Rajini Kanth: సూపర్స్టార్ రజనీకాంత్ దేశ విదేశాల్లో సైతం కోట్లలో అభిమానులను సంపాదించుకున్నారు. రజనీకి తమిళంతో పాటు, తెలుగు లో కూడా ఉన్నఇమేజ్ గురించి ప్రత్యేకంగా చెప్పనక్కర్లేదు. ఆయన స్టయిల్, డైలాగ్ డెలివరీ సినిమాలకు ప్రత్యేక ఆకర్షణ అని చెప్పాలి. కాగా ఇటీవల ‘పెద్దన్న’ సినిమాతో ప్రేక్షకులను అలరించారు రజినీ. అయితే ఈ సినిమా గురించి రజని ఇటీవల చేసిన వ్యాఖ్యలు సినీ వర్గాల్లో చర్చనీయాంశంగా మారాయి. రజినీ కుమార్తె సౌందర్య ఇటీవల ‘హూటే’ అనే యాప్ ను లాంచ్ చేశారు. ఈ సందర్భంగా రజినీకాంత్ ఆ యాప్ లో రెండు వాయిస్ మెసేజ్లు పోస్ట్ చేశారు.
గతంలో రజనీకాంత్ “పేటా” తో పాటే అజిత్ నటించిన “విశ్వాసం” కూడా థియేటర్లలో రిలీజైంది. ఆ సమయం లోనే ‘విశ్వాసం’ రజనీకి తెగ నచ్చేసిందట. దీంతో ఆ సినిమా డైరెక్టర్ శివను కలవాలనుకున్నానని రజినీకాంత్ వెల్లడించారు. దీంతో అతడిని తన ఇంటికి పిలిపించి సినిమా చేసే విషయమై మాట్లాడగా మీకు హిట్ ఇవ్వడం చాలా సులభం సర్ అని తనతో శివ అన్నట్లు రజనీ గుర్తు చేసుకున్నారు. తనతో ఇప్పటివరకు ఏ డైరెక్టర్ కూడా అలా అనలేదని… అయితే హిట్ ఇస్తా అని ఎలాంటి నమ్మకంతో చెబుతున్నావని అడిగారన్నారు. మంచి కథతో పాటు గ్రామీణ నేపథ్యంలో మీరు సినిమా తీసి చాలా రోజులైంది. ఆ రెండు ఉంటే సినిమా కచ్చితంగా హిట్ అవుతుంది అని శివ తనతో అన్నాడని రజనీ చెప్పారు.
రజనీని కలిసిన 20 రోజుల తర్వాత శివ పూర్తి స్క్రిప్ట్తో వచ్చాడని… దాదాపు రెండున్నర గంటలపాటు తనకు నెరేషన్ ఇచ్చాడని తెలిపారు. వెంటనే పెద్దన్న స్క్రిప్ట్కు గ్రీన్ సిగ్నల్ ఇచ్చానని రజనీ అన్నారు. అయితే శివ ఈ కథ చెబుతున్న సమయంలో తెలియకుండానే ఏడ్చేశానని రజనీ చెప్పడం విశేషం. ఆ తర్వాత కధ చాలా బాగుంది నువ్వు చెప్పినట్లు తీయ్ చాలు అని శివతో చెప్పానని రజనీ తెలియజేశారు. ఇంత కంటే బాగా తీస్తాను ప్రేక్షకులు చాలా మంది వచ్చి ఈ సినిమా చూస్తారు అని శివ తనతో అన్నాడన్నారు.
