South Superstars: సౌత్ ఇండియా లో జాతీయ పార్టీలు తమ ఉనికి ని చాటుకునేందుకు అన్ని విధాలుగా ప్రయత్నాలు చేస్తోంది. మన సౌత్ లో కాంగ్రెస్ పార్టీ కి మంచి పట్టు ఉంది. తెలంగాణ, కర్ణాటక , కేరళ ప్రాంతాల్లో ప్రస్తుతం కాంగ్రెస్ పార్టీ ప్రభుత్వాలే నడుస్తున్నాయి. కానీ బీజేపీ మాత్రం కేవలం ఆంధ్ర ప్రదేశ్ లోనే ప్రభుత్వం లో కొనసాగుతుంది. తెలంగాణ, తమిళనాడు, కర్ణాటక వంటి రాష్ట్రాల్లో గౌరవప్రదమైన ఓటు బ్యాంక్ ఉన్నప్పటికీ, బలమైన లీడర్స్ లేకపోవడం తో ప్రభుత్వాలను ఏర్పాటు చేయలేకపోతున్నాయి . మరోపక్క కాంగ్రెస్ పార్టీ తమిళనాడు లో కూడా ప్రభుత్వం లో భాగం కాబోతుంది. రీసెంట్ ఎన్నికల్లో ఘనవిజయం సాధించిన విజయ్ కి మద్దతు తెలిపింది కాంగ్రెస్ పార్టీ. త్వరలోనే ప్రభుత్వం లో అక్కడ కాంగ్రెస్ పార్టీ నేతలు కీలక బాధ్యతలు చేపట్టబోతున్నారు. అంటే ఒక్క ఆంధ్ర ప్రదేశ్ లో మినహా, మిగిలిన సౌత్ రాష్ట్రాల్లో మొత్తం కాంగ్రెస్ పాగా వేసేసింది.
మరోపక్క బీజేపీ కూడా చాపకింద నీరు లాగా విస్తరింపజేసే ప్రయత్నం చేస్తోంది. కేరళ లాంటి రాష్ట్రంలో బీజేపీ 2 స్థానాలు గెలవడం అనేది చిన్న విషయం కాదు. ఇదంతా పక్కన పెడితే సౌత్ రాజకీయాల్లో ఈ రెండు జాతీయ పార్టీలు ఇద్దరు బిగ్గెస్ట్ సూపర్ స్టార్స్ ని ముందు పెట్టుకొని నడిపించాలని చూస్తున్నాయి. అందులో ఒకరు త్వరలో తమిళనాడు ముఖ్యమంత్రి బాధ్యతలు చేపట్టబోతున్న విజయ్ కాగా, మరొకరు మన ఆంధ్ర ప్రదేశ్ ఉప ముఖ్యమంత్రి పవన్ కళ్యాణ్. విజయ్ ఇప్పుడు కాంగ్రెస్ పార్టీ తో చేతులు కలపడం తో , సౌత్ లో మన తెలుగు రాష్ట్రాలతో సహా , మిగిలిన మూడు రాష్ట్రాల్లో ఎప్పుడు ఎన్నికలు జరిగినా కాంగ్రెస్ పార్టీ కి మద్దతుగా విజయ్ ఎన్నికల ప్రచారం చేస్తాడు. అదే విధంగా పవన్ కళ్యాణ్ కూడా సౌత్ లో ఎప్పుడు ఎన్నికలు జరిగిన బీజేపీ పార్టీ తరుపున ప్రచారంలో పాల్గొంటాడు.
తమిళనాడు ఎన్నికల సమయంలో కూడా ఆయన ప్రచారం చెయ్యాల్సింది. కానీ అనారోగ్య సమస్యల కారణంగా ఆగిపోవాల్సి వచ్చింది. కానీ మహారాష్ట్ర ఎన్నికల్లో పవన్ కళ్యాణ్ ప్రచారం ఏ స్థాయి ప్రభంజనం క్రియేట్ చేసిందో ప్రత్యేకించి చెప్పనవసరం లేదు. ఏళ్ళ తరబడి గెలవని స్థానాల్లో కూడా సంచలన విజయం సాధించారు బీజేపీ అభ్యర్థులు. అలా దేశ రాజకీయాలను శాసిస్తున్న ఈ రెండు జాతీయ పార్టీలు , ఇప్పుడు ప్రధానంగా ఇద్దరు బిగ్గెస్ట్ సూపర్ స్టార్స్, బలమైన ఫ్యాన్ బేస్ ఉన్నటువంటి పవన్ కళ్యాణ్ , విజయ్ వంటి వారితో చేతులు కలపడం సాధారణమైన విషయం కాదు. వచ్చే ఎన్నికల్లో విజయ్ కాంగ్రెస్ పార్టీ తరుపున ఆంధ్ర ప్రదేశ్ , తెలంగాణ రాష్ట్రాల్లో ప్రచారంలో పాల్గొనవచ్చు .
