Vijay government collapse: తమిళనాడులో కొత్త ప్రభుత్వం ఏర్పడి పది రోజులు కూడా పూర్తి కాలేదు. కొత్త ప్రభుత్వంలో మంత్రులు శాఖలు స్వీకరించి.. ఇంకా వాటిపై పట్టు కూడా సాధించలేదు. ఆదిలోనే హంస పాదులాగా అపశకునాలు.. శాపనార్ధాలు మొదలైపోయాయి. దీంతో తమిళనాడు రాజకీయాలలో ఏం జరుగుతుందో అర్థం కావడం లేదు.
తమిళనాడులో టీవీకే పార్టీకి అన్నా డీఎంకే చీలికవర్గం, కమ్యూనిస్టులు, కాంగ్రెస్, ఐయూఎంఎల్ వంటి పార్టీలు ఫ్లోర్ టెస్టులో సపోర్ట్ తెలిపాయి. దీంతో టీవీకే అధినేత విజయ్ కి ఎటువంటి ఇబ్బందులు లేకుండా పోయాయి. ఫ్లోర్ టెస్ట్ ముందు విజయ్ కొంతమంది ఎమ్మెల్యేలకు సోఫాలను పంపించారని వార్తలు వచ్చాయి. సోఫాలను పంపించిన తీరు పుష్ప సినిమా మాదిరిగానే ఉందని మీడియాలో వార్తలు వచ్చాయి. అవి నిజంగానే సోఫాలేనా.. ఇంకా ఏమైనా ఉన్నాయా అని డీఎంకే నేతలు ఆరోపించారు. ఈ ఆరోపణలను పక్కన పెడితే విజయ్ ముఖ్యమంత్రిగా ఎన్నిక కావడానికి.. ఫ్లోర్ టెస్ట్ పాస్ కావడానికి అనేక రకాలుగా ఇబ్బందులు పడ్డారు. మొత్తానికి విజయం సాధించారు.
విప్లవాత్మక నిర్ణయాలతో.. వివాదాస్పద అంశాలతో విజయ్ ప్రతిరోజు మీడియాలో పతాక శీర్షికలో కనిపిస్తున్నారు. కొత్త ప్రభుత్వానికి ప్రతిపక్షం ఆరు నెలల పాటు సమయం ఇస్తుంది. దీనిని హనీమూన్ పీరియడ్ అంటారు. ఆ తర్వాత ఎటాక్ మొదలు పెడుతుంది. తమిళనాడులో డీఎంకే అధినేత స్టాలిన్ కూడా ఇటీవల కాలంలో ఇదే మాట చెప్పారు. ఆయన ఓడిపోయిన తర్వాత సొంత నియోజకవర్గం లో ప్రజలను కలుసుకున్నారు. ఓటమిని హుందాగా స్వీకరించారు. అయితే ఇప్పుడు ఆయన స్వరం పెంచారు. డీఎంకే నాయకుల సమావేశంలో స్టాలిన్ మాట్లాడారు. టీవీకే ప్రభుత్వం త్వరలోనే కూలిపోతుందని హెచ్చరించారు. పార్టీ నాయకులు ముందస్తు ఎన్నికలకు సిద్ధం కావాలని పిలుపునిచ్చారు. అంతకుముందు ఓ వివాహ వేడుకకు స్టాలిన్ హాజరయ్యారు. అక్కడ కూడా ఆయన రాజకీయపరమైన అంశాలను తెరపైకి తీసుకొచ్చారు. విజయ్ ప్రభుత్వంపై పరోక్షంగా విమర్శలు చేశారు. విజయ్ ఇన్ స్టా గ్రామ్ రాజకీయాలు చేశారని.. ప్రజలకు ఏదో చేస్తామని భ్రమలు కల్పించి అధికారంలోకి వచ్చారని ఆరోపించారు.
స్టాలిన్ ఆరోపణల నేపథ్యంలో తమిళనాడులో రాజకీయాలు ఆసక్తికరంగా మారాయి. ఓటమినేపద్యంలో స్టాలిన్ ఏవేవో మాట్లాడుతున్నారని.. విజయ్ ప్రభుత్వానికి ఇబ్బంది లేదని.. మ్యాజిక్ ఫిగర్ కంటే కూడా ఎక్కువ బలం ఉందని టీవీకే నేతలు స్పష్టం చేస్తున్నారు. విజయ్ నాయకత్వం మీద నమ్మకం ఉంది కాబట్టి డీఎంకే నేతల్లో కొంతమంది సపోర్ట్ చేస్తున్నారని.. దీనిని జీర్ణించుకోలేక స్టాలిన్ ఇష్టం వచ్చినట్టు మాట్లాడుతున్నారని టీవీకే నేతలు అంటున్నారు.
