర్త తాగుబోతు కావొద్దని ముస్కాన్ బలంగా కోరుకుంది. కానీ, తాగి వచ్చిన వాడే తాళి కట్టేందుకు సిద్ధం కావడంతో ముస్కాన్ తట్టుకోలేకపోయింది. అందుకు చెంప చెళ్లుమనిపించింది.
