Job Market : సాఫ్ట్‌వేర్ కలలకు బ్రేక్.. సీఎస్ గ్రాడ్యుయేట్లకు కఠినంగా మారుతున్న ఉద్యోగ మార్కెట్!

Job Market : ఒకప్పుడు కంప్యూటర్ సైన్స్ (CS) చదివితే మంచి జీతంతో ఉద్యోగం గ్యారంటీ అన్న నమ్మకం ఉండేది. లక్షల మంది యువత ఇంజినీరింగ్, ముఖ్యంగా సీఎస్ కోర్సుల వైపు మొగ్గు చూపడానికి ఇదే ప్రధాన కారణం. అయితే, అమెరికా నుంచి వస్తున్న తాజా నివేదికలు ఈ నమ్మకానికి భిన్నమైన వాస్తవాలను వెల్లడిస్తున్నాయి. చాలా మంది సీఎస్ గ్రాడ్యుయేట్లు తమకు తగిన ఉద్యోగాలు పొందడానికి తీవ్రంగా ఇబ్బంది పడుతున్నారని ఈ డేటా స్పష్టం చేస్తోంది. ఒకప్పుడు ‘గేట్‌వే టు సక్సెస్’గా భావించిన సీఎస్ డిగ్రీ, ఇప్పుడు ఎందుకు సవాళ్లను ఎదుర్కొంటోందో తెలుసుకుందాం.

న్యూస్‌వీక్ నివేదిక ప్రకారం.. న్యూయార్క్ ఫెడరల్ రిజర్వ్ బ్యాంక్ డేటా ఆధారంగా చూస్తే కాలేజీ డిగ్రీల్లో అత్యధిక నిరుద్యోగ రేటు ఉన్న విభాగాలలో కంప్యూటర్ సైన్స్ ఏడవ స్థానంలో ఉంది. దీని నిరుద్యోగ రేటు 6.1శాతం. ఇది ఫిజిక్స్ (7.8శాతం), ఆంత్రోపాలజీ (9.4శాతం) వంటి విభాగాల కంటే కొంచెం వెనుక ఉంది. కంప్యూటర్ ఇంజినీరింగ్ వంటి సంబంధిత రంగాల్లో కూడా నిరుద్యోగం పెరుగుతోంది. ఇక్కడ నిరుద్యోగ రేటు 7.5శాతంగా ఉంది. ఇది ప్రస్తుత ఉద్యోగ మార్కెట్‌లో టెక్ గ్రాడ్యుయేట్ల కోసం నిజమైన డిమాండ్ ఎంత ఉందనే దానిపై ఆందోళనలను పెంచుతోంది. దీనికి విరుద్ధంగా న్యూట్రిషన్ సైన్సెస్, కన్‌స్ట్రక్షన్ సర్వీసెస్, సివిల్ ఇంజినీరింగ్ వంటి విభాగాల్లో నిరుద్యోగ రేటు గణనీయంగా తక్కువగా ఉంది. కొన్నింటిలో 0.4శాతానికి కూడా తగ్గింది.

Also Read : జాబ్‌ మార్కెట్‌ ట్రెండ్స్‌: రాబోయే ఐదేళ్లలో 90 మిలియన్ల ఉద్యోగాలు మాయం.. ప్రపంచ ఆర్థిక వేదిక షాకింగ్‌ రిపోర్ట్‌!

నివేదిక ఒక విస్తృత ధోరణిని కూడా వెల్లడిస్తుంది. ఇటీవలి గ్రాడ్యుయేట్లలో నిరుద్యోగం పెరుగుతోంది. ఫిబ్రవరి నాటికి, నిరుద్యోగ భృతి పొందుతున్న జనరేషన్ Z (Gen Z) గృహాల సంఖ్య గత ఏడాదితో పోలిస్తే 32శాతం పెరిగింది. ఇది యువత ఉద్యోగ భద్రత విషయంలో ఆందోళనలను మరింత పెంచుతోంది. హెచ్ఆర్ కన్సల్టెంట్ బ్రయాన్ డ్రిస్కోల్ న్యూస్‌వీక్‌తో మాట్లాడుతూ.. కంప్యూటర్ సైన్స్ డిగ్రీ విజయానికి హామీ అని చాలా మంది విద్యార్థులు నమ్ముతారని చెప్పారు. కానీ వాస్తవానికి, తీవ్రమైన పోటీ, పరిమిత ఉద్యోగ అవకాశాలు, పెరుగుతున్న విద్యార్థి అప్పులు వంటివి అడ్డంకులుగా మారాయని ఆయన తెలిపారు. ఉద్యోగులు అభ్యర్థి నైపుణ్యాల కంటే వారి నేపథ్యం లేదా అల్మా మేటర్ (చదువుకున్న సంస్థ)పై ఎక్కువ దృష్టి పెడుతున్నారని కూడా ఆయన చెప్పారు.

ఈ అంచనాలు కొన్ని డిగ్రీల విలువ గురించి ఉన్న అవగాహనకు, వాస్తవ ప్రపంచ ఉద్యోగ ఫలితాలకు మధ్య పెరుగుతున్న వ్యత్యాసాన్ని స్పష్టం చేస్తున్నాయి. ఇది మారుతున్న ఉద్యోగ మార్కెట్లో మరింత కెరీర్ కౌన్సెలింగ్ అవసరాన్ని సూచిస్తుంది. విద్యార్థులు కోర్సును ఎంచుకునేటప్పుడు, మార్కెట్ డిమాండ్‌ను, తమ నైపుణ్యాలను నిరంతరం మెరుగుపరుచుకోవాల్సిన ఆవశ్యకతను అర్థం చేసుకోవడం చాలా ముఖ్యం.