New Delhi Tragedy
New Delhi Tragedy : గత శనివారం రాత్రి న్యూఢిల్లీ రైల్వే స్టేషన్‌లో జరిగిన తొక్కిసలాటలో 18 మంది ప్రయాణికులు మరణించారు. దాదాపు 30మంది ప్రయాణికులు గాయపడ్డారు. 10మంది ఆస్పత్రిలో తీవ్ర గాయాలతో చికిత్స పొందుతున్నారు. ప్రయాగ్‌రాజ్‌కు వెళ్లేందుకు న్యూఢిల్లీ రైల్వే స్టేషన్‌లోని 14, 15 ప్లాట్‌ఫారమ్‌లపై భారీ సంఖ్యలో ప్రయాణికులు గుమిగూడారు. సమాచారం ప్రకారం.. రెండు రైళ్ల ఆలస్యం కారణంగా ప్రయాణీకులందరూ ప్రయాగ్‌రాజ్‌కు వెళ్లడానికి ప్లాట్‌ఫారమ్‌పై ఉన్న ఇతర రైళ్ల వైపుకు వెళ్లారు. అప్పుడు అకస్మాత్తుగా తొక్కిసలాట జరిగింది. దీనిలో 18 మంది మరణించారు. రైల్వేలు ప్లాట్‌ఫామ్‌ను ఎప్పుడు, ఎందుకు మారుస్తాయో అందుకు సంబంధించిన నియమాల గురించి ఈ కథనంలో తెలుసుకుందాం.
ఏంటి విషయం?
శనివారం రాత్రి 9.45 గంటల ప్రాంతంలో మహా కుంభమేళా సందర్భంగా సంగంలో స్నానం చేయడానికి వెళ్తున్న పెద్ద సంఖ్యలో ప్రయాణికులు న్యూఢిల్లీ రైల్వే స్టేషన్‌కు చేరుకున్నారు. ఇప్పటివరకు అందిన సమాచారం ప్రకారం, ప్రయాగ్‌రాజ్‌కు వెళ్లే రైళ్ల ప్లాట్‌ఫామ్‌లను రైల్వేలు మార్చాయి. ఈ సమాచారం అందిన తర్వాత ప్రయాణీకులందరూ 14, 15 ప్లాట్‌ఫారమ్‌ల వైపు వేగంగా కదలడం ప్రారంభించారు. అకస్మాత్తుగా మెట్ల ఓ ప్రయాణికుడు పడిపోవడంతో అతడి వెంట అంతా ఒక్కసారిగా కుప్పకూలారు. దీంతో అక్కడ తొక్కిసలాట జరిగింది. ఈ సంఘటనలో చాలా మంది ప్రయాణికులు నేలపై పడిపోయారు. కొంతమంది తమ ప్రాణాలను కాపాడుకోవడానికి అక్కడి నుండి బలవంతంగా పారిపోయేందుకు ప్రయత్నించారు. సంఘటన జరిగిన వెంటనే అక్కడికి చేరుకున్న రైల్వే భద్రతా సిబ్బంది గాయపడిన వారిని లోక్ నాయక్ జైప్రకాష్ ఆసుపత్రికి తరలించారు, అక్కడ వైద్యులు 18 మంది మరణించినట్లు ప్రకటించారు. వీరిలో ముగ్గురు పిల్లలు ఉన్నారు, మరో 30 మంది తీవ్రంగా గాయపడ్డారు. వారికి చికిత్స కొనసాగుతోంది.
విచారణకు రైల్వే ఆదేశాలు
ఈ సంఘటనకు సంబంధించి డీసీపీ మల్హోత్రా కూడా సమాచారం ఇచ్చారు. ప్రయాగ్‌రాజ్ ఎక్స్‌ప్రెస్ రాక కారణంగా న్యూఢిల్లీ రైల్వే స్టేషన్‌లోని ప్లాట్‌ఫామ్ 14 వద్ద పెద్ద సంఖ్యలో జనం గుమిగూడారు. అదే సమయంలో, స్వతంత్ర సేనాని ఎక్స్‌ప్రెస్, భువనేశ్వర్ రాజధాని రైళ్ల రాకపోకలలో ఆలస్యం జరిగింది. ఆ తరువాత ఈ రైళ్లలోని ప్రయాణీకులు 12, 13, 14 ప్లాట్‌ఫామ్‌లపై కూడా ఉన్నారు. ఈ విషయంపై రైల్వే ఉన్నత స్థాయి విచారణకు ఆదేశించింది.
రైల్వేలు ప్లాట్‌ఫామ్‌ను ఎప్పుడు మార్చగలవు?
ఇప్పుడు ప్రశ్న ఏమిటంటే రైల్వేలు ప్లాట్‌ఫామ్‌లో ఎప్పుడు మార్పులు చేస్తుంటాయని.. ప్లాట్‌ఫారమ్‌ను మార్చడానికి రైల్వేలకు పూర్తిగా స్వేచ్ఛ ఉంది. నిబంధనల ప్రకారం, ఏదైనా సాంకేతిక లోపం, రైళ్ల కదలికలో ఆలస్యం, రైలు పట్టాలపై సమస్య లేదా మరేదైనా ఇతర సమస్య తలెత్తితే, రైల్వే ప్లాట్‌ఫారమ్ మార్పును ప్రకటించవచ్చు. ఇది మాత్రమే కాదు, రైల్వేలు రైళ్లను రద్దు చేయడానికి కూడా పూర్తి స్వేచ్ఛ ఉంటుంది.