TDP Janasena First List: టిడిపి,జనసేన తొలి జాబితాను ప్రకటించాయి. పొత్తులో భాగంగా జనసేనకు 24 అసెంబ్లీ స్థానాలతో పాటు మూడు పార్లమెంట్ స్థానాలు ఇచ్చేందుకు టిడిపి అంగీకరించింది. టిడిపి 94 మంది అభ్యర్థులను ప్రకటించగా.. జనసేన ఐదుగురు అభ్యర్థులను ఖరారు చేస్తూ పేర్లు ప్రకటించింది. అయితే రెండు పార్టీల్లోనూ అసంతృప్తులు బయటపడ్డాయి. కానీ వాటిని అధిగమించే ప్రయత్నాలు చేస్తున్నారు. అయితే రెండు పార్టీలకు చెందిన కీలక నేతలు ప్రాతినిధ్యం వహిస్తున్న చోట మాత్రం ఇబ్బందికర పరిస్థితులు ఎదురవుతున్నాయి. సీటు తమకంటే తమకే నంటూ వారు పోటాపోటీగా ప్రకటనలు చేస్తున్నారు. దీంతో ఒక రకమైన గందరగోళం నెలకొంటుంది.
పొత్తులో భాగంగా రాజమండ్రి రూరల్ నియోజకవర్గాన్ని జనసేన కోరుతోంది. అక్కడి నుంచి జనసేన కీలక నేత కందుల దుర్గేష్ పోటీ చేయాలని చూస్తున్నారు. పవన్ సైతం రాజమండ్రి రూరల్ జనసేనదేనని తేల్చి చెప్పారు. అయితే అక్కడ టిడిపి సిట్టింగ్ ఎమ్మెల్యే గోరంట్ల బుచ్చయ్య చౌదరి ఉన్నారు. ఆయన పొలిట్ బ్యూరో సభ్యుడే కాదు.. టిడిపి వ్యవస్థాపక సభ్యుడు కూడా. తన సీటును వేరెవరికి ఎలా ఇస్తారని ఆయన గట్టిగానే ప్రశ్నించారు. ఆ సీటు విషయంలో చంద్రబాబు విజ్ఞప్తి మేరకు పవన్ పునరాలోచించారు. ఆ సీటు బదులు జనసేనకు నిడదవోలు ఇస్తుందని.. అక్కడ నుంచి పోటీ చేయాలని దుర్గేష్ కు పవన్ సూచించినట్లు వార్తలు వస్తున్నాయి. ఈ లెక్కన దాదాపు రాజమండ్రి రూరల్ లో బుచ్చయ్య చౌదరి పోటీ చేసేందుకు దాదాపు మార్గం సుగమం అయ్యింది.
అయితే ఈ నియోజకవర్గ ఒక కొలిక్కి వచ్చిందనగా.. తెరపైకి భీమిలి నియోజకవర్గం వచ్చి పడింది. పొత్తులో భాగంగా భీమిలిని జనసేనకు కేటాయిస్తారని ప్రచారం జరుగుతోంది. ఈ సీటు పై గంటా శ్రీనివాసరావు ఆశలు పెట్టుకున్నారు.ఇదే విషయాన్ని చంద్రబాబు దృష్టికి తీసుకెళ్లారు. అయితే చంద్రబాబు మాత్రం చీపురుపల్లి నుంచి పోటీ చేయాలని గంటాకు సూచించారు. కానీ గంటా శ్రీనివాసరావు అందుకు సుముఖంగా లేరు. తనకు భీమిలి సీటు కేటాయించాలని కోరుతున్నారు. అందుకోసమే భీమిలి నియోజకవర్గం నుంచి జనసేనను తప్పించి.. వేరే నియోజకవర్గాన్ని కేటాయిస్తారని ప్రచారం జరుగుతోంది. అయితే ఇప్పటికే రాజమండ్రి రూరల్ విషయంలో జనసేన త్యాగం చేసిందని.. బలం ఉన్న భీమిలిని వదులుకోవడం కష్టమేనని జనసేనలో టాక్ నడుస్తోంది. అయితే పవన్ కు గంటా సన్నిహిత నేత. ఆపై న్యాయం చేస్తానని చంద్రబాబు హామీ ఇచ్చారు. దీంతో పవన్ జనసేన సీటును తప్పకుండా వదులుకుంటారని పొలిటికల్ వర్గాల్లో చర్చ నడుస్తోంది. అదే నిజమైతే విశాఖలో భీమిలి స్థానంలో జనసేనకు కేటాయించే నియోజకవర్గం ఏమిటి అన్న ప్రశ్న ఉత్పన్నమవుతోంది. దీనిపై ఒకటి రెండు రోజుల్లో క్లారిటీ రానుంది.
