NTR National Award : యుగపురుషుడు ఎన్టీఆర్ శతజయంతి ఉత్సవాలు ఘనంగా నిర్వహిస్తున్నారు. కొద్దిరోజుల క్రితం విజయవాడ వేదికగా భారీ సభ ఏర్పాటు చేశారు. తమిళ సూపర్ స్టార్ రజినీకాంత్ ఈ ఉత్సవాలకు అతిథిగా హాజరయ్యారు. ఎన్టీఆర్ తో తనకున్న అనుబంధాన్ని గుర్తుచేసుకున్నారు. తెలంగాణ గడ్డపై అంతకు మించి అట్టహాసంగా నిర్వహించాలని టీడీపీ వర్గాలు పూనుకున్నాయి. రాజకీయ నాయకులతో పాటు టాలీవుడ్ ప్రముఖులను ఆహ్వానించారు. టాలీవుడ్ టాప్ స్టార్స్ అందరినీ ఆహ్వానించారు. ఇటీవల వేడుకగా నిర్వహించారు..
కారణజన్ముడు ఎన్టీఆర్ శత జయంతిని పురస్కరించుకుని “తెలుగు సినిమా వేదిక”తో కలిసి “ఫిల్మ్ అండ్ టెలివిజన్ ప్రమోషన్ కౌన్సిల్ ఆఫ్ ఇండియా” ఈనెల 28న (ఎన్టీఆర్ జయంతి నాడు) ఎన్టీఆర్ లెజెండరీ నేషనల్ అవార్డ్స్ ప్రదానం చేస్తోంది. పలు రంగాలకు చెందిన లబ్ధ ప్రతిష్టులు పాలుపంచుకునే ఈ వేడుక హైదరాబాద్ లోని, ఎల్.వి ప్రసాద్ ఆడిటోరియంలో అత్యంత ఘనంగా జరగనుంది.
నటుడిగా, నాయకుడిగా భారత దేశ చరిత్రలో తిరుగులేని ముద్ర వేసిన ఎన్టీఆర్ ను సంస్మరించుకుంటూ ప్రదానం చేస్తున్న ఈ ప్రతిష్టాత్మక అవార్డుకు జర్నలిజం విభాగంలో “సీనియర్ ఫిల్మ్ జర్నలిస్ట్” ధీరజ అప్పాజీని ఏకగ్రీవంగా ఎంపిక చేసినట్లు… “ఎఫ్.టి.పి.సి ఇండియా” అధ్యక్షులు చైతన్య జంగా తెలిపారు. “తెలుగు సినిమా వేదిక” అధ్యక్షుడు వీస్ వర్మ పాకలపాటి ఈ మేరకు ఒక ప్రకటనలో తెలిపారు.
