Jailer 2
Jailer 2: సూపర్ స్టార్ రజినీకాంత్ హీరో గా నటించిన ‘జైలర్’ చిత్రం బాక్స్ ఆఫీస్ వద్ద గత ఏడాది భారీ అంచనాల నడుమ విడుదలై బాక్స్ ఆఫీస్ వద్ద దాదాపుగా 650 కోట్ల రూపాయిల గ్రాస్ కి పైగా వసూళ్లను రాబట్టింది. ఈ స్థాయి వసూళ్లను నేటి తరం స్టార్ హీరోల పాన్ ఇండియన్ సినిమాలు కూడా సొంతం చేసుకోలేకపోయాయి అంటే, రజినీకాంత్ స్టార్ స్టేటస్ ఎలాంటిదో అర్థం చేసుకోవచ్చు. ఈ చిత్రానికి ముందు రజినీకాంత్ కి క్లీన్ హిట్ వచ్చి చాలా కాలం అయ్యింది. రోబో తర్వాత ఆయన చేసిన సినిమాలన్నీ యావరేజ్ రేంజ్ లోనే ఆడాయి. మధ్యలో పెద్దన్న, కాలా ,లింగ వంటి ఘోరమైన డిజాస్టర్ ఫ్లాప్స్ కూడా ఉన్నాయి. పెద్దన్న ఫ్లాప్ తర్వాత రజినీకాంత్ పని ఇక అయిపోయింది అని అనుకుంటున్న సమయంలో జైలర్ చిత్రం ఆయన కెరీర్ కి కొత్త ఊపిరిని ఇచ్చింది. డైరెక్టర్ నెల్సన్ దిలీప్ కుమార్ కూడా ‘బీస్ట్’ వంటి ఫ్లాప్ తర్వాత సరైన బ్లాక్ బస్టర్ అందుకొని మళ్ళీ టాప్ ఫామ్ లోకి వచ్చేసాడు.
ఇదంతా పక్కన పెడితే ‘జైలర్’ కి సీక్వెల్ ఉంటుంది అని డైరెక్టర్ నెల్సన్ అనేక సందర్భాల్లో చెప్పాడు. అందరూ చెప్పినట్టే చెప్తున్నాడు,కానీ ఈ ప్రాజెక్ట్ కార్యరూపం దాల్చడం కష్టం అని అనుకున్నారు కానీ, ఈ సినిమా త్వరలోనే సెట్స్ మీదకు వెళ్లబోతుంది అనేది నిజం. డిసెంబర్ 5 వ తారీఖున ఈ సినిమాకి సంబంధించిన ప్రోమో షూటింగ్ ని చేయబోతున్నారు మేకర్స్. ఈ సినిమాకి టైటిల్ గా ‘హుకుం’ అనే పేరు ని పరిశీలిస్తున్నారు. ‘జైలర్’ చిత్రం లో నటించిన ప్రతీ ఒక్కరు ఈ చిత్రం లో కూడా నటిస్తారు. ముఖ్యంగా రజినీకాంత్ స్నేహితుడిగా అతిథి పాత్రలో కనిపించిన కన్నడ సూపర్ స్టార్ శివ రాజ్ కుమార్ ఈ చిత్రానికి ఎంత పెద్ద హైలైట్ గా నిల్చాడో మన అందరికీ తెలిసిందే.
ఈ ఎంట్రీ కి థియేటర్స్ దద్దరిల్లిపోయాయి, కన్నడ ఆడియన్స్ ‘జైలర్’ చిత్రానికి బ్రహ్మరథం పట్టడంలో శివరాజ్ కుమార్ అభిమానుల సహకారం కూడా ఉంది. అందుకే ఆయన క్యారక్టర్ ఈసారి అతిథి పాత్రకి పరిమితం చేయకుండా, పూర్తి స్థాయిలో చేయించబోతున్నారట. డిసెంబర్ 5న ప్రోమో షూటింగ్ పూర్తి అయ్యాక, క్రిస్మస్ కానుకగా ఈ ప్రోమో (టీజర్) ని విడుదల చేసే ఆలోచనలో ఉన్నారట మేకర్స్. ఈ సినిమాకి కూడా అనిరుద్ సంగీతం అందించబోతున్నాడు. ప్రస్తుతం రజినీకాంత్ లోకేష్ కనకరాజ్ తెరకెక్కిస్తున్న ‘కూలీ’ చిత్రంలో నటిస్తున్నాడు. ఈ సినిమా షూటింగ్ పూర్తి అవ్వగానే ఆయన జైలర్ సీక్వెల్ షూటింగ్ లో పాల్గొనబోతున్నాడు. త్వరలోనే ఈ సినిమాకి సంబంధించిన మరికొన్ని పూర్తి వివరాలు అధికారికంగా తెలియచేయనున్నారు మేకర్స్. రజినీకాంత్ అభిమానులు ఈ రెండు సినిమాల మీద భారీ ఆశలు పెట్టుకున్నారు. ఎందుకంటే ఆయన గత రెండు చిత్రాలు బాక్స్ ఆఫీస్ వద్ద మిశ్రమ ఫలితాలను దక్కించుకున్నాయి.
