ration card cancellation : తెలంగాణలో రేషన్ కార్డుల కథ ‘పాతదానిని పారేసి, కొత్తదానిని తెచ్చుకోవడం’ లాగా తయారైంది. ప్రభుత్వం కొత్త కార్డులు ఇస్తామని ఊరిస్తోంది కానీ అంతకంటే ముందే పాత కార్డులను ‘శుద్ధి’ చేసే పనిలో పడింది. ఇకపై రేషన్ తీసుకోవడం అంటే కేవలం హక్కు కాదు.. అదొక నిబంధన! వరుసగా ఆరు నెలలు రేషన్ బియ్యం తీసుకోకపోతే.. మీ కార్డు అడ్రస్ గల్లంతయినట్టే.
బియ్యం తీసుకోకపోతే పాపమా?
ప్రభుత్వం సన్నబియ్యం ఇస్తుంటే జనాలు అవి తీసుకుని అమ్ముకుంటున్నారని కొందరు అధికారుల కంప్లైంట్. ఆ బియ్యం తీసుకుని తినకుండా పక్కదారి పట్టిస్తే, మీ కార్డుకు పక్కదారి పట్టించే అధికారం ప్రభుత్వానికి ఉందంటున్నారు.
ప్రభుత్వం దృష్టిలో రేషన్ తీసుకోకపోతే మీరు ‘అనర్హులు’. కార్డులను తగ్గించి, రేషన్ ఖర్చును తగ్గించుకోవడమే ఇందులో ఉన్న పెద్ద పారదర్శకత. పాతవారు బియ్యం తినడం మానేస్తే ఆ బియ్యం కొత్త వారికి పెట్టి, కొత్త కార్డులు ఇస్తారన్నమాట!
క్షేత్రస్థాయి రిపోర్టుల గోల
మండలాల వారీగా తహసీల్దార్లు రిపోర్టులు తయారు చేస్తున్నారు. ఆరు నెలలుగా బియ్యం లాగిన్ ఓపెన్ చేయని వారిని ‘టార్గెట్’ చేస్తున్నారు. “మాకు రేషన్ బియ్యం వద్దు, మా సొంత బియ్యమే నయం” అనుకునేవారికి ఇప్పుడు ప్రభుత్వం హెచ్చరిక జారీ చేసింది.
రేషన్ తీసుకోవడం అంటే కేవలం బియ్యం పొందడం కాదు, ప్రభుత్వం ఇచ్చే బియ్యాన్ని తిని తీరాలనే నియమాన్ని పాటిస్తేనే మీ కార్డు బతుకుతుంది. లేకపోతే… కార్డు దేవుడా!
