Keerthi Suresh: మహానటితో తెలుగు సినీ ప్రేక్షకుల్లో చెరగని ముద్ర వేసుకున్న నటి కీర్తి సురేశ్. ఆ తర్వాత వరుసగా సినిమా అవకాశాలు దక్కించుకుని అగ్ర తారల్లో ఒకరిగా గుర్తింపు సాధించింది. ప్రస్తుతం ఈ ముద్దుగుమ్మ ప్రధాన పాత్రలో నటిస్తోన్న సినిమా గుడ్లక్ సఖి. మహిళా ఓరియెంటెడ్ నేపథ్యంలో ఈ సినిమా తెరకెక్కుతోంది. గ్రామీణ క్రీడా నేపథ్యంలో రూపొందుతోన్న ఈ సినిమాకు నగేశ్ కుకునూర్ దర్శకత్వం వహిస్తున్నారు. కాగా, తాజాగా, ఈ సినిమా నుంచి ఓ అప్డేట్ వచ్చింది. బ్యాడ్ లక్ సఖి పేరుతో ఫుల్ వీడియో పాటను హీరో రానా విడుదల చేశారు. సినిమాలో కీర్తి సురేశ్ పాత్రను తెలియజేసేలా ఈ పాటను తెరకెక్కించినట్లు తెలుస్తోంది. ఇందులో ఆమెను కష్టపడే మనస్తత్వం ఉన్నప్పటికీ.. దురదృష్టవంతురాలిగా చూపించారు.
https://youtu.be/Vs186rr4trU
ఈ పాటను హరిప్రియ, సమీరా భరద్వాజ్, ఎంఎల్ ఆర్ కార్తికేయన్ ఆలపించారు. అదిగో వస్తుంది బ్యాడ్ లక్ సఖి అంటూ సాగే ఈ పాట ప్రేక్షకులను అమితంగా ఆకట్టుకుంటోంది. జగపతిబాబు, ఆది పినిశెట్టి ఈ సినిమాలో కీలకపాత్రలు పోషించారు. దేవిశ్రీ ప్రసాద్ స్వరాలు అందించారు. తెలుగు, తమిళం, మలయాళం భాషల్లో ప్రపంచవ్యాప్తంగా నవంబర్ 26న ఈ సినిమా విడుదల కానుంది.
మరోవైపు, సూపర్స్టార్ మహేశ్బాబు నటిస్తోన్న సర్కారు వారి పాట సినిమాలోనూ నటిస్తోంది కీర్తి సురేశ్. ఇందులో మహేశ్ సరసన కనిపించనుంది. తమన్ ఈ సినిమాకు స్వరాలు అందిస్తున్నారు. పరశురామ్ దర్శకత్వంలో తెరకెక్కనున్న ఈ సినిమా.. వచ్చే ఏడాది ఏప్రిల్ 1న విడుదలకు సిద్ధమైంది.
