ఆంధ్రప్రదేశ్ లో ఉద్యోగులకు జీతాలు, ఫించన్లు ఇవ్వలేనంతగా ఆర్థిక సంక్షోభంలోకి కూరుకుపోయిందా? ఇంతటి ఆర్థిక విపత్తును జగన్ సర్కార్ దాస్తోందా? అంటే ఔననే అంటున్నారు సోము వీర్రాజు. ఏపీ బీజేపీ అధ్యక్షుడు తాజాగా సంచలన వ్యాఖ్యలు చేశారు. ఏపీలో ఆర్థిక పరిస్థితిపై శ్వేతపత్రం విడుదల చేయాలని ఆయన డిమాండ్ చేశారు. జీతాలు, పెన్షన్లు కూడా ఇవ్వలేని స్థితికి దిగజారిన ఏపీ ఆర్థిక పరిస్థితిపై ఆయన ఆందోళన వ్యక్తం చేశారు. ఏపీకి దేశంలో అప్పులు పుట్టని దీనస్థితి ఉందని.. వెంటనే రాష్ట్ర ఆర్థిక పరిస్థితిపై ఒక శ్వేతపత్రాన్ని విడుదల చేయాలని కోరారు.
రెండేళ్లుగా వచ్చే ఆదాయాన్నంతా నవరత్నాల అమలుకోసం పప్పుబెల్లాల్లా పంచుకుంటూ పోతూ ఒక్క ఇటుకను పేర్చకుండా చేసిన ఘనత జగన్ ప్రభుత్వానిదే అని సోము వీర్రాజు నిప్పులు చెరిగారు. ఒక పక్క అభివృద్ధి అనే మాటే వినబడకుండా ఉంటే చేసిన అప్పులు ఏమౌతున్నాయో అనేది అంతుబట్టని రహస్యంగా మారిపోయిందన్నారు.
ఉద్యోగులకు జీతాలు, పెన్షన్లు ఇవ్వలేకుంటే, మరోపక్క రిజర్వుబ్యాంకు అప్పులు ఇవ్వని పరిస్థితి ఏర్పడటం ఆర్థిక సంక్షోభాన్ని తలపిస్తోందని సోము వీర్రాజు విమర్శలు గుప్పించారు. లాక్ డౌన్ కాలంలో సైతం కేంద్రం రాష్ట్రానికి పెద్దఎత్తున వైద్యసహాయం, ఆర్ధిక సహాయం చేసిందని చెప్పారు. పంచాయతీలకు పెద్దఎత్తున నిధులు విడుదల చేసి గ్రామీణాభివృద్ధికి కేంద్రం కృషి చేస్తోందన్నారు. అలాగే లక్షల కోట్ల నిధులతో ఇళ్ల నిర్మాణం, రహదారులు, పోర్టుల అనుసంధానం, స్మార్ట్ సిటీలు, పారిశ్రామిక కారిడార్లు విద్యుత్, మంచినీరు, పారిశుధ్యం, విద్యాసంస్థలు, ప్రభుత్వాసుపత్రుల నిర్మాణానికి చేస్తున్న పనులన్నీ కేంద్రం ఇచ్చే నిధులతో జరుగుతుండగా మరి రాష్ట్ర ప్రభుత్వం ఏం చేస్తుందని ప్రశ్నించారు.
ఏపీ రాష్ట్రానికి వస్తున్న ఆదాయంతో పాటు తెచ్చిన అప్పల్లో రూపాయి కూడా అభివృద్ధికి ఖర్చుచేయకుండా సంక్షేమానికే కేటాయించడం వల్ల ఆర్ధిక క్రమశిక్షణ గాడి తప్పిందని జగన్ సర్కార్ తీరును సోము వీర్రాజు ఎండగట్టారు. ఇలాంటి ఆర్ధిక సంక్షోభం చరిత్రలో చూడలేదని తక్షణం పరిస్థితిని చక్కదిద్దాలన్నారు. ప్రస్తుత ఆర్థిక పరిస్థితి పై శ్వేతపత్రం విడుదలచేయాలని డిమాండ్ చేశారు
