Prakash Raj: భావ స్వేచ్ఛ పేరిట రెచ్చిపోతున్న వారికి సరైన బుద్ధి చెప్పాలని చూస్తున్నారు ఏపీ డిప్యూటీ సీఎం పవన్ కళ్యాణ్. ప్రభుత్వపరంగా బలమైన నియంత్రణ వ్యవస్థను ఏర్పాటు చేస్తున్నారు. సమాజంలో ఎలాంటి యోగ్యత లేని వారు భావ స్వేచ్ఛ పేరిట సోషల్ మీడియాలో రెచ్చిపోయి మాట్లాడుతున్నారు. అటువంటి వారికి బ్రేక్ వేసే విధంగా బలమైన ప్రభుత్వ వ్యవస్థను పవన్ కళ్యాణ్ తేవడం ఇప్పుడు సంచలనంగా మారింది. ఇటువంటి వ్యవస్థతో ఇష్టారాజ్యంగా మాట్లాడే వారి నోటికి తాళం పడనుంది. అయితే తాజాగా ప్రశ్న రావణ్ అరెస్టుతో.. నటుడు ప్రకాష్ రాజుకు అసలు సిసలు సినిమా కనిపిస్తోంది.
* రావణ్ కు మద్దతు..
దళిత క్రైస్తవ మహాసభలో మాట్లాడారు రావణ్. ఈ క్రమంలో ఆయన చేసిన వ్యాఖ్యలు అభ్యంతరకరంగా ఉన్నాయి. అత్యంత జుగుప్సాకరంగా ఉన్నాయి. అందుకే ఇప్పుడు ఆయనపై కేసుల మీద కేసులు నమోదు అవుతున్నాయి. కేవలం పవన్ కళ్యాణ్ పై చేసిన వ్యాఖ్యలు మాత్రమే కాదు. హిందూ సమాజంతో పాటు హిందూ దేవతలను కించపరుస్తూ ఆయన చేసిన వ్యాఖ్యలు సమాజం పై తీవ్ర ప్రభావం చూపాయి. అటువంటి రావణ్ అరెస్టును తప్పుపట్టారు ప్రకాష్ రాజ్. ఏపీ డిప్యూటీ సీఎం పవన్ కళ్యాణ్ పై నేరుగా విమర్శలు చేశారు. కూటమి ప్రభుత్వ పనితీరును తప్పుపట్టారు. అయితే ఇప్పుడు అదే ప్రకాష్ రాజ్ పై కర్ణాటక వ్యాప్తంగా ఆందోళనలు వ్యక్తం అవుతుండడం విశేషం.
* కర్ణాటకలో తీవ్ర నిరసనలు.
కర్ణాటకలో ధర్మస్థల వివాదం కొనసాగుతోంది. ఈ కేసులో నిందితుడిగా ఉన్న చిన్నయ్య కోర్టులో పిటిషన్ దాఖలు చేశారు. ప్రకాష్ రాజ్ ఫోన్ చేసి తనను గైడ్ చేశారని చెప్పుకొచ్చారు. దీంతో ధర్మస్థల చుట్టూ జరిగిన అంతర్జాతీయ కుట్రలో ప్రకాష్ రాజ్ భాగస్తుడు అని తీవ్ర అనుమానాలు రేగాయి. బెంగళూరు ప్రెస్ క్లబ్లో ప్రకాష్ రాజ్ వివరణ ఇచ్చే ప్రయత్నం చేశారు. కానీ అక్కడ సీనియర్ జర్నలిస్టులు ప్రకాష్ రాజ్ బట్టలు విప్పినంత పని చేశారు. ఇదంతా పెయిడ్ జర్నలిజం అన్నట్టు మాట్లాడారు ప్రకాష్ రాజ్. కానీ కర్ణాటకలో హిందూ సమాజం ఊరుకోవడం లేదు. ప్రకాష్ రాజ్ కు వ్యతిరేకంగా పెద్ద ఎత్తున ఆందోళనలు నిర్వహిస్తోంది. దిష్టిబొమ్మలను సైతం దహనం చేస్తోంది. అదే సమయంలో ఏపీలో రావణ్ ఘటనపై స్పందించి పవన్ కళ్యాణ్ తో పాటు చంద్రబాబును తప్పుపట్టారు. దీంతో హిందూ సంఘాలు మరింత గా నిరసనలు వ్యక్తం చేస్తున్నాయి ప్రకాష్ రాజ్ పై. ఊహించని ఈ పరిణామంతో తనకు తాను అపరమేధావిగా భావించే ప్రకాష్ రాజ్ ఉక్కిరిబిక్కిరి అవుతున్నారు.
