Aadhaar card update online: ఆధార్ కార్డు ప్రస్తుతం ప్రతి భారతీయుడికి అత్యంత ముఖ్యమైన గుర్తింపుగా మారింది. బ్యాంకు ఖాతాలు, సిమ్ కార్డులు, ప్రభుత్వ పథకాలు, పాన్ కార్డు లింకింగ్ వంటి అనేక సేవలకు ఆధార్ తప్పనిసరిగా మారింది. దీంతో ఆధార్లో ఉన్న వివరాలు ఎప్పటికప్పుడు సరిగా ఉండటం చాలా అవసరం. అంతేకాకుండా మొబైల్ నెంబర్లు, అడ్రస్ మారిన సమయంలో దీనిని అప్డేట్ చేసుకోవడం చాలా ముఖ్యం. అయితే ఎన్నో పనుల కారణంగా బీజీగా ఉండేవారు ప్రత్యేకంగా ఆధార్ సెంటర్ కు వెళ్లకుండా ఇంట్లోనే మొబైల్ లో ఈ పనులు చేసుకునే సదుపాయం ఉంది. ఎలాగో ఈ స్టెప్స్ ద్వారా తెలుసుకోడి..
అడ్రస్ మార్చుకోవాల్సి వస్తే..:
ఆధార్లో అడ్రస్ను మార్చుకోవడానికి తప్పనిసరిగా ఆధార్ సెంటర్కు వెళ్లాల్సిన అవసరం లేదు. మీ మొబైల్ లేదా కంప్యూటర్ ద్వారా ఇంట్లో నుంచే ఆన్లైన్లో అడ్రస్ అప్డేట్ చేసుకోవచ్చు. ఇందుకోసం ఆధార్కు ఇప్పటికే లింక్ అయిన మొబైల్ నంబర్ పనిచేస్తూ ఉండాలి. ఆ నంబర్కు వచ్చే OTP ద్వారా లాగిన్ అయి అవసరమైన అడ్రస్ ప్రూఫ్ డాక్యుమెంట్ను అప్లోడ్ చేసి మార్పు కోసం దరఖాస్తు చేయవచ్చు. ముందుగా MyAadhaar పోర్టల్లోకి వెళ్లాలి. అక్కడ ఆధార్ నంబర్ నమోదు చేసి OTP ద్వారా లాగిన్ కావాలి. అనంతరం ‘Update Aadhaar Online’ ఎంపికను ఎంచుకుని కొత్త అడ్రస్ వివరాలను నమోదు చేయాలి. తర్వాత అడ్రస్కు సంబంధించిన ధ్రువీకరణ పత్రాన్ని అప్లోడ్ చేసి నిర్ణీత ఫీజు చెల్లించాలి. దరఖాస్తు సమర్పించిన తర్వాత మీకు ఒక SRN నంబర్ వస్తుంది. దాని ద్వారా స్టేటస్ను ట్రాక్ చేసుకోవచ్చు.
మొబైల్ నంబర్ మార్పు అయితే..
చాలామందికి ఉన్న సందేహం ఏమిటంటే మొబైల్ నంబర్ను కూడా ఇంట్లో నుంచే మార్చుకోవచ్చా..? అనేది. ప్రస్తుతం ఆధార్లో మొబైల్ నంబర్ అప్డేట్ లేదా కొత్త నంబర్ జోడింపు సేవను పూర్తిగా ఆన్లైన్లో అందించడం లేదు. భద్రతా కారణాల దృష్ట్యా ఈ ప్రక్రియను బయోమెట్రిక్ ధ్రువీకరణతో మాత్రమే నిర్వహిస్తున్నారు. ఆధార్కు లింక్ అయిన నంబర్ పోయినా లేదా కొత్త నంబర్ జోడించాలన్నా సమీపంలోని ఆధార్ ఎన్రోల్మెంట్ లేదా అప్డేట్ సెంటర్కు వెళ్లాలి. అక్కడ ఆధార్ కార్డు చూపించి వేలిముద్రలు లేదా ఐరిస్ స్కాన్ ద్వారా గుర్తింపు ధ్రువీకరించిన తర్వాత కొత్త మొబైల్ నంబర్ నమోదు చేస్తారు. సాధారణంగా కొన్ని రోజుల్లో ఆ నంబర్ ఆధార్కు లింక్ అవుతుంది.
అయితే ప్రస్తుతం UIDAI అందిస్తున్న ఆన్లైన్ సేవల ద్వారా ప్రధానంగా అడ్రస్ వంటి కొన్ని వివరాలను మాత్రమే అప్డేట్ చేసుకునే అవకాశం ఉంది. అయితే మొబైల్ నంబర్, బయోమెట్రిక్స్, ఫోటో వంటి సున్నితమైన వివరాల మార్పులకు వ్యక్తిగతంగా కేంద్రాన్ని సందర్శించాల్సి ఉంటుంది. ఆధార్కు లింక్ అయిన మొబైల్ నంబర్ యాక్టివ్గా ఉంటే అనేక సేవలను ఇంట్లో నుంచే సులభంగా పొందవచ్చు. అందుకే మొబైల్ నంబర్ మారిన వెంటనే ఆధార్లో అప్డేట్ చేయించుకోవడం మంచిది. అలాగే అడ్రస్ మారినప్పుడు ఆలస్యం చేయకుండా ఆన్లైన్ ద్వారా సవరించుకుంటే భవిష్యత్తులో ప్రభుత్వ సేవలు పొందడంలో ఎలాంటి ఇబ్బందులు ఎదురుకావు.
