Ram Charan Peddi Movie: గ్లోబల్ స్టార్ రామ్ చరణ్ నటించిన ‘పెద్ది’ మూవీ రేపు ప్రీమియర్ షోస్ తో గ్రాండ్ గా విడుదల కాబోతుంది. ఈ సినిమా పై రామ్ చరణ్ ఫ్యాన్స్, మెగా ఫ్యాన్స్ మాత్రమే కాదు , ఇతర హీరోల అభిమానులు కూడా అంచనాలు భారీ రేంజ్ లో పెట్టుకున్నారు. ఎందుకంటే ఈ చిత్రం నుండి విడుదలైన ప్రతీ కంటెంట్ బాంబు లెక్క పేలింది. ఈ స్థాయి కంటెంట్ ఈమధ్య కాలం లో ఏ స్టార్ హీరో సినిమాకు కూడా పడలేదు. సినిమా కూడా ప్రమోషనల్ కంటెంట్ కి తగ్గట్టుగానే , అద్భుతంగా ఉంటుందని , రామ్ చరణ్ కి మరో రంగస్థలం లాంటి సినిమా రాబోతుందని అందరూ బలంగా నమ్ముతున్నారు. అయితే ఈ సినిమాకు తెలంగాణ లో టికెట్ హైక్స్ దొరుకుతుందా లేదా అనే అంశంపై ఇప్పటికీ క్లారిటీ రాకపోవడం గమనార్హం.
కాసేపటి క్రితమే తెలంగాణ లో పెద్ది చిత్రానికి టికెట్ రేట్స్ పెంచుకోవడానికి ప్రభుత్వం అనుమతి ఇచ్చిందంటూ సోషల్ మీడియా లో ప్రచారం జరిగింది. కానీ ఇప్పుడు టికెట్ రేట్స్ రావడం కష్టమే అని అంటున్నారు. ఎందుకంటే ప్రస్తుతం తెలంగాణ లో అలాంటి రాజకీయ పరిస్థితులు ఏర్పడ్డాయి కాబట్టి. గత కొన్ని రోజులుగా పవన్ కళ్యాణ్ పై కొంతమంది విశ్లేషకులు టార్గెట్ చేసి ఆరోపణలు చేయడం , దానికి పవన్ కళ్యాణ్ కౌంటర్ ఇస్తే తెలంగాణ సెంటిమెంట్ ని తెరమీదకు తీసుకొని రావడం వంటివి జరిగాయి. దీంతో పవన్ కళ్యాణ్ నేడు తెలంగాణ రాష్ట్ర అవతరణ సందర్భంగా , జనసేన తెలంగాణ క్యాడర్ కోసం, ఒక ప్రత్యేకమైన మీటింగ్ ని ఏర్పాటు చేసుకున్నాడు. కానీ తెలంగాణ ప్రభుత్వం అనుమతి ఇచ్చేందుకు నిరాకరించింది. దీంతో పవన్ కళ్యాణ్ ప్రెస్ మీట్ ని నిర్వహించబోతున్నాను అని ఒక సంచలన ప్రకటన చేసి , నేడు సాయంత్రం ప్రెస్ మీట్ ని ఏర్పాటు చేసి , తెలంగాణ కాంగ్రెస్ పార్టీ నాయకులను ఏకిపారేసాడు .
దీంతో ప్రభుత్వం లో ఉన్న కాంగ్రెస్ పార్టీ , రామ్ చరణ్ పవన్ కళ్యాణ్ కుటుంబానికి చెందిన వాడు కాబట్టి, ఆయన నటించిన లేటెస్ట్ చిత్రం ‘పెద్ది ‘ కి టికెట్ రేట్స్ , ప్రీమియర్స్ షోస్ లకు అనుమతి నిరాకరించిందని ప్రచారం జరిగింది. పవన్ కళ్యాణ్ చేసిన కామెంట్స్ కారణంగానే కాంగ్రెస్ పార్టీ ఈ నిర్ణయం తీసుకుందని సోషల్ మీడియా లో విశ్లేషకులు కామెంట్స్ చేశారు. అయితే తెలంగాణ ప్రభుత్వం టికెట్ రేట్స్ పెంచుకోవడానికి పెద్ది టీం కి ఇప్పటికే అనుమతి ఇచ్చేసిందని , కానీ నేడు తెలంగాణ లో హాలిడే కాబట్టి , జీవో అధికారికంగా విడుదల అవ్వలేదని, రేపు ఉదయం లోపు జీవో వచ్చే అవకాశం ఉందని అంటున్నారు. మరి ఇందులో ఎంత మాత్రం నిజముందో తెలియాలంటే కొన్ని గంటలు ఆగాల్సిందే.
