నిజమే. సాయిధరమ్‌ ఐఏఎస్‌ ట్రెయినింగ్‌ తీసుకుంటున్నాడు. త్వరలోనే చార్జ్‌ తీసుకోబోతున్నాడు. అదేంటి సాయి ధరమ్‌ హీరో కదా.. నటన వద్దని సివిల్స్ రాశాడా? ర్యాంక్‌ కూడా కొట్టేశాడా? అన్న అనుమానం వద్దు. అతను ఐఏఎస్‌ ట్రెయినింగ్‌ తీసుకుంటున్నది మూవీ కోసమే. మెగా కాంపౌండ్‌ నుంచి చిత్ర పరిశ్రమలో అడుగు పెట్టి తనకంటూ ప్రత్యేకత ఏర్పరచుకున్నాడు సాయి. యాక్టింగ్‌, డ్యాన్‌, బాడీ లాంగ్వేజ్‌తో స్టార్ డమ్‌ తెచ్చుకున్నాడు. ఫస్ట్‌ రిలీజైన ‘పిల్ల నువ్వు లేని జీవితం’తోనే స్టామినా చూపించిన అతను ‘సుబ్రమణ్యం ఫర్ సేల్‌’, ‘సుప్రీమ్‌’, ‘చిత్రలహరి’, ‘ప్రతి రోజు పండగే’ లాంటి హిట్స్‌ ఖాతాలో వేసుకున్నాడు. అలాగని ఫెయిల్యూర్స్‌ లేవని కాదు.. తొలుత నటించిన రేయ్‌తో పాటు తిక్క, విన్నర్, నక్షత్రం, జవాన్‌, ఇంటిలిజెంట్‌, తేజ్‌ ఐ లవ్‌ యు.. వంటి డిజాస్టర్స్‌ కూడా అతని ఖాతాలో ఉన్నాయి. దాంతో, అతను ఈ మధ్య కథల ఎంపికలో జాగ్రత్తగా ఉంటున్నాడు. వైవిధ్యం ఉన్న కథలు, విలక్షణమైన పాత్రలే ఎంచుకుంటున్నాడు. ‘చిత్రలహరి’లో వైఫల్యాల నుంచి సక్సెస్‌ సాధించిన యువకుడి పాత్రలో అద్భుతంగా నటించిన అతను… ప్రతి రోజు పండగేలో విదేశాల నుంచి పల్లెటూరికి వచ్చి మనవడిగా నటించి మెప్పించాడు. రిలీజ్‌కు రెడీగా ఉన్న ‘సోలో బ్రతుకే సో బెటర్’లో ప్రేమ, పెళ్లి వద్దని యువతకు హితబోధ చేసే దగ్గరి నుంచి ప్రేమలో పడే యువకుడి పాత్ర పోషించాడు.
వియ్యంకుడు సాయి తేజ్‌కు థ్యాంక్స్‌ చెప్పిన మంచు మనోజ్!
ఇప్పుడు ఐఏఎస్‌ అధికారిగా నటించబోతున్నాడు. దేవ కట్టా దర్శకత్వంలో సాయి ధరమ్‌ తేజ్‌ హీరోగా ఓ సినిమా తెరకెక్కనున్న సంగతి తెలిసిందే. పాలిటిక్స్‌ బ్యాక్‌ డ్రాప్‌లో నడిచే మూవీలో సాయి యువ ఐఏఎస్‌ ఆఫీసర్‌గా కనిపించబోతున్నాడట. దాంతో, ప్రస్తుతం ఐఏఎస్‌ ఆఫీసర్ల విధివిధానాలు, వారి బాడీ లాంగ్వేజ్‌ వంటి అంశాలపై ప్రత్యేక దృష్టి పెట్టాడని తెలుస్తోంది. వాటిని నిశితంగా గమనించడంతో పాటు యువ ఐఏఎస్‌ గెటమ్‌లో ఫిట్‌గా కనిపించేందుకు బరువు తగ్గేలా ట్రెయినింగ్‌ తీసుకుంటున్నాడు. నార్త్‌ ఇండియా నేపథ్యంలో కథనం ఉంటుందని వినికిడి. రమ్యకృష్ణ కీలక పాత్ర పోషిస్తారట. కరోనా పరిస్థితులు కుదుటపడ్డాక ఈ మూవీని సెట్స్‌ మీదకు తీసుకెళ్లాలని ప్లాన్‌ చేస్తున్నారు మేకర్స్‌.
