TRAI Rules: మొబైల్ వినియోగదారులకు వచ్చే ప్రమోషనల్, సర్వీస్ కాల్స్ విషయంలో భారత టెలికాం నియంత్రణ సంస్థ (TRAI) కీలక స్పష్టత ఇచ్చింది. ముఖ్యంగా RBI, SEBI, బ్యాంకులు, ఆర్థిక సంస్థలు చేసే అధికారిక కాల్స్తో పాటు ప్రకటనల కోసం ఉపయోగించే ప్రత్యేక నంబర్ సిరీస్లపై థర్డ్ పార్టీ కాల్ బ్లాకింగ్ యాప్స్కు పరిమితులు ఉంటాయని వెల్లడించింది. దీంతో వినియోగదారులు ఏ కాల్స్ను బ్లాక్ చేయవచ్చు? ఏవాటిని చేయలేరు? అనే అంశంపై స్పష్టత వచ్చింది. ఆ వివరాల్లోకి వెళితె..
TRAI ప్రకారం.. RBI, SEBI, బ్యాంకులు, బీమా సంస్థలు ఇతర నియంత్రిత ఆర్థిక సంస్థలు వినియోగదారులకు చేసే అధికారిక సేవా కాల్స్ కోసం 1600 సిరీస్ నంబర్లను కేటాయించారు. ఈ కాల్స్ను Truecaller వంటి థర్డ్ పార్టీ కాల్ ఐడెంటిఫికేషన్ లేదా స్పామ్ బ్లాకింగ్ యాప్స్ స్పామ్గా ట్యాగ్ చేయడం లేదా పూర్తిగా బ్లాక్ చేయడం సాధ్యం కాదని ట్రాయ్ పేర్కొంది. ప్రజలకు ముఖ్యమైన బ్యాంకింగ్, భద్రతా, లావాదేవీల సమాచారాన్ని అందించడమే ఈ నంబర్ల ఉద్దేశమని తెలిపింది.
ప్రమోషనల్ కాల్స్.. ప్రకటనల కోసం ఉపయోగించే 140 సిరీస్ నంబర్ల విషయంలో కూడా థర్డ్ పార్టీ యాప్స్కు పరిమితులే ఉంటాయని ట్రాయ్ తెలిపింది. ఈ కాల్స్ను యాప్స్ తమ ఇష్టానుసారంగా ఫిల్టర్ చేయడం లేదా పూర్తిగా నిరోధించడం వీలుకాదని స్పష్టం చేసింది. దీంతో వినియోగదారులు ఈ కాల్స్ను ఆపాలంటే అధికారిక మార్గాన్నే అనుసరించాల్సి ఉంటుంది.
అవాంఛిత ప్రమోషనల్ కాల్స్, SMSలను నిలిపివేయాలనుకునే వినియోగదారులు Do Not Disturb (DND) సేవను తప్పనిసరిగా ఉపయోగించాలని ట్రాయ్ సూచించింది. టెలికాం కంపెనీలు అందించే DND సేవలో నమోదు చేసుకుంటే అవసరం లేని మార్కెటింగ్ కాల్స్, సందేశాలను గణనీయంగా తగ్గించుకోవచ్చని పేర్కొంది. అధికారిక నంబర్ల నుంచి వచ్చే కాల్స్ను స్పామ్గా భావించి నిర్లక్ష్యం చేయవద్దని ట్రాయ్ సూచించింది. బ్యాంకు లావాదేవీలు, OTPలు, మోసాల హెచ్చరికలు, KYC, పెట్టుబడులకు సంబంధించిన ముఖ్యమైన సమాచారం ఈ నంబర్ల ద్వారా రావచ్చని తెలిపింది. అయితే కాల్లో వ్యక్తిగత వివరాలు, OTPలు, PINలు అడిగితే మాత్రం అప్రమత్తంగా ఉండాలని హెచ్చరించింది.
1600 లేదా ఇతర అధికారిక నంబర్లా కనిపించే కాల్ వచ్చినా, ఎవరైనా OTP, బ్యాంక్ పాస్వర్డ్, ATM PIN లేదా ఇతర గోప్యమైన వివరాలు అడిగితే వాటిని ఎట్టి పరిస్థితుల్లోనూ వెల్లడించకూడదు. అనుమానం ఉంటే కాల్ను నిలిపివేసి నేరుగా సంబంధిత బ్యాంకు లేదా సంస్థ అధికారిక కస్టమర్ కేర్ను సంప్రదించడం ఉత్తమమని నిపుణులు సూచిస్తున్నారు.
