Operation Kalnemi real story:ఆపరేషన్ సిందూర్.. ఇటీవల పాకిస్తాన్ ఉగ్రవాదులను మట్టుపెట్టేందుకు భారత్ చేపట్టిన ఆపరేషన్ ఇది. ఇక ఆపరేషన్ కగార్.. ప్రస్తుతం ఇది దేశంలో కొనసాగుతోంది. 2026 నాటికి మావోయిస్టులు లేకుండా చేయడమే లక్ష్యంగా కేంద్రం ఈ ఆపరేషన్ కొనసాగిస్తోంది. ఆపరేషన్ కాలనేమి కూడా దేశంలోని ఒక రాష్ట్రంలో జరుగుతోంది.
దేవభూమిగా గుర్తింపు పొందిన రాష్ట్రం ఉత్తరాఖండ్. ప్రస్తుతం ఈ రాష్ట్రంలో చార్ధామ్, కావడి యాత్రలు జరుగుతున్నాయి. అనేక పుణ్యక్షేత్రాలకు కొలువై ఉన్న ఉత్తరాఖండ్లో కొన్నేళ్లుగా నకిలీ బాబాల బెడద పెరిగింది. ఈ నకిలీ సాధువులు భక్తులను మోసం చేస్తూ డబ్బులు వసూలు చేస్తున్నారు. కొందరిని బెదిరిస్తున్నారు. కొందరిని దూషిస్తున్నారు. ఈ సాధువుల్లో కొందరు బంగ్లాదేశ్కు చెందినవారు ఉన్నారు. వీరు రహస్యంగా ఉగ్రకార్యకలాపాలకు మద్దతు ఇచ్చే ప్రమాదం ఉంది. ఈ నేపథ్యంలో దేశ భద్రత మరియు ఆధ్యాత్మిక సామరస్యాన్ని కాపాడటానికి పుష్కర్సింగ్ ధామి ప్రభుత్వం ఈ ఆపరేషన్ కాలనేమి చేపట్టింది.
Also Read: అహ్మదాబాద్ విమాన ప్రమాదానికి పైలెట్ తప్పిదమే కారణం? కాక్ పీట్లో ఏం జరిగిందంటే!
పురాణం నుంచి ప్రేరణ..
కాలనేమి అనేది రామాయణంలోని ఒక రాక్షసుడి పేరు, రావణుడి ఆదేశంతో సాధువు వేషంలో హనుమంతుడిని మోసం చేయడానికి ప్రయత్నించిన వ్యక్తి. హనుమంతుడు అతని మోసాన్ని గుర్తించి సంహరించాడు. ఈ పురాణ కథ నుంచి ప్రేరణ పొంది, ఉత్తరాఖండ్ ప్రభుత్వం ‘ఆపరేషన్ కాలనేమి‘ అనే పేరును ఎంచుకుంది. ఇది సాధువుల వేషంలో మోసాలు చేసే వ్యక్తులను గుర్తించి, చట్టపరమైన చర్యలు తీసుకోవడానికి ఉద్దేశించబడింది.
భక్తుల విశ్వాసంపై నకిలీ సాధువుల దాడి..
ఉత్తరాఖండ్లో, ముఖ్యంగా చార్ధామ్ యాత్ర, కావడి యాత్ర సమయంలో, నకిలీ సాధువులు భక్తులను మోసం చేస్తున్నారు. వీరు డబ్బు కోసం భక్తులను బెదిరిస్తూ, తప్పుదారి పట్టిస్తూ, శాపనార్థాలు పెడుతున్నారు. ఈ మోసాలు భక్తుల విశ్వాసాన్ని దెబ్బతీస్తూ, సనాతన ధర్మం పవిత్రతను కలుషితం చేస్తున్నాయి. ఈ సమస్యను గుర్తించిన ఉత్తరాఖండ్ ప్రభుత్వం, ముఖ్యమంత్రి పుష్కర్ సింగ్ ధామి ఆధ్వర్యంలో, ఈ మోసగాళ్లను అరికట్టేందుకు ఆపరేషన్ కాలనేమిని ప్రారంభించింది.
నకిలీ పట్టివేత..
ఆపరేషన్ కాలనేమి ద్వారా ఒక్క రోజులోనే 127 మంది నకిలీ సాధువులను అరెస్టు చేశారు. వీరిలో ఒక బంగ్లాదేశీయుడు కూడా ఉన్నాడు. ఈ వ్యక్తుల వద్ద నకిలీ ఆధార్ కార్డులు స్వాధీనం చేయబడ్డాయి, ఇది దేశ భద్రతకు సంబంధించిన ఆందోళనలను లేవనెత్తింది. ఈ చర్యలు డెహ్రాడూన్, హరిద్వార్, ఉధమ్ సింగ్ నగర్ జిల్లాలలో నిర్వహించబడ్డాయి. ఈ ఆపరేషన్ గతేడాది నుంచి ఉత్తరప్రదేశ్లో కూడా కొనసాగుతోంది.
Also Read: ఇక మీదట అద్దె కాదు.. ఈఎంఐ కట్టండి.. పీఎఫ్ తో సొంతింటి కల సాకారం
దేశ భద్రతకు కీలకమైన ఆపరేషన్..
ఈ ఆపరేషన్ కేవలం మతపరమైన మోసాలను అరికట్టడానికి మాత్రమే కాకుండా, దేశ భద్రతను రక్షించడానికి కూడా ఉద్దేశించబడింది. నకిలీ గుర్తింపు కార్డుల ఉనికి, బంగ్లాదేశీ నాగరికుడి అరెస్టు అక్రమ ఇమ్మిగ్రేషన్, ఉగ్రవాద కార్యకలాపాలకు సంబంధించిన ఆందోళనలను లేవనెత్తాయి. గతంలో గుజరాత్లో 550 మంది బంగ్లాదేశీ అక్రమ ఇమ్మిగ్రెంట్ల అరెస్టు ఈ సమస్య తీవ్రతను సూచిస్తుంది. ముఖ్యమంత్రి పుష్కర్ సింగ్ ధామి ఈ ఆపరేషన్ను ఏ మతానికి పరిమితం చేయకుండా, మోసాలు చేసే ఎవరిపైనా కఠిన చర్యలు తీసుకుంటామని స్పష్టం చేశారు.
