ఏపీ ముఖ్యమంత్రి నివాసం తాజాగా కరోనా రెడ్ జోన్లోకి వెళ్లింది. గురువారం వరకు సీఎం నివాసం బఫర్ జోన్లో ఉండగా రెండ్రోజుల్లోనే రెడ్ జోన్ గా మారిపోయింది. సీఎం నివాసానికి కొద్దిరూరంలో మహిళ కరోనాతో మృతిచెందింది. దీంతో ఈ ప్రాంతాన్ని అధికారులు రెడ్ జోన్ గా గుర్తించారు. సీఎం నివాసానికి కొద్దిరూరంలో కరోనాతో మృతిచెందడంతో అధికారులు అప్రమత్తమై ముందస్తు చర్యలు తీసుకుంటున్నారు.
గుంటూరు జిల్లాలోని తాడేపల్లిలో ఓ మహిళ అనారోగ్యంతో మృతిచెందింది. అనుమానం వచ్చిన వైద్యులు శవానికి టెస్టులు నిర్వహించగా కరోనా పాజిటివ్ వచ్చింది. చనిపోయిన మహిళ తాడేపల్లి పాత గేట్ వద్ద అపార్ట్ మెంట్లో ఉండేది. ఈ ప్రాంతం సీఎం నివాసానికి కొద్దిదూరంలోనే ఉంది. దీంతో ఆ ప్రాంతాన్నిఅధికారులు మార్కింగ్ చేసి రెడ్ జోన్ గా గుర్తించారు.
అలాగే రెండ్రోజుల క్రితం డోలాస్ నగర్‌లో ఓ వ్యక్తికి కరోనా పాజిటివ్ వచ్చింది. మంగళగిరి కమర్షియల్‌ టాక్సెస్‌ డిపార్ట్ మెంట్లో పనిచేస్తున్న సదరు ఉద్యోగి తాడేపల్లిలోని ఓ అపార్ట్‌మెంట్లో ఉంటున్నాడు. దీంతో అపార్టుమెంట్లోని వారిని బయటకు రాకుండా నిబంధనలు అమలు చేస్తున్నారు. అపార్టుమెంట్ వారితోపాటు చుట్టుపక్కల వారి వివరాలు సేకరించి పలువురిని అధికారులు క్వారెంటైన్‌‌కు తరలించారు. ఈ ప్రాంతాన్ని రెడ్ జోన్ గా గుర్తించి అటుగా ఎవరూ వెళ్లకుండా బారీకేడ్లు ఏర్పాటు చేశారు. కాగా గుంటూరులో కరోనా కేసులు అధికంగా నమోదవుతున్నాయి. సీఎం నివాసమే రెడ్ జోన్లోకి వెళ్లడంతో అధికారుల్లో టెన్షన్ మొదలైంది.
