Aha: ‘ఆహా’… తొలి తెలుగు ఓటీటీ సంస్థ. అతి తక్కువ కాలంలోనే అత్యధిక ప్రేక్షకాదరణ పొందిన ఈ సంస్థ ఓటీటీ రంగంలో తనదైన ముద్ర వేసింది. బ్లాక్బస్టర్ సినిమాలు, సరికొత్త వెబ్సిరీస్లు, టాక్ షోలు, ఒరిజినల్స్తో తెలుగు ప్రేక్షకులకు మరింత చేరువైంది. రోజురోజుకీ సబ్స్క్రైబర్ల సంఖ్యను పెంచుకుంటూ తనకంటూ ఓ ప్రత్యేక గుర్తింపును సంపాదించుకుంది. మొత్తంగా ఇప్పటివరకు 50 మిలియన్లకు పైగా యూజర్లు, 13 మిలియన్లకు పైగా డౌన్లౌడ్స్తో దూసుకుపోతుంది ఈ ఒటీటీ ఫ్లాట్ ఫామ్.
ఈ క్రమంలోనే దీపావళి సందడిని మరింత రెట్టింపు చేసేందుకు ఆహా యాప్ అప్గ్రేడ్ అవ్వబోతుంది. సరికొత్త ఫీచర్స్ను వీక్షకులకు అందించనుంది. ఐకాన్ స్టార్ అల్లుఅర్జున్ సమర్పణలో ‘ఆహా 2.0’గా అవతరించనుంది. దీని కోసం గ్రాండ్గా ‘ఐకాన్ స్టార్ ప్రెజంట్స్ ఆహా 2.0’ అనే ప్రత్యేక కార్యక్రమం ప్రస్తుతం అధిరే రేంజ్ లో నిర్వహిస్తున్నారు. కాగా కాసేపటి క్రితమే ఈ వేడుక ప్రారంభమైంది. అల్లు అర్జున్ ఈ వేడుకకు ముఖ్య అతిథిగా హాజరుకానున్నారు. అలానే ఈ షోకు బన్నీ ప్రజెంటర్గా వ్యవహరిస్తుండటం మరో విశేషం. హైదరాబాద్ నోవాటెల్ ఈ పండగకు వేదిక కానుంది. అల్లు అరవింద్, జూపల్లి రాము రావు అధ్యక్షతన ఈ కార్యక్రమం జరుగుతుంది.
ఇందులో భాగంగా ‘ఆహా 2.0’ను ప్రారంభించనున్నారు. ఈ 2.0 లాంఛింగ్ కార్యక్రమంలో… త్వరలో ఆహాలో రానున్న ‘మోస్ట్ ఎలిజిబుల్ బ్యాచిలర్’, ‘లక్ష్య’, ‘మంచి రోజులు వచ్చాయి’, ‘డీజే టిల్లు’, ‘రొమాంటిక్’, ‘అనుభవించు రాజా’, ‘పుష్పక విమానం’, ‘గని’ వంటి చిత్రాలకు సంబంధించిన వివరాలు తెలియజేయనున్నారు. అలానే ఆహా ఒరిజినల్స్ గా రూపొందుతున్న ‘అన్స్టాపబుల్’, ‘సేనాపతి’, ‘భామా కలాపం’, ‘త్రీరోజెస్’ వివరాలను కూడా ప్రకటించనున్నారు. మరి ఆహా అప్డేటెడ్ వెర్షన్ తెలుగు ప్రేక్షకులకు ఎలాంటి అనుభూతి అందించనుందో తెలియాలంటే ఈ కార్యక్రమం పూర్తయ్యే వరకు వేచి ఉండాల్సిందే.
