Furniture Rental: కొత్తగా ఉద్యోగంలో చేరిన చేరిన వారు.. రకరకాల కారణాల వల్ల నిత్యం నగరాలకు వలస వెళ్లే వారికి ఇంటి సామగ్రిని సమకూర్చుకోవడం పెద్ద ప్రయాసే. అద్దె ఇల్లు అయినా రిఫ్రిజిరేటర్, వాషింగ్ మెషీన్ తదితర వస్తువుల అవసరం తప్పని సరి. అయితే వీటిని కొత్తగా కొనుగోలు చేయాలంటే భారీ మొత్తంలో డబ్బు ఖర్చవుతుంది. కానీీ కొంతకాలానికే ఉద్యోగం మారినా, బదిలీ అయినా వాటిని మరో నగరానికి తరలించడం కూడా అదనపు ఖర్చుతో కూడుకున్న వ్యవహారం. ఇలాంటి సమస్యలకు పరిష్కారంగా ఇప్పుడు ఫర్నిచర్, గృహోపకరణాలను నెలవారీ అద్దెకు తీసుకునే విధానం నగరాల్లో ప్రాచుర్యం పొందుతోంది. అసలు ఎలాంటి గృహోపకరణాలు అద్దెకు ఇస్తారు? ఇవి లాభమేనా?
నగరాల్లో రెడీమేడ్ హౌస్ తో పాటు అందుబాటులో గృహోపకారణాలు అద్దెకు తీసుకోవడం ప్రస్తుతం ట్రెండి గా మారింది. ఇంటికి అవసరమయ్యే బెడ్, సోఫా వంటి ఫర్నిచర్ తోపాటు వాషింగ్ మెషీన్, రిఫ్రిజిరేటర్, టెలివిజన్, ఎయిర్ కండిషనర్, మైక్రోవేవ్ ఓవెన్, వాటర్ ప్యూరిఫైయర్, గీజర్ వంటి గృహోపకరణాలను కూడా అద్దెకు తీసుకునే అవకాశం ఉంది. అలాగే బెడ్, మ్యాట్రెస్, వార్డ్రోబ్, సోఫా, సెంటర్ టేబుల్, డైనింగ్ టేబుల్, కుర్చీలు, స్టడీ టేబుల్, ఆఫీస్ చైర్ వంటి ఫర్నిచర్ను కూడా ఎంపిక చేసుకోవచ్చు. కొన్ని సంస్థలు కిచెన్ అప్లయెన్సెస్, ఎలక్ట్రానిక్ వస్తువులు, ఇంటీరియర్ అవసరాలను కూడా అద్దె ప్యాకేజీల్లో అందిస్తున్నాయి.
ఆయా వస్తువులను బట్టి ధరలను నిర్ణయించారు. నగరాలు, ప్రాంతాలను బట్టి ఒక్కో ప్రాంతంలో ఒక్కోరకంగా ఉన్నాయి. ఉదాహరణకు బెడ్ లేదా మ్యాట్రెస్కు సుమారు రూ.300నుంచి 800, స్టడీ టేబుల్ లేదా కుర్చీకి రూ.200 నుంచి 500, సోఫాకు రూ.700 నుంచి 2,000, రిఫ్రిజిరేటర్కు రూ.800 నుంచి2,000, వాషింగ్ మెషీన్కు రూ.700 నుంచి 1,500 వరకు నెలవారీ అద్దె ఉండొచ్చు.
కొందరు గదిని అద్దెకు తీసుకొని ఇతర వస్తువులను ప్రత్యేకంగా సమకూర్చుకుంటుండగా . మరికొందరు మాత్రం గదిలో ఉండే వస్తువులతో అద్దెకు తీసుకుంటున్నారు. దీనినే స్టూడియో అపార్ట్మెంట్ ప్యాకేజీ అని అంటారు. ఈ ప్యాకేజీ లో బెడ్, మ్యాట్రెస్, వార్డ్రోబ్, సోఫా, టేబుల్, కుర్చీ, ఫ్రిజ్, వాషింగ్ మెషీన్ వంటి అవసరమైన వస్తువులను కలిపి అందించవచ్చు. ఇలాంటి ప్యాకేజీలు ఉద్యోగం కోసం కొత్త నగరానికి వెళ్లిన సింగిల్స్ లేదా దంపతులకు ఉపయోగకరంగా ఉంటాయి.
అయితే అద్దెకు తీసుకున్న వస్తువులు పాడైపోతే ఎవరి బాధ్యత ఉంటుంది? అన్న సందేహం చాలామందికి రావచ్చు. అద్దెకు తీసుకునేటప్పుడే కాంట్రాక్టర్ తో ఏర్పరచుకున్న ఒప్పందం ప్రకారం ఈ వస్తువుల బాధ్యత ఉంటుంది. సాధారణ వినియోగాలకు వస్తువులు చిన్నపాటి మరమ్మతులు ఉంటే అద్దె ఇచ్చే వారే భరిస్తారు. కానీ వినియోగదారుడి నిర్లక్ష్యం వల్ల వస్తువు దెబ్బతింటే రిపేర్ లేదా రీప్లేస్మెంట్ ఖర్చు చెల్లించాల్సి రావచ్చు. అందుకే ఒప్పందంలో ‘డ్యామేజ్ పాలసీ’ ఏమిటో ముందుగానే చదవాలి. వస్తువు డెలివరీ సమయంలో దాని పరిస్థితిని ఫొటోలు లేదా వీడియో తీసి ఉంచుకోవడం కూడా మంచిదే.
ప్రస్తుత కాలంలో చాలామంది నగరాలకు వలస వస్తుంటారు. ఇలాంటివారు ఉద్యోగాలు బదిలీ అయితే ఇతర ప్రాంతాలకు వెళుతుంటారు. వీరికి ఈ రెంటల్ ఎంతో ఉపయోగకరం.ఉదాహరణకు ఒక వ్యక్తి కేవలం ఒకటి లేదా రెండు సంవత్సరాలు మాత్రమే ఒక నగరంలో ఉండబోతే, లక్షల రూపాయలు పెట్టి వస్తువులు కొనుగోలు చేయడం కంటే నెలవారీ అద్దె చెల్లించడం సౌకర్యంగా ఉంటుంది. అలాగే డెలివరీ, ఇన్స్టాలేషన్, మెయింటెనెన్స్ వంటి సేవలు కూడా లభిస్తే అదనపు బాధ్యత తగ్గుతుంది.
అయితే ఎక్కువ కాలం ఒకే వస్తువును ఉపయోగించాల్సి ఉంటే అద్దె మొత్తం చివరికి కొనుగోలు ధరను మించిపోయే అవకాశం ఉంది. ఉదాహరణకు ఒక వస్తువును 4 నుంచి 5 సంవత్సరాలు అద్దెకు తీసుకుంటే, ఆ కాలంలో చెల్లించిన మొత్తం దాని కొత్త ధరకు సమానంగా లేదా అంతకంటే ఎక్కువగా ఉండొచ్చు.
