Grameena Bank : కస్టమర్లకు నో టెన్షన్! ఏపీలో ఒకే గ్రామీణ బ్యాంకు.. సేవలు డబుల్!

Grameena Bank : ఆంధ్రప్రదేశ్ రాష్ట్రంలోని గ్రామీణ ప్రాంత ప్రజలకు ఇకపై ఒకే ఒక ప్రాంతీయ గ్రామీణ బ్యాంకు (Regional Rural Bank – RRB) సేవలు అందించనుంది. ప్రస్తుతం వేర్వేరుగా కార్యకలాపాలు నిర్వహిస్తున్న ఏపీ చైతన్య గోదావరి గ్రామీణ బ్యాంక్ (AP Chaitanya Godavari Grameena Bank), ఆంధ్ర ప్రగతి గ్రామీణ బ్యాంక్ (Andhra Pragathi Grameena Bank), సప్తగిరి గ్రామీణ బ్యాంకు (Saptagiri Grameena Bank) త్వరలో ఒకే సంస్థగా విలీనం కానున్నాయి.

Also Read : పోసానికి మళ్లీ నోటీసులు.. కొత్తగా ఆ కేసు!

భారతీయ రిజర్వ్ బ్యాంక్ (RBI) దేశవ్యాప్తంగా ప్రాంతీయ గ్రామీణ బ్యాంకుల సంఖ్యను క్రమబద్ధీకరించేందుకు ఒక ప్రణాళికను రూపొందించింది. ఈ ప్రణాళికలో భాగంగా ప్రస్తుతం ఉన్న 43 ప్రాంతీయ గ్రామీణ బ్యాంకులను 28కి తగ్గించాలని లక్ష్యంగా పెట్టుకున్నారు. ఈ క్రమంలోనే ఆంధ్రప్రదేశ్‌లోని ఈ మూడు బ్యాంకులను ఒకే సంస్థగా కలపనున్నారు.

ఈ విలీనం తర్వాత ఏర్పడే నూతన గ్రామీణ బ్యాంకు ప్రధాన కార్యాలయం (Headquarters) రాష్ట్ర రాజధాని అమరావతిలో ఉండనుంది. ఈ విలీన ప్రక్రియకు సంబంధించిన అధికారిక నిర్ణయాలు పూర్తయ్యాయని తెలుస్తోంది. ఈ నూతన విధానం వచ్చే మే నెల నుండి రాష్ట్రవ్యాప్తంగా అమలులోకి రానుంది. దీనికి సంబంధించిన ఏర్పాట్లు చురుగ్గా సాగుతున్నాయి.

ఈ విలీనం వల్ల గ్రామీణ ప్రాంతాల్లో బ్యాంకింగ్ సేవలు మరింత సమర్థవంతంగా అందుబాటులోకి వస్తాయని భావిస్తున్నారు. మూడు బ్యాంకుల సిబ్బంది ఒక చోట చేరడం వల్ల విస్తృతమైన నెట్‌వర్క్, మెరుగైన సాంకేతిక పరిజ్ఞానం, అధిక ఆర్థిక వనరులు అందుబాటులోకి వస్తాయి. ఇది కస్టమర్లకు మరింత మెరుగైన సేవలను అందించడానికి దోహదపడుతుంది. అలాగే, బ్యాంకుల నిర్వహణ ఖర్చులు తగ్గడం వల్ల వాటి ఆర్థిక పరిస్థితి కూడా మెరుగుపడుతుంది.

అయితే, ఈ విలీనం వల్ల ఉద్యోగుల విషయంలో కొన్ని మార్పులు ఉండవచ్చని భావిస్తున్నారు. అయితే, దీనికి సంబంధించిన పూర్తి వివరాలు ఇంకా వెల్లడి కావాల్సి ఉంది. బ్యాంకుల విలీకరణ ప్రక్రియ సజావుగా సాగేందుకు ఆర్బీఐ మార్గదర్శకాలను అనుసరిస్తూ తగిన చర్యలు తీసుకుంటున్నారు. గ్రామీణ ప్రాంత ప్రజలు ఈ మార్పును ఎలా స్వీకరిస్తారో చూడాలి.