IIT Ramaiah and Narayana Murthy: భారతదేశంలో విద్య, వ్యాపార రంగాల్లో కొందరు వ్యక్తులు తమ సూత్రాలకు, నీతి నియమాలకు కట్టుబడి ఉన్నత రాజకీయ ఒత్తిళ్లను సైతం తిరస్కరించిన సందర్భాలు చరిత్రలో నిలిచాయి. ఐఐటీ రామయ్య, బిట్స్ పిలానీ యాజమాన్యం, ఇన్ఫోసిస్ వ్యవస్థాపకుడు నారాయణ మూర్తి వంటి వ్యక్తులు తమ సంస్థల పవిత్రతను, నాణ్యతను ఇప్పటికీ కాపడడంలో వారి దృఢ చింతన ఉంది. పాలకుల నుంచి ఒత్తిడి ఎదురైనా తమ సిద్ధాంతాలను వదులుకోలేదు. ఈ దిగ్గజాల నిర్ణయాలు సమాజానికి ఒక స్ఫూర్తిగా నిలుస్తాయి.
ఐఐటీ రామయ్య.. నాణ్యతకు నిలువెత్తు నిదర్శనం..
చుక్కా రామయ్య, ఐఐటీ రామయ్యగా ప్రసిద్ధి చెందిన విద్యావేత్త, విద్యార్థులకు ఐఐటీ ప్రవేశ పరీక్షలకు శిక్షణ ఇచ్చే సంస్థను నడుపుతారు. ఆయన విద్యా సంస్థలో సీటు సాధించడం అంటే ఐఐటీలో సీటు గ్యారంటీ అనే నమ్మకం విద్యార్థులు, తల్లిదండ్రుల్లో ఉంది. ఈ నమ్మకం వెనుక రామయ్య కఠినమైన ఎంపిక ప్రక్రియ, నాణ్యత పట్ల నిబద్ధత ఉన్నాయి. ఏటా పదివేల మంది విద్యార్థులు ఆయన నిర్వహించే పరీక్షకు హాజరవుతారు, కానీ కేవలం 100 మందిని మాత్రమే ఎంపిక చేస్తారు. ఒకసారి ఉమ్మడి ఆంధ్రప్రదేశ్ ముఖ్యమంత్రి చంద్రబాబు నాయుడు ఒక విద్యార్థిని రామయ్య సంస్థలో చేర్పించాలని సిఫారసు చేశారు. అయితే, రామయ్య ఈ సిఫారసును తిరస్కరించారు. కారణం నాణ్యతను రాజీ పరచడం తన సంస్థ సిద్ధాంతాలకు విరుద్ధం. ఈ నిర్ణయం రామయ్య విద్యా రంగంలో నీతి, నిజాయితీలకు నిదర్శనం. అధికార ఒత్తిళ్లకు లొంగకుండా, తమ సంస్థ యొక్క ఖ్యాతిని, నాణ్యతను కాపాడుకోవడం ద్వారా రామయ్య విద్యారంగంలో ఒక ఆదర్శంగా నిలిచారు.
సిద్ధాంతాలకు కట్టుబడిన బిట్స్ పిలానీ యాజమాన్యం
బిట్స్ పిలానీ, భారతదేశంలో అత్యుత్తమ విద్యా సంస్థలలో ఒకటి, తన కఠినమైన ప్రవేశ విధానాలకు ప్రసిద్ధి. ఒకసారి దివంగత ప్రధానమంత్రి ఇందిరా గాంధీ తమ కేబినెట్ సహచరుని కుమారుడికి సీటు కావాలని బిట్స్ యాజమాన్యాన్ని కోరారు. అయితే, యాజమాన్యం ఈ అభ్యర్థనను సున్నితంగా తిరస్కరించింది. సంస్థ యొక్క నియమ నిబంధనలను ఉల్లంఘించడం తమకు ఆమోదయోగ్యం కాదని స్పష్టం చేసింది. అయితే, యాజమాన్యం ఒక ప్రతిపాదన ముందుకు తెచ్చింది. ప్రధానమంత్రి కోటా కింద సీట్లు కేటాయించే విధానాన్ని ప్రవేశపెడతామని తెలిపింది. ఈ ప్రతిపాదనను ఇందిరా గాంధీ తిరస్కరించారు. సిస్టమ్ను మార్చడం వల్ల భవిష్యత్తులో అనేకమంది అధికారులు, నాయకులు సీట్ల కోసం ఒత్తిడి చేయవచ్చని, దీనివల్ల సంస్థ నాణ్యత దెబ్బతినవచ్చని ఆమె సున్నితంగా వివరించారు.
ఇన్ఫోసిస్ నారాయణ మూర్తి.. టాలెంట్కు ప్రాధాన్యం
ఇన్ఫోసిస్ వ్యవస్థాపకుడు నారాయణ మూర్తి కూడా తన సంస్థ నీతి నియమాలకు కట్టుబడిన వ్యక్తిగా పేరు తెచ్చుకున్నారు. ఒకసారి దివంగత ముఖ్యమంత్రి వైఎస్. రాజశేఖరరెడ్డి తనకు తెలిసిన ఒక వ్యక్తి కుమారుడికి ఇన్ఫోసిస్లో ఉద్యోగం ఇవ్వాలని కోరారు. నారాయణమూర్తి ఆ వ్యక్తిని ఇంటర్వ్యూకు పిలిచి, అతని నైపుణ్యాలను పరిశీలించారు. ఇంటర్వ్యూ తర్వాత, ఆ వ్యక్తి టాలెంట్ ఆధారంగా రూ.30 వేల నుంచి రూ.40 వేల వేతనం మాత్రమే ఇస్తామని తెలిపారు. అది కూడా అతని ఇంటికే పంపుతాము కానీ, జాబ్ ఇవ్వలేమని స్పష్టం చేశారు. ఈ సమాధానం రాజశేఖరరెడ్డికి విషయాన్ని అర్థమయ్యేలా చేసింది. ఆయన వెంటనే సిఫారసు చేసిన వ్యక్తిని పిలిచి, నైపుణ్యం లేని వారిని సిఫారసు చేయడం వల్ల తన పరువుకు భంగం కలుగుతుందని మందలించారు. నారాయణ మూర్తి ఈ నిర్ణయం టాలెంట్, నైపుణ్యాలకు ఇచ్చే ప్రాధాన్యతను, రాజకీయ ఒత్తిళ్లకు లొంగని వైఖరిని స్పష్టం చేస్తుంది.
ఈ మూడు సంఘటనలు ఒక ముఖ్యమైన సందేశాన్ని అందిస్తాయి. సంస్థాగత నీతి, నాణ్యత, సూత్రాలకు కట్టుబడి ఉండటం దీర్ఘకాలంలో సంస్థ యొక్క విజయానికి, గౌరవానికి దోహదపడుతుంది. రామయ్య, బిట్స్ పిలానీ, నారాయణమూర్తి వంటి వ్యక్తులు, సంస్థలు అధికార ఒత్తిళ్లను ఎదిరించి, తమ సిద్ధాంతాలను కాపాడుకున్నారు. ఈ సంఘటనలు విద్య, వ్యాపార రంగాల్లో యువతకు, సమాజానికి స్ఫూర్తిగా నిలుస్తాయి.
