Anil Kumar Yadav : వైయస్సార్ కాంగ్రెస్ పార్టీలో మాజీ మంత్రి అనిల్ కుమార్ యాదవ్ విచిత్ర పరిస్థితులు ఎదుర్కొంటున్నారు. ఆయనకు నాయకత్వ బాధ్యతలు ఇచ్చేందుకు జగన్మోహన్ రెడ్డి పెద్దగా ఆసక్తి చూపడం లేదు. దీంతో అనిల్ కుమార్ యాదవ్ పరిస్థితి రోజురోజుకు దిగజారుతోంది. సొంత నియోజకవర్గంలో శుభకార్యాలకు, ప్రైవేట్ కార్యక్రమాలకు మాత్రమే ఆయన పరిమితం అవుతున్నారు. పార్టీ కార్యాలయాలతో పాటు అధికారిక కార్యక్రమాల విషయంలో ఆయనకు పిలుపు లేదు. అందుకే ప్రైవేట్ సమావేశాల పేరుతో ఆయన కాలం వెల్లదీస్తున్నారు. జగన్మోహన్ రెడ్డి సైతం చూసి చూడనట్టుగా ఉన్నారు. దీంతో ఈ మాజీ మంత్రి ఎటూ తేల్చుకోలేకపోతున్నారు.
* నరసరావుపేటలో ఓటమి..
మొన్నటి ఎన్నికల్లో నరసరావుపేట పార్లమెంట్ స్థానం నుంచి పోటీ చేసి ఓడిపోయారు అనిల్ కుమార్ యాదవ్. కానీ తర్వాత పెద్దగా కనిపించిన దాఖలాలు లేవు. నరసరావుపేటలో రాజకీయాలు చేయడం అనిల్ కుమార్ యాదవ్ కు ఇష్టం లేదు. అలాగని తన సొంత నియోజకవర్గం నెల్లూరు సిటీలో రాజకీయం చేస్తామంటే జగన్మోహన్ రెడ్డి అనుమతి ఇవ్వడం లేదు. అక్కడ ఇప్పటికే పర్వత రెడ్డి చంద్రశేఖర్ రెడ్డి ఒదిగిపోతున్నారు. ఆయన కోసమే జగన్మోహన్ రెడ్డి అనిల్ కుమార్ యాదవ్ విషయంలో ఆలోచన పడ్డారని తెలుస్తోంది. అనిల్ నెల్లూరు సిటీకి వస్తున్నారు కానీ పార్టీ కార్యాలయానికి రావడం లేదు. పార్టీ కార్యక్రమాల్లో పాల్గొనడం లేదు. కార్యకర్తల ఇళ్లల్లో శుభకార్యాలకు హాజరవుతున్నారు. అక్కడే ప్రైవేటు సమావేశాలు నిర్వహిస్తున్నారు.
* రెడ్డి సామాజిక వర్గం హెచ్చరికలతో..
సామాజిక లెక్కపరంగానే అనిల్ కుమార్ యాదవ్ ను నెల్లూరుకు దూరంగా ఉంచాలని జగన్మోహన్ రెడ్డి భావిస్తున్నట్లు తెలుస్తోంది. అనిల్ యాదవ్ వైఖరి మూలంగా రెడ్డి సామాజిక వర్గం నేతలు వైసీపీలో ఇబ్బంది పడ్డారు. అటువంటి నేతలంతా సైకిల్ ఎక్కారు. నెల్లూరు జిల్లాలో వైసీపీకి అంత డ్యామేజ్ జరగడానికి రెడ్డి సామాజిక వర్గం నేతల పట్ల నిర్లక్ష్యం.. అనిల్ కుమార్ యాదవ్ కు ప్రాధాన్యం ఇవ్వడం అని జగన్మోహన్ రెడ్డి తెలుసుకున్నారు. మరోసారి నెల్లూరులో అనిల్ కుమార్ యాదవ్ కు చాన్స్ ఇస్తే ఊరుకునేది లేదని ఇప్పటికే రెడ్డి సామాజిక వర్గం జగన్మోహన్ రెడ్డిని హెచ్చరించినట్లు తెలుస్తోంది. అందుకే జగన్మోహన్ రెడ్డి పక్కన పెట్టినట్లు సమాచారం. మొన్నటి ఎన్నికలకు మాదిరిగా.. 2029 ఎన్నికల్లో ఏదో ఒక చోట సర్దుబాటు చేస్తారే తప్ప.. నెల్లూరు బాధ్యతలు ఇవ్వరు అన్న ప్రచారం పొలిటికల్ వర్గాల్లో ఉంది. మరి అందులో ఎంత వాస్తవం ఉందో చూడాలి.
