‘క్రాక్’ సినిమాతో మరోసారి టాలీవుడ్ లో హిట్ ను అందుకున్నాడు రవితేజ. ఆ మధ్య వచ్చిన ‘రాజా ది గ్రేట్’ తర్వాత మళ్లీ చాలా రోజులకు ‘క్రాక్’తో టాలీవుడ్ లో మెరిసాడు. అసలు హిట్స్ తో సంబంధం లేకుండా రవితేజ సినిమాలు చేస్తూనే ఉంటాడు.
ప్రస్తుతం రవితేజ చేతిలో నాలుగు సినిమాలున్నాయి. కానీ కాల్షీట్ల సమస్యతో ఒక్కో సినిమా చేజారుతోంది. మొన్నటికి మొన్న నక్కిన త్రినాథరావుతో చేయాల్సిన మూవీ ఆగిపోయిందని వార్తలు వచ్చాయి. ఇప్పుడు ఆ జాబితాలో మరో స్టార్ రైటర్ కం డైరెక్టర్ మూవీ కూడా చేజారినట్టు టాలీవుడ్ భోగట్టా..
‘కిక్’, రేసుగుర్రం లాంటి బ్లాక్ బస్టర్ మూవీలకు కథను అందించిన వక్కంతం వంశీ ‘నా పేరు సూర్య-నా ఇల్లు ఇండియా’తో దర్శకుడిగా మారారు. అయితే తొలి చిత్రంతో అట్టర్ ఫ్లాప్ ను అందుకున్నాడు. దీంతో రెండో సినిమా కోసం చాలా సమయం తీసుకొని పకడ్బందీ కథను రూపొందించాడు. రవితేజకు ఆ కథ చెప్పి ఒప్పించాడు. అధికారిక ప్రకటన కూడా చేశారు.
అయితే రవితేజ ప్రస్తుతం నాలుగు సినిమాలు ఒప్పుకోవడం.. అవి పూర్తయ్యే వరకు మూడు నాలుగేళ్లు పడుతుండడంతో దర్శకుడు వక్కంతం వంశీ చాలించుకున్నాడు. రవితేజను పక్కనపెట్టి నితిన్ కు కథ చెప్పగా ఓకే అయ్యింది. రవితేజ కథనా? లేక మరో కథనా అన్నది తేలాల్సి ఉంది.
ఇప్పటికే నితిన్ చేయాల్సిన రిమేక్ ఆగిపోవడంతో ఆ కాల్షీట్లు వక్కంతం వంశీకు ఇచ్చి సినిమా మొదలుపెట్టబోతున్నాడట.. అలా రవితేజకు ఓ మంచి సినిమా దూరమైందన్న టాక్ టాలీవుడ్ లో నడుస్తోంది.
