Raja Vikramarka: ‘రాజా విక్రమార్క’ ఆకట్టుకున్నాడా?.. మూవీ రివ్యూ!

Raja Vikramarka: ఆర్​ఎక్స్ 100 సినిమాతో టాలీవుడ్​కు గ్రాండ్ ఎంట్రీ ఇచ్చి.. తెలుగు ప్రేక్షకుల హృదయాల్లో స్థానం దక్కించుకున్న హీరో కార్తికేయ. ఆ తర్వాత వైవిధ్యమైన చిత్రాలతో ఎప్పటికప్పుడు మార్క్​ను క్రియేట్​ చేస్తూ వస్తున్నాడు. తాజాగా, రాజా విక్రమార్క సినిమాతో ప్రేక్షకుల ముందుకు వచ్చాడు ఈ హీరో. నవంబరు12 న ఈ సినిమా విడుదలైంది. ఇప్పటికే యూఎస్​లో ప్రీమియర్​ షోలు పడిపోయాయి. అయితే, అక్కడ ప్రేక్షకుల రివ్యూలు అందరినీ షాక్​కు గురి చేస్తున్నాయి. ఈ నేపథ్యంలోనే ట్విట్టర్​ రివ్యూపై ఓ లుక్కేద్దాం.

హీరో కార్తికేయ- తాన్యా రవిచంద్రన్​ జంటగా నటించిన సినిమా రాజా విక్రమార్క. శ్రీ సరిపల్లి ఈ సినిమాకు దర్శకత్వం వహించారు. శ్రీ చిత్ర మూవీ మేకర్స్ బ్యానర్​పై ఆదిరెడ్డి సమర్పణలో రమారెడ్డి నిర్మించారు. ప్రశాంత్​ ఆర్​ విహారి ఈ సినిమాకు సంగీతం అందించారు. క్రైమ్​ థ్రిల్లర్​ జోనర్​లో రూపొందిన ఈ మూవీ శుక్రవారం విడుదలైంది.

ఫన్​ అండ్​ క్రైమ్​ థ్రిల్లర్​గా వచ్చిన రాజా విక్రమార్క మూవీపై మొదటి నుంచి భారీ అంచనాలే ఉన్నాయి. అందుకు అనుగుణంగానే ఈ సినిమా నుంచి విడుదలైన ప్రోమో, ట్రైలర్​లు మంచి రెస్పాన్స్​ను అందుకున్నాయి. మరోవైపు మెగాస్టార్​ లాంటి వారు ఈ సినిమాను ప్రమోట్​ చేయడం మరింత హైప్​ పెంచింది. సినిమా చూసిన కొంత మంది ప్రేక్షకులు ట్విట్టర్​ వేదికగా తమ అభిప్రాయాలను పంచుకున్నారు. కాగా, ఈ సినిమాకు మిశ్రమ స్పందన లభిస్తోంది. కొంత మంది సినిమా బాగుందని కామెంట్లు చేస్తుండగా.. మరికొందరు యావరేజ్​ అంటూ పోస్ట్ చేస్తున్నారు.

సినిమాలో కార్తికేయ యాక్టింగ్​.. కామెడీ సీన్స్​ ఎంతగానో ఆకట్టుకున్నట్లు తెలుస్తోంది. మ్యూజిక్​ కూడా ఫర్యాలేదనిపిస్తుందని అంటున్నారు. అయితే, థ్రిల్​ విషయంలో క్రియేట్​ చేసిన ట్విస్టులు, స్లో నరేషన్​, ఎడిటింగ్​, దర్శకత్వం లోపం, లాజిక్​ లేని సీన్స్​, ఈ సినిమాకు మైనస్​ అంటూ ప్రేక్షకులు కామెంట్​ చేస్తున్నారు.

ఓవరాల్​గా చూసుకుంటే.. ఫస్టాఫ్​ మొత్తం హీరోను ఇన్వెస్టిగేటివ్​ థ్రిల్లర్​గా చూపించేందుకు చేసే ప్రయత్నాలు, హీరో హీరోయిన్​ లవ్​ ట్రాక్​, అక్కడక్కడ కామెడీ సీన్స్​ ఫర్వాలేదనిపించిందని తెలుస్తోంది. కాగా, సెకండ్​ ఆఫ్​ మాత్రం అంతగా ఆకట్టుకోలేకపోయిందని అంటున్నారు. అయితే, ఎప్పటి నుంచి మంచి బ్రేక్​ కోసం ఎదురు చూస్తున్న కార్తికేయ ఈ సినిమా నిరాశపరిచినట్లు అనిపిస్తోంది.  మరి రాను రానూ ఈ సినిమా టాక్ మారుతుందేమో చూడాలి.