TANA : సేవా కార్యక్రమాలకు ఎప్పుడూ ముందుండే ఉత్తర అమెరికా తెలుగు సంఘం (తానా) మరోసారి తన సామాజిక బాధ్యతను చాటుకుంది. అమెరికాలోని ఛార్లెట్ నగరంలో అమెరికన్ రెడ్ క్రాస్, ‘సాయి అనుగ్రహ’ సంస్థల భాగస్వామ్యంతో నిర్వహించిన రక్తదాన శిబిరం విశేష విజయాన్ని సాధించింది. తీవ్రమైన ఎండలను సైతం లెక్కచేయకుండా తెలుగు సంఘ సభ్యులు, స్థానిక దాతలు పెద్ద సంఖ్యలో పాల్గొని రక్తదానం చేయడం కార్యక్రమానికి ప్రత్యేక ఆకర్షణగా నిలిచింది.
మొదట 20 యూనిట్ల రక్త సేకరణ లక్ష్యంగా నిర్ణయించుకున్నప్పటికీ, దాతల నుంచి వచ్చిన విశేష స్పందనతో 21 మంది రక్తదాతలు ముందుకు వచ్చి 21 యూనిట్ల రక్తాన్ని దానం చేశారు. ఇందులో 19 హోల్ బ్లడ్ యూనిట్లు, 2 పవర్ రెడ్ యూనిట్లు సేకరించబడినట్లు నిర్వాహకులు వెల్లడించారు. వైద్య నిపుణుల అంచనా ప్రకారం, ఈ రక్తం ద్వారా దాదాపు 63 మంది ప్రాణాలను కాపాడే అవకాశం ఉందని తెలిపారు.
ఈ సేవా కార్యక్రమానికి తానా ఎగ్జిక్యూటివ్ వైస్ ప్రెసిడెంట్ శ్రీనివాస్ లావు, బోర్డ్ డైరెక్టర్ మల్లి వేమన, పూర్వ ఫౌండేషన్ చైర్మన్ శ్రీనివాస గోగినేని, సోషల్ వెల్ఫేర్ కోఆర్డినేటర్ సునీల్ దేవరపల్లి, అలాగే ఛార్లెట్ తానా నాయకులు రవి (నాని) వడ్లమూడి, నాగ పంచుమర్తి, ఠాగూర్ మల్లినేని, కిరణ్ కొత్తపల్లి, మాధురి ఏలూరి తదితరులు హాజరై రక్తదాతలను అభినందించారు. సమాజానికి అవసరమైన సమయంలో ముందుకొచ్చిన ప్రతి దాత నిజమైన ప్రాణదాతేనని వారు కొనియాడారు.
కార్యక్రమ విజయానికి సహకరించిన అమెరికన్ రెడ్ క్రాస్, సాయి అనుగ్రహ సంస్థలకు తానా నాయకత్వం ప్రత్యేక కృతజ్ఞతలు తెలిపింది. ముఖ్యంగా ఈ కార్యక్రమం విజయవంతం కావడంలో కీలకంగా వ్యవహరించిన ఎం.ఆర్.కె. కిషోర్ సేవలను ప్రత్యేకంగా ప్రశంసించింది.
అలాగే ఎండను లెక్కచేయకుండా రక్తదాతలకు స్వాగతం పలకడం, రిజిస్ట్రేషన్ ప్రక్రియను సమన్వయం చేయడం, కార్యక్రమం మొత్తం సజావుగా సాగేలా కృషి చేసిన వాలంటీర్ల సేవలను నాయకులు అభినందించారు. సమాజానికి అవసరమైన సమయంలో రక్తదానం చేయడం ద్వారా మానవత్వాన్ని చాటిన ప్రతి దాతకు, కార్యక్రమాన్ని విజయవంతం చేసిన నిర్వాహకులకు తానా నాయకులు హృదయపూర్వక ధన్యవాదాలు తెలిపారు.
“ఒక్క యూనిట్ రక్తం… మూడు ప్రాణాలకు జీవం” అనే సందేశాన్ని మరోసారి కార్యరూపంలో చూపించిన ఈ రక్తదాన శిబిరం, ఛార్లెట్ తెలుగు సమాజంలో సేవా భావానికి నిలువెత్తు నిదర్శనంగా నిలిచింది.
