PM Modi: దేశ రాజకీయాలలో విజయాన్ని నిర్ణయించేది కేవలం ప్రచారం కాదు, చాతుర్యమైన వ్యూహమే. దీనిని మరోసారి నిరూపించారు ప్రధాని నరేంద్ర మోదీ. రాజకీయాల్లో హత్యలు ఉండవు, ఆత్మహత్యలే జరుగుతాయని అనలిస్టులు అంటారు. ఈ వ్యాఖ్య మోదీ ఎదుగుదలకు సరైన నిర్వచనం. ఇతర పార్టీలు చేసిన పొరపాట్లను ఆయుధాలుగా మార్చుకుని ఆయన ప్రతిసారీ ప్రజా భావనను తనవైపు తిప్పుకున్నారు.
జాతీయత వాదమే ఎజెండాగా..
2014లో జాతీయ రాజకీయాల్లో మోదీ అడుగు పెట్టినప్పటినుంచి కాంగ్రెస్ నిర్లక్ష్యం చేసిన అంశాలకే కొత్త ప్రాణం పోశారు. తాజాగా శుక్రవారం నిర్వహించిన వందేమాతరం 150 ఏళ్ల వేడుక కూడా అదే వ్యూహాత్మక దృష్టితో చూడాలి. కాంగ్రెస్ స్పందించని అంశాన్ని మోదీ ప్రజాభిమానంగా, స్వాభిమానంగా మార్చేశారు. భావోద్వేగాలను కదిలించడం అంటే ఇదే. ఇందులో మోదీ దిట్ట.
మరచిన నేతలనూ గుర్తు చేసేలా..
సర్దార్ వల్లభభాయ్ పటేల్, ప్రణబ్ ముఖర్జీ, కర్పూరి ఠాకూర్ వంటి నేతలు కాంగ్రెస్ పాలనలో దశాబ్దాల అనుబంధం ఉన్నవారే. అయినా వారి వారసత్వాన్ని బీజేపీ అద్భుతంగా వినియోగించుకుంది. పటేల్ను ‘‘దేశ ఏకత్వం రూపకర్త’’గా మోదీ ముందు వరుసలో నిలబెట్టారు. ఆయనకు ఘన నివాళిగా గుజరాత్లో నిర్మించిన ‘స్టాచ్యూ ఆఫ్ యూనిటీ’ దేశవ్యాప్తంగా రాజకీయ సంభాషణగా మారింది. ఒక విగ్రహం మాత్రమే కాదు, అది మోదీ బ్రాండ్ రాజకీయాల సింబల్గా నిలిచింది. ఇక గాంధీ కుటుంబానికి అత్యంత సన్నిహితుడైన ప్రణబ్ ముఖర్జీకి భారతరత్న ప్రకటించడం మోదీ శైలిలోని ఒక మైండ్ గేమ్. ఈ నిర్ణయం పశ్చిమ బెంగాల్ ఓటర్ల గుండెల్లో జాతీయతా భావనను తట్టిలేపింది. ఆ ప్రభావం ఎన్నికల్లో కనిపించింది. కాంగ్రెస్ చేయలేని సానుభూతిని బీజేపీ సంపాదించింది.
బిహారీల మనసు దోచేలా..
బిహార్ రాజకీయాలను ప్రభావితం చేసిన మరో నిర్ణయమిది. కర్పూరి ఠాకూర్కు భారతరత్న ప్రకటించడం ద్వారా మోదీ, ఓటర్ల గొప్ప వర్గమైన ఈబీసీలను ఆకట్టుకున్నారు. సామాజిక న్యాయం, సమాన అవకాశాలు అనే నినాదం చుట్టూ బలమైన రాజకీయ లాభాన్ని సాధించారు. కాంగ్రెస్ ఈ తరహా నాయకుల వారసత్వాన్ని ముందుకు తీసుకురాలేకపోవడమే వారి బలహీనతగా నిలిచింది.
వందేమాతరం సెంటిమెంట్..
జాతీయ గీత స్థాయిలో వందేమాతరం ప్రాధాన్యం స్వాతంత్రోద్యమంలో కీలక నినాదంగా మారింది. ఈ నినాదంతోనే అనేక పోరాటాలు జరిగాయి. దానిని కాంగ్రెస్ చెప్పుకోవడం మానేసింది. మోదీ ఇప్పుడు దీనినే నూతన రాజకీయ చిహ్నంగా మార్చుకున్నారు. గీతం రచించి 150 ఏళ్లు పూర్తయిన సందర్భంగా నిర్వహించిన ఈ వేడుకలో ఆయన స్వయంగా హాజరై జాతీయ గౌరవాన్ని మళ్లీ బలపరిచారు. జాతీయతను తన రాజకీయ గుర్తింపుగా మలచడంలో ఇది మరో మైలురాయి.
రాజకీయాల్లో ప్రతినాయకత్వం కంటే సంకల్పం, సమయానుసారమైన వ్యూహం కీలకం. మోదీ దానిని నిరూపించారు. ఆయన ప్రణాళికలు విజయం సాధిస్తే, కాంగ్రెస్కు విఫల నిర్ణయాలే మిగిలాయి. అది వ్యక్తిత్వ పోటీ కాదు, వ్యూహాల పోరాటం అని ఈ రాజకీయ పాఠం గుర్తు చేస్తోంది
