నందమూరి బాలకృష్ణ-బోయపాటి శ్రీను కాంబినేష‌న్లో తెర‌కెక్కుతున్న ప్ర‌తిష్టాత్మ‌క చిత్రం బీబీ-3. ప్ర‌స్తుతం శ‌ర‌వేగంగా షూటింగ్ జ‌రుపుకుంటున్న ఈ సినిమా రిలీజ్ డేట్ కూడా లాక్ చేశారు మేక‌ర్స్‌. మే 28న ఈ చిత్రాన్ని ప్రేక్ష‌కుల ముందుకు తీసుకురాబోతున్న‌ట్టు అఫీషియ‌ల్ గా అనౌన్స్ చేశారు. అయితే.. రిలీజ్ కూడా షెడ్యూల్ చేసిన‌ప్ప‌టికీ.. ఈ సినిమాకు సంబంధించిన టైటిల్ మాత్రం ఇంకా అనౌన్స్ చేయ‌లేదు.
ఈ మోస్ట్ అవైటెడ్ సినిమా టైటిల్ ను ప్ర‌క‌టిస్తారంటూ ప్ర‌చారమైన ఎన్నో డేట్లు వ‌చ్చాయి.. వెళ్లిపోయాయి. మహా శివరాత్రి సందర్భంగా మార్చి 11న ప్ర‌క‌టిస్తార‌ని ప్ర‌చారం జ‌రిగినా.. అనౌన్స్ మాత్రం కాలేదు. ఆ త‌ర్వాత కూడా ప‌లు డేట్లు అనుకున్న‌ప్ప‌టికీ.. ప్ర‌క‌టించ‌లేదు. ఎట్టకేలకు ఉగాది పండ‌గ రోజున టైటిల్ రివీల్ చేయ‌నున్నారు మేక‌ర్స్‌.
ఏప్రిల్ 13న మ‌ధ్యాహ్నం 12 గంట‌ల 33 నిమిషాల‌కు ఈ టైటిల్ అనౌన్స్ చేయ‌నున్నారు. అయితే ముందు నుంచీ ప్రచారంలో ఉన్న రెండు టైటిల్స్ లోనే ఒక‌టి ఫిక్స్ చేస్తార‌ని ఫిల్మ్ న‌గ‌ర్ టాక్. ‘మోనార్క్’, ‘గాడ్ ఫాద‌‌ర్’ టైటిల్స్ ముందు నుంచీ చక్కర్లు కొడుతున్నాయి. ఈ రెండిట్లో ఒక‌టి ఖ‌రారు చేస్తార‌ని తెలుస్తోంది. అయితే.. మోనార్క్ వైపే మొగ్గు చూపే అవ‌కాశం ఉంద‌ని అంటున్నారు.
ద్వారకా క్రియేషన్స్ నిర్మిస్తున్న ఈ చిత్రంలో ప్రగ్యా జైస్వాల్ హీరోయిన్ గా న‌టిస్తోంది. శ్రీకాంత్ విల‌న్ గా న‌టిస్తున్నారు. థమన్ సంగీతం అందిస్తున్నారు. కాగా.. క‌రోనా పెరుగుతున్న నేప‌థ్యంలో మ‌ళ్లీ 50 శాతం సీటింగ్ నిర్ణ‌యం అమ‌ల్లోకి రావొచ్చ‌నే ప్ర‌చారం సాగుతోంది. అదే జ‌రిగితే.. స‌మ్మ‌ర్ సినిమాల‌న్నీ వెన‌క్కి వెళ్లే ఛాన్స్ ఉంద‌ని అంటున్నారు.