Top 10 Car Sales In June 2026: భారత ఆటోమోబైల్ మార్కెట్లో జూన్ నెలలో కార్ల అమ్మకాలు ఊపందుకున్నాయి. ముఖ్యంగా టాటా మోటార్స్ తన కార్లతో మార్కెట్లో ఆధిపత్యం చాటింది. దేశవ్యాప్తంగా అత్యధికంగా అమ్ముడైన కార్ల జాబితాలో తొలి రెండు స్థానాలను టాటా పంచ్, టాటా నెక్సాన్ దక్కించుకోవడం విశేషం. మరోవైపు మారుతి సుజుకీకి చెందిన ఆరు మోడళ్లు టాప్-10లో చోటు దక్కించుకోగా, మహీంద్రా స్కార్పియో, హ్యుందాయ్ వెన్యూ కూడా తమ స్థానాన్ని నిలబెట్టుకున్నాయి. అమ్మకాలతో పాటు ఈ కార్ల ప్రారంభ ఎక్స్షోరూమ్ ధరలు ఎలా ఉన్నాయో తెలుసుకుందాం.
టాటా ఆధిపత్యం.. మారుతి బలమైన పోటీ
జూన్ నెల అమ్మకాల గణాంకాలు చూస్తే టాటా మోటార్స్ తొలి రెండు స్థానాలను దక్కించుకుని తన మార్కెట్ బలాన్ని మరోసారి నిరూపించింది. అయితే టాప్-10లో ఏకంగా ఆరు మోడళ్లతో మారుతి సుజుకీ తన ఆధిపత్యాన్ని కొనసాగించింది. భద్రత, మైలేజీ, ఆధునిక ఫీచర్లు, సరసమైన ధరలు కలిగిన మోడళ్లవైపు వినియోగదారులు ఎక్కువగా మొగ్గు చూపుతున్నట్లు తాజా అమ్మకాల గణాంకాలు స్పష్టం చేస్తున్నాయి.
1. టాటా పంచ్ (Tata Punch):
జూన్ నెలలో ఈ కారు 21,006 యూనిట్లు అమ్ముడైంది. దీంతో దేశంలోనే అత్యధికంగా అమ్ముడైన కారుగా నిలిచింది. మైక్రో SUV విభాగంలో భద్రత, ఆకర్షణీయమైన డిజైన్, మంచి మైలేజీ కారణంగా ఈ కారు మంచి ఆదరణ పొందుతోంది.
దీని ప్రారంభ ధర సుమారు రూ.6.20 లక్షలు.
2. టాటా నెక్సాన్ (Tata Nexon):
18,335 యూనిట్ల అమ్మకాలతో టాటా నెక్సాన్ కారు రెండో స్థానాన్ని దక్కించుకుంది. పెట్రోల్, డీజిల్, సీఎన్జీ, ఎలక్ట్రిక్ వేరియంట్లలో లభిస్తున్న ఈ కారు 5 స్టార్ భద్రతా రేటింగ్తో వినియోగదారులను ఆకట్టుకుంటోంది. దీని ధర రూ.8 లక్షలుగా ఉంది.
3. మారుతి సుజుకీ డిజైర్ (Maruti Suzuki Dzire):
మారుతి సుజుకీ కంపెనీకి చెందిన డిజైర్ 17,899 యూనిట్ల విక్రయమై మూడో స్థానంలో నిలిచింది. కుటుంబ వినియోగానికి అనువైన సెడాన్గా డిజైర్కు మంచి డిమాండ్ ఉంది. దీనిని రూ.6.84 లక్షలతో కొనుగోలు చేయొచ్చు.
4. మారుతి సుజుకీ వ్యాగన్ ఆర్ (Maruti Suzuki WagonR):
మారుతి సుజుకీ వ్యాగన్ ఆర్ ఈ సారి16,952 యూనిట్లు అమ్ముడై నాలుగో స్థానాన్ని దక్కించుకుంది. ఈ కారుకు ఇప్పటికే డిమాండ్ ఉన్నప్పటికీ ఈసారి మాత్రం నాలుగో స్థానంలోకి వచ్చింది. విశాలమైన క్యాబిన్, మంచి మైలేజీ, తక్కువ నిర్వహణ ఖర్చుతో ఈ కారు ఇప్పటికీ ప్రజాదరణ పొందుతోంది. ఈ కారు ధర రూ.5.79 లక్షలుగా ఉంది.
5. మారుతి సుజుకీ ఎర్టిగా (Maruti Suzuki Ertiga):
MPVగా కుటుంబాలకు ఇది అత్యంత అనుకూలమైన కారుగా గుర్తింపు పొందింది మారుతి సుజుకీ ఎర్టిగ. ఈ కారు జూన్ నెలలో 16,111 యూనిట్లు అమ్ముడై ఐదో స్థానంలో నిలిచింది. 7-సీటర్ విభాగంలో డిమాండ్ ఉన్న ఈ కారు ధర రూ. 8.96 లక్షలు.
6. మారుతి సుజుకీ స్విఫ్ట్ (Maruti Suzuki Swift):
మారుతి సుజుకీ స్విఫ్ట్ 15,215 యూనిట్ల విక్రయాలతో ఆరో స్థానాన్ని దక్కించుకుంది. గతంలో ఈ కారు ఎప్పటికీ టాప్ 5 లోపే ఉండేది. కానీ ఇప్పుడు ఆరోస్థానానికి పడిపోయింది. అయినా స్పోర్టీ లుక్, మంచి పనితీరు, అధిక మైలేజీ కారణంగా యువతలో ఈ కారు ప్రత్యేక ఆదరణ పొందుతోంది. దీనిని రూ.6.49 లక్షలతో విక్రయిస్తున్నారు.
7. మహీంద్రా స్కార్పియో (Mahindra Scorpio):
SUV గా ఆదరణ పొందుతున్న ఈ కారు 14,097 యూనిట్లు అమ్ముడై ఏడో స్థానంలో నిలిచింది. స్కార్పియో-N, స్కార్పియో క్లాసిక్ మోడళ్లతో ఈ గ్రామీణ, పట్టణ ప్రాంతాల్లో సమానంగా ఆదరణ పొందుతోంది. దీని ధర సుమారు రూ.13.99 లక్షలు.
8. మారుతి సుజుకీ ఫ్రాంక్స్ (Maruti Suzuki Fronx):
స్టైలిష్ క్రాస్ఓవర్ డిజైన్, ఆధునిక ఫీచర్లతో ఆదరణ పొందుతున్న మారుతి సుజుకీ ఫ్రాంక్స్ 13,135 యూనిట్ల అమ్మకాలతో ఎనిమిదో స్థానంలో నిలిచింది. మంచి మైలేజీతో ఈ కారు యువతను ఆకర్షిస్తోంది. దీనిని రూ.7.54 లక్షలతో విక్రయిస్తున్నారు.
