Father : ప్రతి తండ్రి పిల్లల గురించి గొప్పగా ఆలోచిస్తాడు. తమ పిల్లలకు బెస్ట్ ఇవ్వాలి అనుకుంటాడు. ఉన్నంతలో సంతోషంగా ఉంచాలి అనుకుంటాడు. వారు అడిగిందల్లా కొనివ్వాలి అనుకుంటాడు. కానీ.. తండ్రి అంటే చాక్లెట్స్, బొమ్మలు కొని పెట్టేవాడు మాత్రమే కాదు పిల్లలకు మానసిక, భావోద్వేగ మద్దతు ఇవ్వడం కూడా చాలా ముఖ్యం. ఇదంతా పక్కన పెడితే పిల్లలకు తండ్రి ఇవ్వాల్సిన బహుమతులు కొన్ని ఉంటాయి. మరి అవేంటంటే?
పిల్లలకు తండ్రి ఇవ్వాల్సినవేంటి..?
1.సమయం..
నేను సంపాదించేది నా పిల్లల కోసమే అంటూ డబ్బు లేకపోతే వాళ్లకు ఏం ఇవ్వాలి అని చాలా మంది పిల్లలకు సమయం కూడా ఇవ్వరు. డబ్బు పిల్లలకు అవసరమే కావచ్చు. కానీ తండ్రి సమయం కంటే గొప్పది కాదు కదా. డబ్బులు లేకపోయినా మళ్లీ సంపాదించవచ్చు. కానీ సమయం పోతే సంపాదించలేం. గడిచిపోయిన సమయం మళ్లీ తిరిగి రాదు. అందుకే వారి కోసం సమయం ఇవ్వడం చాలా ఇంపార్టెంట్. వారికి తోడుగా ఉండాలి. చదువు, ఆటలు, మాటలు వంటి వాటిల్లో పక్కన ఉండటం మస్ట్. తండ్రి పక్కన ఉండటం వల్ల వారి ఆత్మవిశ్వాసం పెరుగుతుంది. తండ్రితో బంధం బలపడుతుంది.
2.అమితమైన ప్రేమ..
పిల్లలకు తండ్రి అమితమైన ప్రేమ, ఆప్యాయత, ముద్దులు వంటివి కచ్చితంగా ఇవ్వాల్సిందే. తండ్రి ప్రేమ, ముద్దులు పిల్లల మానసిక ఆరోగ్యాన్ని, భద్రతా భావాన్ని పెంచుతాయి అంటున్నారు నిపుణులు. ఆత్మగౌరవం పెరిగి, జీవితంలో సవాళ్లు ఎదుర్కొనేందుకు సిద్ధం అవుతాయి.
3. జీవిత నైపుణ్యాలు నేర్పించడం
పిల్లలకు పుస్తకాలకంటే, సిలబస్ కంటే నేర్చుకోవాల్సినవి చాలా ఉంటాయి అని గుర్తు పెట్టుకోవాలి. తండ్రి వారికి ఆత్మస్థైర్యం, సమస్య పరిష్కారం, కష్టపడి పనిచేయడం వంటివి నేర్పించాలి. ఇలాంటి నైపుణ్యాలు వారి భవిష్యత్తుకు, వృద్ధికి తోడ్పడతాయి.
4. మార్కుల వెంట పరిగెత్తకండి
పిల్లల మార్కులే వారి విలువను నిర్ణయిస్తాయి అనుకోవడం చాలా తప్పు. తల్లిదండ్రులు పిల్లలను మార్కుల ఆధారంగానే చూడటం మానుకోవాలి. పిల్లల నిజమైన విజయం వారి కష్టంలో, ప్రవర్తనలో ఉందని గుర్తించాలి. పిల్లల విలువ మార్కుల్లో కాదు, వారి ప్రయత్నంలో ఉంటుందని వారికి నేర్పించాలి.
5. తండ్రి ఆదర్శం
తండ్రి పిల్లలకు మొదటి హీరోగా భావిస్తారు. భావించాలి కూడా. తండ్రిని చూసి పిల్లలు పెద్ద కలలు కనడం కామన్. తండ్రి ఎల్లప్పుడూ పిల్లలకు ఆదర్శంగా, ప్రేరణగా నిలవడం కూడా చాలా అవసరం. దీనివల్ల పిల్లలు తండ్రిలా ఉండాలని కలలు కనడం వల్ల వారి ఆత్మవిశ్వాసం పెరుగుతుంది.
6. భావోద్వేగ స్థిరత్వం, భద్రత కల్పించడం
తండ్రి పిల్లలకు భావోద్వేగ స్థిరత్వం, భద్రత కల్పించడంలో ముందు ఉండాలి. తోడు, మద్దతు, ప్రేమ పిల్లలకు జీవిత సమస్యలు, భావోద్వేగాలు ఎదుర్కోవడానికి అవసరం అవుతాయి. తండ్రి ప్రేమ, మద్దతుతో ఏ కష్టాన్నైనా ఎదుర్కోవచ్చని, కుటుంబం ఎల్లప్పుడూ వెన్నంటే ఉంటుందని పిల్లలు నేర్చుకోవడం చాలా ముఖ్యం. ఇది మీరే నేర్పించాలి.
