Hair Loss Prevention: ఇప్పటి కాలంలో వయస్సుతో సంబంధం లేకుండా చాలా మంది జుట్టు రాలిపోవడం, పలుచబడటం, ముందుగానే బట్టతల రావడం వంటి సమస్యలతో బాధపడుతున్నారు. అయితే దీనికి కేవలం జన్యుపరమైన కారణాలే కాకుండా, మన రోజువారీ అలవాట్లు కూడా ప్రధాన కారణమని వైద్య నిపుణులు చెబుతున్నారు. ముఖ్యంగా రసాయనాలు ఎక్కువగా ఉన్న ఉత్పత్తుల వినియోగం, సూర్యకాంతి లోపం, అధిక మానసిక ఒత్తిడి వంటి అంశాలు జుట్టు ఆరోగ్యంపై తీవ్ర ప్రభావం చూపుతున్నాయని హెచ్చరిస్తున్నారు. ఇలాంటి సమయంలో కొన్ని చిట్కాలు పాటిస్తే జుట్టు ఆరోగ్యంగా ఉంటుందని ఓ వైద్యుడు చెబుతున్నాడు. ఆ వీడియో ఇప్పుడు సోషల్ మీడియాలో వైరల్ అవుతోంది.
ప్రస్తుతం మార్కెట్లో లభించే చాలా షాంపూలలో సల్ఫేట్లు, పారాబెన్లు, కృత్రిమ సువాసనలు వంటి రసాయనాలు అధికంగా ఉంటాయి. ఇవి తాత్కాలికంగా జుట్టును మెరిసేలా చేసినా.. దీర్ఘకాలంలో తల చర్మానికి హాని కలిగించే అవకాశముంది. ముఖ్యంగా తలలో సహజంగా ఉండే మంచి బ్యాక్టీరియా, సహజ నూనెలు నశించి జుట్టు బలహీనపడుతుంది. దీంతో వెంట్రుకల వేర్లు బలహీనమై జుట్టు రాలడం పెరుగుతుంది. అయితే ఈ సహజ పద్ధతుల ద్వారా జుట్టు ఆరోగ్యంగా ఉండే అవకాశం ఉంది.
పూర్వకాలంలో మన పెద్దలు కుంకుడు కాయ రసం, శికాకాయ, మెంతులు వంటి సహజ పదార్థాలతో తలస్నానం చేసేవారు. ఇవి తల చర్మాన్ని శుభ్రపరచడమే కాకుండా, వెంట్రుకలకు సహజ పోషణను అందిస్తాయి. వైద్యుల సూచన ప్రకారం నెలకు కనీసం ఒకసారి అయినా సహజ పదార్థాలతో తలస్నానం చేయడం వల్ల జుట్టు ఎదుగుదల మెరుగుపడే అవకాశం ఉంటుంది. అలాగే శరీరానికి సున్నిపిండి వాడడం వల్ల చర్మం ఆరోగ్యంగా ఉండటంతో పాటు రసాయనాల ప్రభావం కూడా తగ్గుతుంది.
ప్రస్తుతం చాలామంది రోజంతా ఇళ్లలో, కార్యాలయాల్లో లేదా ఏసీ గదుల్లోనే ఎక్కువ సమయం గడుపుతున్నారు. దీంతో ఉదయపు సూర్యకాంతి శరీరానికి తగలడం తగ్గిపోతోంది. ఉదయపు సూర్యకాంతి ద్వారా శరీరానికి విటమిన్-డి లభిస్తుంది. ఈ విటమిన్ జుట్టు వేర్ల బలానికి, కొత్త వెంట్రుకల ఎదుగుదలకు అవసరమని నిపుణులు చెబుతున్నారు. అందుకే ప్రతిరోజూ ఉదయం కొంతసేపు సూర్యకాంతిలో గడపడం మంచిదని సూచిస్తున్నారు.
ప్రతి చిన్న విషయాన్నీ ఎక్కువగా ఆలోచించడం, భయం, ఆందోళన, ఉద్యోగ ఒత్తిడి, ఆర్థిక సమస్యలు వంటి కారణాల వల్ల మానసిక ఒత్తిడి పెరుగుతోంది. ఈ టెన్షన్ శరీరంలోని హార్మోన్ల సమతౌల్యాన్ని దెబ్బతీస్తుంది. దీని ప్రభావం జుట్టుపై కూడా పడుతుంది. అధిక ఒత్తిడి కారణంగా వెంట్రుకలు త్వరగా రాలిపోవడం, తెల్లబడటం, కొత్త వెంట్రుకలు రాకపోవడం వంటి సమస్యలు వస్తాయి. అందుకే యోగా, ధ్యానం, సరైన నిద్ర వంటి అలవాట్లు జుట్టు ఆరోగ్యానికి కూడా ఉపయోగపడతాయని వైద్యులు చెబుతున్నారు.
జుట్టు ఆరోగ్యంగా ఉండాలంటే బయట నుంచి మాత్రమే కాకుండా, లోపల నుంచి కూడా సరైన పోషణ అవసరం. ప్రోటీన్లు, ఐరన్, జింక్, బయోటిన్, విటమిన్-డి వంటి పోషకాలు ఉన్న ఆహారం తీసుకోవాలి. గుడ్లు, ఆకుకూరలు, పప్పులు, డ్రై ఫ్రూట్స్, పండ్లు వంటి పోషకాహారం జుట్టుకు బలం ఇస్తుంది. అలాగే తగినంత నీరు తాగడం కూడా అవసరం.
జుట్టు సమస్యలు మొదలైన తర్వాత చికిత్సల కోసం పరుగులు తీయడం కంటే ముందుగానే జాగ్రత్తలు తీసుకోవడం ఉత్తమం. రసాయనాల వినియోగాన్ని తగ్గించడం, సహజ పద్ధతులను పాటించడం, సూర్యకాంతి పొందడం, ఒత్తిడిని నియంత్రించడం, మంచి ఆహారం తీసుకోవడం వంటి చిన్న మార్పులు జుట్టు ఆరోగ్యాన్ని కాపాడడంలో కీలక పాత్ర పోషిస్తాయి. సరైన జీవనశైలితో ముందస్తుగా జాగ్రత్తలు తీసుకుంటే బట్టతల సమస్యను చాలా వరకు తగ్గించుకోవచ్చని నిపుణులు సూచిస్తున్నారు.
