Retro Walking Benefits: ప్రతిరోజూ వాకింగ్ చేయడం ఆరోగ్యానికి మంచిదని అందరికీ తెలుసు. సాధారణంగా మనం ముందుకు నడుస్తూ వ్యాయామం చేస్తుంటాం. అయితే ఇటీవల ఆరోగ్య నిపుణులు, ఫిజియోథెరపిస్టులు ‘రెట్రో వాకింగ్’ లేదా వెనక్కి నడవడం వల్ల కూడా అనేక ఆరోగ్య ప్రయోజనాలు ఉన్నాయని చెబుతున్నారు. కేవలం శరీర ఫిట్నెస్కే కాకుండా మెదడు పనితీరును మెరుగుపరచడంలో కూడా ఈ విధానం సహాయపడుతుందని పలు అధ్యయనాలు వెల్లడిస్తున్నాయి. ఇంకా వెనక్కి నడవడం వల్ల ఎలాంటి ప్రయోజనాలు ఉంటాయో చూద్దాం..
రెట్రో వాకింగ్ అంటే ఏమిటి?
ముందుకు నడిచే బదులుగా వెనుక వైపు అడుగులు వేస్తూ నడవడాన్ని రెట్రో వాకింగ్ అంటారు. ఇది సాధారణ వాకింగ్తో పోలిస్తే కొంచెం కష్టంగా అనిపించినా, శరీరంలోని కండరాలు, నరాలు, మెదడు ఒకేసారి ఎక్కువగా పనిచేయాల్సి ఉంటుంది. అందుకే ఇది ప్రత్యేకమైన వ్యాయామంగా గుర్తింపు పొందుతోంది. ప్రస్తుతం ప్రపంచంలోని అనేక దేశాల్లో క్రీడాకారులు, ఫిట్నెస్ ప్రేమికులు ఈ పద్ధతిని తమ దైనందిన వ్యాయామంలో భాగం చేసుకుంటున్నారు.
మెదడు పనితీరును మెరుగు:
వెనక్కి నడవడం వల్ల మెదడు మరింత అప్రమత్తంగా పనిచేస్తుంది. ముందుకు నడిచేటప్పుడు అలవాటుగా చేసే కదలికలు, వెనక్కి నడిచేటప్పుడు కొత్త సవాలుగా మారుతాయి. దీంతో మెదడు ఎక్కువ ఏకాగ్రతతో పనిచేయాల్సి వస్తుంది. కొన్ని పరిశోధనల ప్రకారం… రెట్రో వాకింగ్ జ్ఞాపకశక్తిని పెంచడంతో పాటు ప్రతిచర్య సమయాన్ని మెరుగుపరుస్తుంది. సమస్యలను పరిష్కరించే సామర్థ్యం, నిర్ణయాలు తీసుకునే నైపుణ్యాలు కూడా మెరుగుపడే అవకాశం ఉందని నిపుణులు చెబుతున్నారు.
కండరాలకు అదనపు బలం:
సాధారణ వాకింగ్లో ఉపయోగించే కండరాలతో పోలిస్తే, వెనక్కి నడిచేటప్పుడు కాళ్ల కండరాలు, తొడలు, పిక్కలు, నడుము భాగంలోని కండరాలు భిన్నంగా పనిచేస్తాయి. దీంతో కండరాల బలం పెరగడమే కాకుండా శరీర సమతుల్యత కూడా మెరుగుపడుతుంది. క్రీడాకారులు తమ వేగం, చురుకుదనాన్ని పెంచుకునేందుకు రెట్రో వాకింగ్ను ప్రత్యేకంగా అభ్యసిస్తుంటారు.
మోకాళ్లు, నడుముకు ఉపశమనం:
ఫిజియోథెరపీ చికిత్సల్లో కూడా రెట్రో వాకింగ్కు ప్రత్యేక స్థానం ఉంది. మోకాళ్ల నొప్పి, నడుము నొప్పి, కీళ్ల సమస్యలతో బాధపడుతున్న వారికి ఇది ప్రయోజనకరంగా ఉంటుందని నిపుణులు చెబుతున్నారు. వెనక్కి నడవడం వల్ల మోకాళ్లపై పడే ఒత్తిడి కొంత మేర తగ్గి, కీళ్ల కదలికలు మెరుగుపడతాయి. అందుకే పునరావాస కార్యక్రమాల్లో ఈ పద్ధతిని తరచుగా ఉపయోగిస్తున్నారు.
అయితే వెనక్కి నడవడం ప్రారంభించే ముందు సురక్షితమైన, అడ్డంకులు లేని ప్రదేశాన్ని ఎంచుకోవాలి. మొదట నెమ్మదిగా చిన్న దూరం నుంచి ప్రారంభించి క్రమంగా సమయాన్ని పెంచాలి. పార్కులు, ట్రాక్లు లేదా ఫిజియోథెరపిస్టు పర్యవేక్షణలో చేయడం మరింత సురక్షితం. రద్దీగా ఉండే రోడ్లపై లేదా ప్రమాదకర ప్రదేశాల్లో ఈ వ్యాయామం చేయకూడదు.
